Read Karbi 2 RECHO 6 Bible Online

2 RECHO 6 - Karbi bible

2 RECHO 6

¹Arnisi Elisha amontri asong atum laphan choningrilo, “Elitum kedo adim bi-ong-lo!

²Nelitum aphan Jordan kedamjile bida tho iknon lapen ajehak athengpi pi damsi eli kedo adim ehum ahem kimlongpo.” Mesenlo, pusi Elisha thak-lo.

³Halatum angbong inut abang la aphan halatum along kepadunjisi choningrilo, la kroidunlo,

⁴lapen halatum barrappet-lo. Halatum Jordan nanglesi, kam keklem pangcheng-lo.

⁵Inut abang thengpi pibom ahut, menmen ingchin acho aphu lang arlo klochuilo, “Ne kopi pensi keklemjilangma akehai?” la Elisha aphan hangserlo. “La kerongchot acho pinak!”

⁶La kodaksi keklolo? Elisha arjulo. Bangso abang laphan adim paklang-lo lapen Elisha kaibong chorpetsi la lang arlo varchorlo lapen cho aphu panglang-lo.

⁷“La endetnon,” la hukum pilo, lapen bangso amonit abang chejotsi la humdet-lo.

⁸Israel pen Siria arecho ron chedanlo, la achakri atum pen chingvailo lapen elong adim mukam chekimjisi chongvailo.

⁹Bonta Elisha abang Israel arecho aphan birta pilo, pima Siria aso atum hadak chepatujoisi inghongding-lo.

¹⁰Lasi Israel arecho ta haladak kedo amonit atum aphan pacheretoilo lapen halatum aphan patonsi railo. Lason aphong do-olo.

¹¹Laso aputhak Siria arecho aning jangjelo; la achakri atum aphan arjulo, “Nangtum angbong komat abangsi Israel arecho anat-lo?”

¹²Halatum angbong inut abang thak-lo, “Baduta ave Recho. Elisha montri si nangli angdeng arlo kedip alam anta Israel arecho aphan thanlo.”

¹³La konatsi doma ridamnon, recho hukum pilo, “Ne laphan nepchekpo.” Elisha Dothan alongsi do pu laphan thansi

¹⁴la losei lapen ronhemkonglong-heihei ongdung ron-asong hadak toilo. Halatum rong ajo lelo lapen la kompet-lo.

¹⁵Puthot adapprang Elisha aban thurlo, lapen hem angtan barlo, lapen Siria aron asong thek-long-lo, halatum alosei lapen ronhemkonglong-heihei pen rong kompet-lo. La Elisha along chedamthusi hang-lo, “Etum kevirlo, akehai, eli kopisi keklempoma?”

¹⁶Phereri, Elisha thak-lo. Etum abesi ke-onglang halatum abe aphan mute.

¹⁷Anke la ardomlo, “O HEMPHU laso ariso amek ingpura laphan pathek-longtha!” La akardom HEMPHU thak-lo, lapen Elisha aban angphun chingthursi lang-lo, lapen Elisha aphan kekomchen anglong me alosei lapen me ahemkonglong si dipthip-lo.

¹⁸Siria atum ketengkheng ahut Elisha ardomlo, “O HEMPHU, lahei amonit atum amek paselok-et tha!” La akardom HEMPHU thak-lo, lapen halatum aphan amek paselok-et-lo.

¹⁹Anke halatum along Elisha damlo, lapen pulo, “Nanglitum kalile atovarsi dolo; lake nanglitum keri arong kali. Neliphi phi nangdunnon, lapen nanglitum keri amonit anat nangja ponpo.” Lapen la halatum aphan Samaria anat japonlo.

²⁰Halatum rongsopi kelut pen amat Elisha ardomthulo, “Latum amek ingputha, HEMPHU, lapen latum aphan pachechar longtha.” La akardom HEMPHU thak-lo; halatum amek la pachechar long-lo, lapen latum Samaria arlosi dolo pu chethek-long-lo.

²¹Israel arecho Siria aso atum aphan thek-longsi, la Elisha aphan arjulo, “Latum aphan neli pathi-etnonma, akehai? Latum aphan pathi-etnon ma?”

²²Nangne, la thak-lo, “Nangli kechedan pen kehailongra kenep-long kali atum aphan nangli pathi unjima? Latum aphan kecho-kejun ason pinon, lapen latum arecho along pachevoi-thu lonang!”

²³Lasi Israel arecho latum aphan kecho-kejun Ameipi sikpilo; lapen halatum chodet-jundet aphi, la latum aphan Siria arecho along pachevoi-thulo. Halabangso arni pen Siria atum Israel adet thiparohumhe det-lo.

²⁴Penang an aphi Siria arecho Benhadad Israel abe thursi la kedo-an aron-armu japonlo, lapen Israel ketengkhengjisi Samaria arongsopi komdampet-lo.

²⁵La kekompet pen ajok sok-sang kedorde rongsopi along pu-an akhim thurlo gadha aphu ejon anam rup dum 80, lapen powa isi avothung ahi anam rup dum pholo.

²⁶Israel arecho rongsopi apaisong athak keteroi ahut inut a-arloso hangserlo, “Neraptha recho!”

²⁷La thak-lo, “HEMPHU jongsi nangrap-re tangte neli kosonsi nangrap thek-jilangma? Ne pine soktipli mate drakha ahor doma?

²⁸Nangtum kopi akesung-lo?” Bangpi thak-lo, “Patumi ladak kedo arloso pinkhat-lo, etum nangsopo chonang, lapen puthot arni ke nesole cholonang.

²⁹Lasi neso aphan netum chotundetsi chodet-lo. Puthot arni bangpi aphan ne pulo, etum nangsopo chonang, bonta laphan bangpi patujoilo!”

³⁰La arjulongsi recho aning jangjesi ape chingsek-lo, lapen la adung arei arpong kedo atum la ape aber pethoila ke-i thek-long-lo.

³¹La hangserlo, “Nephan Arnam nepathilot-nang jongsi arni chiche ako ne Elisha aphan pathilonglete!”

³²Elisha aphan kepathijisi la pherangke toilo. Halaso ahut Elisha la along kevang ajehak arleng kesar atum pen pen hem si do. Recho apherangke nanglele aphrang akesar atum aphan Elisha pulo, “Hala monit apran karmut abang nephan kepathijisi anut kaprek nangtoililo! Non ladak la nanglelote inghap ingkirhetnon lapen arlo laphan nangpalut longri. Recho amethang amat laso aphi doji.”

³³Laso alam kethan jutchit anchot-lang, recho nanglesi pulo, “La HEMPHU-si laso akesung netum aphuthak pavang-lo! Kopisi ne laphan pine kepaklemji chonghong nangjilang?”