Read Karbi 2 RECHO 9 Bible Online

2 RECHO 9 - Karbi bible

2 RECHO 9

¹Halabangso ahut montri atum angbong inut ariso aphan Elisha montri hang-lo lapen laphan pulo, “Chesik-ra Gilead alongri Ramoth along damtha. Laso jit ajangthu nanglong cheponnon,

²lapen hadak lelote Jehoshaphat asopo lapen Nimshi asupo Jehu aphan rinon. Ajirpo atum pen kedovet angdeng anat pondet-ra,

³aphu athak laso jit jangthu dungnon lapen punon; ‘Nangliphan Israel arecho keplangji aphan HEMPHU-si jangthu patip-lo lapen pachethang-lo.’ Anke un an paprap-ra hadak obupnon.”

⁴Lasi montri riso Ramoth damlo,

⁵hadak ron ahemphu atum amei kedo thek-long-lo. La pulo, “Akehai, neli nangliphan birta isi do.” Jehu arjulo, “Nelitum angbong komat aphansi nangli kehang-lo?” Nangliphan, akehai, la thak-lo.

⁶Anke halatum banghini arludamlo, anke montri riso abang Jehu aphuthak jit ajangthu dung-lo lapen laphan pulo, “Israel a-Arnam HEMPHU pachethang-lo: ‘Ne nangphuthak Nerat Israel arecho nangbat-lo.

⁷Nang hemphu recho aphan pathi nangpo, hala Ahab asopo aphan anke Ne montri atum aphan lapen akaprek Neban atum aphan kepathi alar Jezebel aphuthak aduk pilongpo.

⁸Ahab ahemtun kedo-an atum thi nangji; la ahemtun pinsomar kedo-an kebinon kesarnon.

⁹Israel arecho Jeroboam ahemtun lapen Israel arecho Baasha aphan Ne keklem asonthotsi laphan ta Ne inghoipo.

¹⁰Jezebel aphan papippelo; bangpi abang arpum ke Jezreel along methan atumsi pachodetpo.’” La pudet aphi, montri riso angdeng osi katjuilo.

¹¹Jehu ari-sangho achakri atum along chedamthulo, halatum arjulo, “Kemesen abirta ma? Laso aningklui ariso nang pen kopi akamlo?” La kopisi kemangjima nangtum chinilo, pusi Jehu thak-lo.

¹²Kali, netum chinine! halatum thak-lo, “la kopisi kepuma nethantha!” La nephan pulo, HEMPHU pachethang-lo, “Nangphan Ne Israel arecho batsi jangthu patip-lo.”

¹³Menmen Jehu asangho chakri atum pe athak keparjapjisi dongkam athaksi halatum ape-heihei limjamlo, pong-ut but-lo, lapen hang-lo, “Jehu recholo!”

¹⁴Joram Recho abe Jehu thurlo, la Jezreel along keso chelangdamlo, Siria arecho Hazael pen Ramoth aron along kechedan ahut kepho amek.

¹⁵Lasi Jehu achakri atum aphan pulo, “Nangtum jongsi nebe pulote, Jezreel arat kepachereji aphan baduta Ramoth pen pakatkedet nang.”

¹⁶Anke la amethang ron ahemkonglong charlusi Jezreel anat barlo. Joram keso memelang, lapen Judah arecho Ahaziah ta hadak laphan kelangdamsi dolo.

¹⁷Inut tonbang Jezreel along kelang apaisong pen langsi Jehu lapen amonit atum kevangbom thek-long-lo. “Ne ajehak amonit atum losei pen kevang thek-long-lo!” pusi la hang-lo. Joram thak-lo, “Losei kardonbang toira latum jirpoma hotur atum ma birta pa-ennon.”

¹⁸Pherangke abang Jehu anat losei ardonponsi laphan pulo, “Nangli jirpo asontong kevangma, recho chini ingtung-lo.” La nangkam kali! Jehu thak-lo, Nephile nangdunnon. Kelang apaisong along kedo atonbang than pachinilo pherangke abang lelo seta nangchevoive-det-lo.

¹⁹Anut kaprek apherangke toithulo, lapen aphrang abang asonthotsi arjulo. Ako Jehu thak-lo, “La nangkam kali! Nephile nangdunnon.”

²⁰Puthot tonbang than pachini thulo pherangke abang lelo, seta nang-chevoive-det-lo. Lapen la puthulo, “Songjabang amethang aronhemkonglong pangchamjam asonsi hemkonglong pangplong-lo lapen la Jehu asonthot!”

²¹Ne ron-hemkonglong siktha, Joram Recho hukum pilo. La klemlo, la lapen Ahaziah rechota ardonsi barlo, abangphutinta amethang aronhemkonglong chardonrep-lo, Jehu aphan kechetongjisi damlo. Naboth ahidi alongsi laphan halatum chetong-lo.

²²Nangli akeme akam aphantong kevangma? laphan Joram arjulo. Kopusonsi akeme akam aphan jilangma, Jehu thak-lo, “Elitum adet majakanghoi atum lapen nanglipei Jezebel kecheng tekang akumlin kardom keburuipile?”

²³La pacherailo, Ahaziah! pusi Joram hangser amat ahemkonglong chetevarsi kat-lo.

²⁴Jehu athai aso che-ensi ajakong kedo-an pen Joram anung ap plotsi angthin an palengplot-lo. Ahemkonglong along amat Joram krepbupsi thilot-lo,

²⁵Jehu adun rapbang Bidkar aphan pulo, “La abang arpum enra Naboth ahidi ajo la vardam chornon. Chemathatha nang pen ne Joram Recho apo Ahab aphan HEMPHU lasonsi pulo:

²⁶‘Patumi amat vi kethek-long ason thak-thaksi, Naboth lapen la asopo atum aphan apran karmut Ne thek-long-lo. Ne semetang-lo nangphan aduk-pivekji ladak laso ahidi along amat.’ Lasi Joram abang arpum ponnon, “ adun rapbang aphan Jehu hukum pilo, “Lapen Naboth ahidi along la var-dam chornon, anke HEMPHU aseme plengpo.”

²⁷Kopi plang-loma Ahaziah Recho thek-longpamelo, lasi Beth Haggan arong anat la ahemkonglong chardonsi kat-lo, aphi aphi Jehu hungdunlo. “La aphanta pathilotnon!” amonit aphan Jehu hukum pilo, lapen halatum laphan Ibleam arong adung Gur atovar karludam anat la ahemkonglong kepangplong ahut areng pasolo. Bonta la Megiddo arongsopi leletik dambomlo, hadaksi la thipinlo.

²⁸La achakri atum la abang arpum hemkonglong ehum pen Jerusalem anat pondet-lo, lapen David Arongsopi recho athiri along laphan pip-lo.

²⁹Israel arecho Ahab asopo Joram recho kecho kre isi aningkan ahutsi Ahaziah Judah arecho plang-lo.

³⁰Jezreel along Jehu nanglelo. Kopi plangtang-loma Jezebel arjulongsi, amekkung chehilo achu chingsok-lo lapen rechohem anghapso pen tovar anat arum langsi arjapding-lo.

³¹Jehu inghap pen kevang thek-longsi bangpi hang-lo, “Nang Zimri! Prankarmut abang! Nang kopisi ladak kevang-lo?”

³²Jehu angsong langsi hang-lo, “Nebe komatma?” Inghapso pen chakri atum laphan arum lang-lo,

³³lapen halatum aphan Jehu pulo, “Bangpi aphan arum nangvarchor non!” Halatum bangpi aphan arum nangvarlo, lapen bangpi avi arpong lapen losei anat chingdat-lo. Bangpi abang arpum athak Jehu alosei lapen ahemkonglong pakoisi

³⁴rechohem lut damlo lapen an esan cholo. La an aphi si la pulo, “Ahirjuno kepho a-arloso aphan ponra bangpi aphan pipnon; jat seta bangpi inut recho asopilo.”

³⁵Bonta bangpi aphan kepip damji atum bangpi aphu-bongkorok lapen ari-akeng arrepi pen thangnatta longledet-lo.

³⁶Halatum Jehu aphan laso alam than pachini ahut, la pulo, “Lason helo keplangjipu HEMPHU la aban Elijah pen ajok paputoilo: Jezreel along Jezebel abang arpum methan atumsi chodetpo.

³⁷Hadak bangpi abang achet hi asonsi hijikchoji, anke baduta halahei pangthek thekthedetpo.”