Read Karbi 2 RECHO 8 Bible Online

2 RECHO 8 - Karbi bible

2 RECHO 8

¹Shunem along kedo a-arloso asopo aphan Elisha parengthulo lapen bangpi aphan pulo, “Det adang ningkan 7 HEMPHU akhim nangtoiji, lapen bangpi ahemtun pen che-osi along kaprek dodam nangji.”

²La kepinkhat alam bangpi kroilo lapen ahemtun pen pen Philistia adet ningkan 7 dodamlo.

³Ningkan 7 jutsi, bangpi Israel anat nangchevoilo lapen hem-rit kechelangthujira lapen kehangdamjisi recho along bangpi damlo.

⁴Bangpi recho abang Elisha aban Gehazi pen kechingkibom thek-long-lo; recho ke Elisha manghumeme akam alam kechiniji ninghang-lo.

⁵Kosonsi Elisha kethi abangphan keparengthu loma laso alam recho aphan Gehazi kethanbom ahut, bangpi abang recho aphan choningrilo. Laphan Gehazi pulo, “Recho lahelo a-arlosolo, lapen Elisha keparengthu abangpi asopo lahelo!”

⁶Recho akarju thaksi bangpi Gehazi alam pathirlo, lasi recho kepangri abangphan hangsi la aphan pulo, “Bangpi amar an lapen bangpi ke-o ningkan 7 ahut longle pen kelong asok athe anam an voi nangji.”

⁷Siria arecho Benhadad aphu keso ahut Elisha ephong Damaskas anat damlo. Elisha hadak do pu alam recho aphan pachinisi,

⁸Hazael, la achakri aphan la pulo, “Isi adan montri aphan ponpira ne mejima memema HEMPHU aphan parjutha.”

⁹Lasi ka-ut jon 40 athak Damaskas along akemenei kelong an amar arthangsi Elisha along damlo. Laphan Hazael chetongsi pulo, “Nangliban Benhadad Recho alangli akeso mejima memema karjujisi neliphan nanglilong toilo.”

¹⁰Elisha thak-lo, “HEMPHU neliphan paklang-lo alangli thipo; seta damra meji pule laphan thannon.”

¹¹Anke Elisha laphan pherememe akelang pen Hazael amahang chetevarvetik lang-lorlo. Menmen Elisha amekkri busi chirulo.

¹²“Nangli kopi apotsi kechirulo, akehai?” Hazael arjulo. Pima nang Israel arat aphuthak akechenek pherememeji, la ne chinilo, Elisha thak-lo, “Halatum apairaikom-heihei nang me kaiji, halatum akemenei ariso atum aphan pathiji, halatum a-osomar atum aphan varbop-bopji lapen reng angsese a-arloso atum apok siridakji.”

¹³Lapu-an ajakongkethe neli kosonsi keplangpo? Hazael arjulo. “Neli thangta kali!” HEMPHU nephan nepaklang-lo nang Siria arecho plangpo, Elisha thak-lo.

¹⁴Benhadad along Hazael chevoi-thulo, lapen laphan arjulo, “Elisha kopisi kepulo?” La neliphan nethanlo nangli mevekji, Hazael thak-lo.

¹⁵Bonta puthot arni Hazael pe epak ensi lang nimlo lapen recho amahang dipsi pathilot-lo. Hazael lasi Benhadad alar Siria arecho plang-lo.

¹⁶Israel arecho Ahab asopo Joram recho kecho pho aningkan ahut, Jehoshaphat asopo Jehoram Judah arecho plang-lo,

¹⁷ningkan 32 arta ahut, lapen la Jerusalem along ningkan 8 pangrilo.

¹⁸La apiso ke Ahab asopilo, lapen Ahab ahemtun kehingno atovarsi rimlo. La HEMPHU aphan langplotsi pap klemlo,

¹⁹bonta Judah aphan HEMPHU pavirdetji ingtungte, pima la aban David aphan chechak-lo, la aso-asusi kaita pangriverpo pu.

²⁰Jehoram kepangri ahut Edom atum Judah abethurlo lapen isi recho-arat kangthim plang-lo.

²¹Lasi Jehoram la kedo-an aronhemkonglong pen Zair anat barlo, hadak Edom aron-aso atum latum aphan kompet-lo. Ajo angbong la lapen la aronhemkonglong kardon abang kat bor-isi chepajok-lo, lapen la aron-aso atum anta ahem anat chepratseilo.

²²Halaso arni pen Edom, Judah arideng pen kaita jokvanlo. Laso aningkan amat Libnah arongsopi asor ta thurpak-lo.

²³Jehoram keklem akam asontin Judah Arecho Atum Aphurkimo aloh along tok-et-lo.

²⁴Jehoram thilot-lo, lapen David Arongsopi recho athiri alongsi pipbup-lo, lapen la asopo Ahaziahsi la alar recho cholo.

²⁵Israel archo Joram, la Ahab asopo recho kecho krehini aningkan ahut Jehoram asopo Ahaziah, Judah arecho plang-lo,

²⁶la arta ningkan 22 ahut lapen la Jerusalem along ningkan isi pangrilo. La apei Athaliah, Ahab asopi lapen Israel arecho Omri asupi.

²⁷Piso ke-en pen ajok Ahab Recho pen Ahaziah chephotang-lo. La Ahab ahemtun keklemtang asonthotsi HEMPHU aphan langplot pen pap klemlo.

²⁸Ahaziah Recho ta Israel arecho Joram pen chelangsi Siria arecho Hazael abethursi ron chedanlo. Gilead alongri Ramoth alongsi ron chedanlo, lapen Joram abang ron along areng sodak-lo.

²⁹La areng keso pen kemeji aphan la Jezreel arongsopi chevoilo, lapen hadak Ahaziah laphan kelangjisi damlo.