Read Karbi 2 RECHO 4 Bible Online

2 RECHO 4 - Karbi bible

2 RECHO 4

¹Montri esong abangphu ahemepi Elisha along damsi pulo, “Akehai, neli penan thi-et-lo! Nangli chini, alangli inut Arnam kephere abang, bonta inut abangphan preng kepi nangji dolang apotsi la non neliphan apreng alar nelisopo banghini ban keponjisi vang-lo.”

²Nangliphan neli kopilo keklem nangpo? la arjulo. “Neli thantha nanglilong hem kopi ason dolo?” Thangnat ta ave, jit ajangthu abong along asap-o ajangthu pen apar avelo, bangpi thak-lo.

³“Nanglidung edon ahem damra bong angse un an pangrumdamnon,” bangpi aphan Elisha pulo.

⁴“Anke nangli lapen nanglisopomar atum pen hem damra inghap chingkirhetnon lapen bong-heihei arlo jangthu dungnon. La pleng-lote ehin anat bivetnon.”

⁵Lasi bangpi asomar penpen hem chelutdamlo, inghap chingkirsi jit ajangthu abong enlo lapen asomar halahei bangpi along kevan abong kedo-an along jangthu thailo.

⁶Kedo-an abong jangthu kethai patangsi bangpi arjulo abong dolangma pu, “Lahelo ajutsilo.” Bangpi asomar angbong thak-lo.

⁷Bangpi Elisha montri along damthulo, bangpi aphan la pulo, “Jit ajangthu jorra nangli preng kedo-an chetu damnon, nangli lapen nanglisomar atum kerengji aphanta la ahin atangka pen dorphlup nangji.”

⁸Arnisi Elisha Shunem anat damlo, hadak inut keplang-o a-arloso dolo. Bangpi laphan an esan kepachojisi hang-lo, lapen halaso arni pen la Shunem kedam aphongtin bangpi ahemsi la an chodampo.

⁹Bangpi apenan aphan chepulo, “Ne mathalo, ladak kevangver laso amonit chenam inut kangthir amonit tahai.

¹⁰Sarnung angsong eli angdengso isi kimpihop lonang, hongplang, tebul lapen inghoi kangtui isi lapen melur isi la along bilonang, elilong la nangkevur ahut la hadak sanglongpo.”

¹¹Arnisi Elisha Shunem anat chevoisi la kesang adim chedamlo.

¹²La aban Gehazi aphan padamsi arloso aphan pahangtoilo. Bangpi vangsi

¹³Gehazi aphan la pulo, “Eli kenangji ason an bangpi epadorphlup apot bangpi kopi kenangjima arjutha. Bangpi nephan recho along mate ron-armu apinpo along ne padamsi bangpi aphan choningripi nangji tahai mene.” Neli kenangji ason an nelirat atum angbong neli longpet-lo, pusi bangpi thak-lo.

¹⁴Gehazi aphan Elisha arjulo, “Tangte ne bangpi aphan kopi klem nangpo?” La thak-lo, “Mesen, seta bangpi asopinso ave lapen bangpi apenan sarpik-lo.”

¹⁵Bangpi aphan ladak pavangtoitha, Elisha hukum pilo. Bangpi vangsi inghap ajakan along arjapding-lo,

¹⁶bangpi aphan Elisha pulo, “Moning nonpu apor nangli sopo inut charbak longpo.” Pe-oi! pusi bangpi hangserlo. “Kanghon pen akehai, nelipachobeiri. Nangli inut Arnam amonit!”

¹⁷Bonta Elisha kepu ateng puthot aningkan halaso aporchit bangpi inut asopo mahang pathek-lo.

¹⁸Penang an aningkan aphi, soktipli kerot ahut apo along kedunjisi oso abang adap isi barphlot-lo, apo abang soktipli kerot atum along hidisi dolang.

¹⁹Menmen amat la apo aphan chehangserlo, “Nephu nangroklok-lo! Nephu nangroklok-lo!” Oso aphan apei along pondetnon, aban aphan apo abang pulo.

²⁰Aban abang oso aphan apei along ponthudet-lo, bangpi ha anerlochitim anta arbak-het-lo, halaso ahut amat la thilot-lo.

²¹Bangpi laphan Elisha angdeng an pondet-lo, laphan hongplang athak pa-ilo, lapen bangpi anung anghap ingkirtekangsi olo.

²²Anke apenan aphan bangpi pulo, “Gadha ejon pen ban inut ladak nangtoitha. Ne Elisha montri along damnangji. Ne un an prapjin pen nangchevoithuji.”

²³Kopi athesi nang pini kedam nangjima? Bangpi apenan arjulo. “La kesang arnita kali lapen chiklo kemi arong-aje ta kali.” Jat setalo, bangpi thak-lo.

²⁴Anke bangpi agadha ardontanlo lapen aban aphan hukumpilo, “La kedam paprap un an gadha padam non lapen panglenri, ne nang pupetik ke.”

²⁵Lasi bangpi barlo lapen Elisha kedo adim Karmel anglong anat damlo.

²⁶Bangpi kevangbom ahut ephar pen Elisha thek-long-lo lapen aban Gehazi aphan pulo, “Langtha! Shunem pen bangpi vang-lo! Bangpi anat damseraknon lapen bangpi apenan, asopo mephun langma kosonma birta endunnon.” Bangpi Gehazi aphan thanlo kado-kaveta mephunlang pu,

²⁷bonta bangpi Elisha along nangkele ahut ke angno bangpi angphun arum patongkisi la akeng otthip-lo. Bangpi aphan Gehazi ketoiphitjisi kethailo, bonta Elisha pulo, “Bangpi aphan inutvet-le padolongnon. Bangpi aningkeduk nang thek-longlema? Lapen bangso alam aputhak HEMPHU nephan nethanthelang.”

²⁸Laphan arloso abang pulo, “Akehai, neli pinso a-oso nangli hanghelangma? Neli nangliphan nelining pathinangne pu nanglipu pe langma?”

²⁹Gehazi anat Elisha pangnosi pulo, “Paprapnon! Ne chin ponra damnon. Nang kechetong badu aphanta kardom piri lapen mane jongsi nangphan kardom pilote kethak dunji aphan apor padamri. Hem anat dam pakengsonnon lapen oso aphuthak ne chin batnon.”

³⁰Elisha aphan arloso abang pulo, “Ne kekroi HEMPHU kereng amen pen nangliphan semetang-lo, neli nangliphan o-elo!” Lasi latum bang hinita chevoithulo.

³¹Gehazi dam paphrangsi Elisha achin oso aphuthak bat-lo, bonta thang ase ave mate achethe kedo angthek thek-longle. Lasi la Elisha aphan kechetongjisi chiruithulo lapen pulo, “Oso burbepin.”

³²Elisha nanglesi la inutvet angdeng arlo damlo lapen hongplang athak oso kethi tilai thek-long-lo.

³³La inghap ingkirhetsi HEMPHU aphan ardomlo.

³⁴Anke la oso athak abang chebat-lo, la angtur, amek, ari oso aphuthak ithor amat oso abang kar-om cheng-lo.

³⁵Elisha thursi angdeng arlo helat-lo lapen chedamthusi oso athak abang ithorlo. Oso abang batai 7 pase-erlo, lapen amek chingpulo.

³⁶Gehazi aphan Elisha hang-lo, lapen oso apei aphan pahangtoilo. Bangpi arlo vangsi bangpi aphan la pulo, “Nangso che-ennon.”

³⁷Bangpi Elisha akeng-ri amahang longle paphosi ardomkhrup-lo; anke bangpi asopo cheponsi damphit-lo.

³⁸Ephong, det adang akhim kethur ahut Elisha Gilgal anat chevoilo. La esong amontri atum aphan kethan ahut la aban aphan phulethepo me along halatum aphan han padangtoilo.

³⁹Ajehak ahanparvo keridamjisi halatum angbong inut abang barlo. La ingnam adrakharikang long-lo lapen la untik an athe likponlo. La halahei ponpisi ingthan-ilo lapen lahei kopima chinine pinpen han along jokdunlo.

⁴⁰Han bak-lo, kepachojisi, bonta la chomat-det pen Elisha aphan halatum hangserlo, “La bikar cheplangtang-lo!” lapen la chonotang-lo.

⁴¹Elisha ajehak a-an hang-lo lapen la phule arlo jokdunlo, lapen pulo, “Halatum aphan ako han hekthunon.” Anke la thangta cheplangpledet-lo.

⁴²Aphong kaprek, inut amonit Baal Shalishah pen vang-lo, Elisha aphan atikong asoktipliso pen keselam ahim dum 20 vanpilo, lapen ajehak ahan kemeta vanpilo. Elisha aban aphan pulo, “lahei pen montri asong aphan kepachoji aphanlo,”

⁴³bonta la thak-lo, “Bangpharo amonit aphan la dor ikjima?” Elisha thak-lo, “Kepachojile halatum aphan la pinon, pima HEMPHU pulo, halatum cho pen ahin dothujilang.”

⁴⁴Lasi aban abang kecho amar halatum angno ingle pilo, lapen HEMPHU keputang asonthotsi halatum kedo-an cholo lapen ajehak ahin dothulang.