Read Karbi 1 PHURKIMO 10 Bible Online

1 PHURKIMO 10 - Karbi bible

1 PHURKIMO 10

¹Gilboa anglong along Philistia atum Israel aso pen ron chedanlo. Hadak ongdung a-Israel aso aphan pathilo, lapen ahin atum Sol Recho lapen la asopo atum anta kat-et-lo.

²Bonta halatum aphan Philistia atum nepdunlo lapen Sol asopo bangkethom, Janathan, Abinadab lapen Malkishua aphan pathilot-lo.

³Sol adung-arei ron kechedan sikpik-lo, lapen laphan hotur athai aso apchok-lo lapen areng sodak-lo.

⁴La arisim kepon abang ariso aphan alangli pulo, “Nang nokjir chesanra nephan pathilotnon, la arnamkave a-Philistia atum nephan kepathi pen pajokpo.” Bonta riso abang la keklemji pherelo. Lasi Sol amethang anokjir chesansi la athak kreplut-lo.

⁵Riso abang Sol lason kethi thek-longsi lata amethang anokjir aputhak krep-lutsi thilot-lo.

⁶Lasonsi Sol lapen la asopomar bangkethomta thirapppet-lo lapen la aso-asu atum det pangri longledet-lo.

⁷Jezreel Arlok kedo a-Israel aso atum ron-armu kebe lapen Sol lapen la asopo atum thitang-lo pu arjulongsi latum amethang arong-heihei che-osi kat-lo. Anke Philistia atum vangsi lahei adim cherailo.

⁸Ron puthot arni Philistia atum sokthe kephangnojisi damlo, lapen latum Sol lapen la asomar abang arpum-heihei Gilboa Anglong angsong tiche thek-long-lo.

⁹Latum Sol aphu bengpetsi la arisim do-anta phlok-et-lo, lapen Philistia adang an halatum akumlin-heihei lapen arat aso aphan birta keme kepathanjisi pherangke atum aphan toilo.

¹⁰Latum la arisim-heihei halatum akardomhem arlo bilo lapen la aphu ke kardomhem arlo halatum a-arnam Dagon angnosi vek-lok-lo.

¹¹Gilead alongri Jabesh arat atum Sol aphan Philistia atum keklem alam arjulongsi,

¹²angthin kethenei amonit atum damsi Sol lapen asomar abang arpum endamdetsi Jabesh anat vandet-lo. Latum lahei hadak Terabin arong arum pip-lo lapen nithroksi an an-humlo.

¹³Sol thinang-lo, pima la HEMPHU aphan kroithip thekthedet. La HEMPHU ahukum-heihei kroikrelo; la HEMPHU aphan arjujesi kethitang atum akarjong pen chingkisi keja chorilo,

¹⁴lasi HEMPHU laphan pathilot-lo lapen det kelang akam Jesse asopo David aridengsi HEMPHU hodaidet-lo.