Read Karbi 2 RECHO 7 Bible Online

2 RECHO 7 - Karbi bible

2 RECHO 7

¹Elisha thak-lo, “HEMPHU kopisi kepuma arjutha! Penap nonpu apor Samaria along rup edumnat pen soktipli lin thom mate soktipliso lin throk namlongji.”

²Recho along kehonbang Elisha aphan pulo, “La plang un-e non amat HEMPHU amethang jongsi sok-sang nang-lo seta plangple.” La keplang nang thek-longpo, bonta halaso a-an nang cholongledetji, Elisha thak-lo.

³Si-i keso bang phli amonit atum Samaria anghap angtansi do, lapen halatum lahin lahin chepulo, “Etum thithetik dak kopisi chonghong nangjima?

⁴Rongsopi kedam la thangnat ale ave, pima hadak seta kecholongle pensi thinangpo; lapen ladak-le do seta eli thiji. La apotsi etum Siria amukam anat damlonang; jonghe kehingno seta ephan epathi unchotji, bonta epran e-armutmedet tahai mene.”

⁵Lasi arnikangsam apor latum Siria amukam anat damlo, latum hadak lesi badu aphanta thek-longledet-lo.

⁶HEMPHU Siria aso aphan losei-heihei, ronhemkonglong-heihei pen ongdung aron-armu kevang arki parjulong-lo, lapen Siria aso atum mathalo, Israel arechosi Hitti lapen Ijip arecho lapen halatum aron-armu rongsi ketengkhengji vang-lo.

⁷Lasi arni kangsam Siria aso atum apran achethe aphan kat-lo, halatum apehem-heihei, losei-heihei lapen gadha-heihei lapen amukam kedo-an ason otekang-lo.

⁸Bang phli amonit atum mukam akung lesi halatum pehem arlo lutdamsi cholo, junlo, hadak kedo amar, an, ser, rup lapen pe-ri longsi arbak-hup-lo, lapen lahei kepatu damjisi damlo; anke halatum nangchevoilo, along kaprek apehem arlo lutsi aphrang asonthot klemlo.

⁹Bonta aphi latum lahin lahin chepulo, “Lason etum klembom nangnelo! Etum birta keme dolo lapen la etum aphan bijoi nangnelo. La kethanji aphan penap adap an inghong-lote etum aduk phovekji. Non amat dam lonang lapen recho achakri atum aphan thanlonang!”

¹⁰Lasi halatum Siria atum amukam obup-lo, lapen Samaria anat damlo, lapen inghap-heihei along kedo tonbang atum aphan hang-lo: Netum Siria amukam damlo seta badu aphanta thek-longle lapen thang arki ta arjulongle; losei-heihei lapen gadha-heihei kokdong-dang lang lapen pehem-heihei, Siria atum ke-o asonthotsi halahei dokok-lang.

¹¹Laso abirta tonbang atum pachethang-lo lapen la rechohem ta lam palelo.

¹²La ajo lang bonta recho ahongplang pen thursi achakri atum aphan pulo, “Siria atum kopisi kemangma ne nangthanlang! Halatum chini ladak akhim thurlo pu, lasi latum amukam che-obupsi rong anat chepatu damjoilo. Halatum mathalo etum an keridamjisi rongsopi opo anke latum etum aphan reng-et-et enep-longsi rongsopi cheraidetpo.”

¹³La achakri inut abang thak-lo, “Jat seta laso arongsopi arat atum ke vir nangpo, hala kethitang atum ason-thakthak. La apotsi kesatang alosei jon pho pen pen ajehak amonit eli toilanglang lonang, anke kopisi plang-lo ma eli chinilongpo.”

¹⁴Halatum ajehak amonit ingvailo lapen Siria aron-armu kopi cheplang-loma la kechiniji aphan recho ajehak amonit lapen aronhemkonglong humni toisi pinkhatdun pamelo.

¹⁵Pinso atum Jordan an damlo, lapen halatum kekat ahut Siria aso kevar tekang ape-ari lapen risim tovar soding thek-long-lo. Anke halatum nangchevoisi recho aphan halatum kelong alam pachinilo.

¹⁶Samaria arat atum damprup-lo lapen Siria amukam amar kedo-an van-et-lo. HEMPHU kepu asonsi akemenei asoktipli lin thom mate soktipliso lin throk an rup edum pen namlong-lo.

¹⁷La lapuson plang-lo Israel arecho ahonbang aphansi rongsopi anghap ahemphu bat-lo. Laso achakri aphuthak Elisha laphan recho pen kelangdam ahut kemontri atengsi rat atum laphan sak-rin rin amat dongbop-lo.

¹⁸Recho aphan Elisha pulo, halaso ahut an puthot arni akemenei asoktipli lin thom mate soktipliso lin throk anam Samaria along rup edum anam pen jorlongji,

¹⁹laso aputhak chakri abang thak-lo, “La plang un-e, HEMPHU amethang amat sok-sang non amat nangtoi seta!” Lapen Elisha thak-lo, “La nang thek-longpo, bonta laso a-an nangke cholongle.”

²⁰Lasonsi laphan plang-lo la thilot-lo rongsopi anghap along rat atum dongbop-lo.