Read Karbi 2 RECHO 5 Bible Online

2 RECHO 5 - Karbi bible

2 RECHO 5

¹Naaman ke Siria atum ron apinpolo, lapen man pi-o lapen Siria arechota aningdok-olo pima Naaman pen ajok Siria aron-asong aphan HEMPHU pahaibomlo. La inut anokbe, bonta la si-i keso kelong abang.

²Ephong Israel aputhak ketengkheng ahut Siria atum inut Israel a-osopi pondet-lo lapen bangso a-osopi Naaman apiso aban plang-lo.

³Arnisi osopi abang ahemphi aphan pulo, “Neli hemphu Samaria along kedo amontri along dam asonte pusi neli ningkehang! Alangli akeso halaso abang pame-unji.”

⁴Naaman laso alam arjulongsi, la recho along damlo lapen osopi kepu alam than-et-lo.

⁵Recho pulo, “Israel arecho along damnon lapen laso aloh halaphan pinon.” Lasi Naaman barlo, arideng rup dum suri 30, ser dum suri 6, lapen pe-ri sele akemenei ape chorkep.

⁶La kepon aloh along lasonsi tok-lo, “Laso aloh pen ne chakri Naaman aphan pachinilo. Neningkehang lahelo nangli la akeso pamepo.”

⁷Israel arecho la porhesi aningkethi pen la ape chingsek-lo, lapen hang-lo, “Kosonsi Siria arecho laso amonit aphuthak ne kepameji ning chetheloma? Ne Arnam putong la kemathama? Kethi kereng ajakong nelong doma? Ladak pen chinilo la kechebohongjisi athe kerilo.”

⁸Kopi plang-loma lahei alam Elisha montri arjulongsi la lamthe isi recho aphan birta pilo; “Nangli kopi athesi lapu-an ningduk nangjima? Laso amonit nelilong nangtoinon, lapen laphan neli paklangpo Israel adet inut amonit do pu alam!”

⁹Lasi Naaman alosei lapen ahemkonglong pen pen damlo lapen Elisha ahem thengno along sakok-lo.

¹⁰Elisha ban inut toisi laphan Jordan Aroi along batai throksi lang pachinglu damtoilo lapen la akeso medet khangjangpo.

¹¹Bonta aningthihaksi damjuilo lapen pulo, “Ne mathalo la nangbarsi nelong vangpo, lapen a-Arnam HEMPHU aphan ardompo, lapen keso amek along aribatsi nepamepo!

¹²La apar Abana lapen Pharpar Aroi Damaskas along avema? Lahei Israel Aroi apar memulang; lapule chinilorte halahei along chinglupen chepame unji apot-lo!”

¹³Alangli ban la along an damsi pulo, “Akehai, montri abang jongsi nangliphan akesung akam paklemtoi lote la nangli klemvekji, kalima? Tangte non nangli kopisi la kepu ateng chinglu un-edetjima lapen chepame un-edetjima?”

¹⁴Lasi Naaman Jordan sundamsi Elisha kepu ateng batai throksi lang arlo parbip-lo lapen la akeso medet-lo. La areng oso areng asonsi mesen lapen lengbong-lo.

¹⁵La Elisha along chevoithulo, la amonit atum pen pen lapen pulo, “Non neli chinilo nahokta arnam ave bonta Israel a-Arnamchot; lasi kanghon pen akehai, neli pen dan chodeng iktha.”

¹⁶Elisha thak-lo, “Ne kangduk HEMPHU kereng amen pen semetang-lo, neli thang adanta dengde.” La kepadengji aphan Naaman bor-ilo, bonta la un-edet-lo.

¹⁷Lasi Naaman pulo, “Nangli jongsi neli dan dengde pulote, neliphan losei jonni kepon un a-longle hem nepapon longtha, pima non pen neli HEMPHU pen apar akaprek arnam aphan athok pipelo.

¹⁸Lasi neningthelo ne Recho aphan Rimmon akardomhem, la Siria a-arnam lapen laphan karcho adim along japon seta HEMPHU ne padiyanang. HEMPHU ne diyavekji!”

¹⁹Ningkangsam penle damnon, pusi Elisha pulo. Lapen Naaman damlo. La asap-o damchot anchot-lang,

²⁰Elisha aban amethang chepulo, “Nehemphu Naaman thangnat papilonglepin pen toijuilo! Laphan Siria aso kepajir ason chodeng nangji apot-lo. HEMPHU kereng amen pen ne laso aphi kat dunpo la pen ajehak amar endunpo.”

²¹Lasi la Naaman aphi phi dunlo. Naaman inut amonit aphi aphi kekat thek-longsi, laphan kechetongjisi la ahemkonglong pen suntuk-lo lapen arjulo, “Pine kelet dolangma?”

²²“Ave,” Gehazi thak-lo. “Bonta neli hemphu nangliphan kepathanjisi neketoi; nonjong Ephraim alongri along kedo amontri asong pen banghini nanglelo nangli halatum aphan rup dum suri kethom, lapen pe-sele akeme chorni la nangli papitoilo.”

²³Kanghon pen rup dum suri throk ponnon, Naaman thak-lo. La lodun bomsi jarong hini arlo rup thapsi sak-het-lo, lahei pilo lapen pe ri chorni la aban banghini aphan pisi halatum Gehazi aphrang padamlo.

²⁴Halatum Elisha kedo anglong lesi Gehazi jaronghini ponsi lahei hem arlo pondet-lo. Anke la Naaman aban atum aphan toilo.

²⁵La hem arlo chelutdamlo lapen Elisha laphan arjulo, “Nang konatsi kedamlo?” Oh, ne nahokta damde, akehai, la thak-lo.

²⁶Bonta Elisha pulo, “Halaso amonit nangphan kechetongjisi ahemkonglong pen kesun ahut ne hadak avema nekarjong pen? Non tangka, pe-ri, jit arong-artu lapen drakharikang, biresak lapen chainong mate ban-heihei kedengdun apor kali!

²⁷Lapen non Naaman akeso nangphuthak vangpo, nang lapen nangso-nangsu anta la kaike longverpo!” Gehazi odet aphi, la areng akeso cholongsi areng ar-e kelok ason lokpok-lo.