Read Karbi 1 PHURKIMO 11 Bible Online

1 PHURKIMO 11 - Karbi bible

1 PHURKIMO 11

¹Israel arat kedo-an David along Hebron damsi laphan pulo, “Nelitum nanglidon-nanglirap atumlo.

²Kedamtang Sol nelitum arecho keplang un ahut, nanglisi Israel arat aphan ron japonlo lapen nangli Arnam HEMPHU-si nangliphan laso arat aphan japo lapen halatum kepangri abang plangpo pu Arnam chak-lo.”

³Lasi Israel ajalin atum David along Hebron vang-lo. Halatum pen alangli isi kangthir-et ajalang pathik-lo, laphan halatum jangthu hilo lapen Samuel pen ajok HEMPHU kechak atengsi la Israel arecho plang-lo.

⁴David Recho lapen Israel aso kedo-an damsi Jerusalem arongsopi tengkheng-lo. Halaso ahut la Jebusi lapen Jebusi asor pusi chethang-lo, latum helo hadak kedobarim atumlo.

⁵David aphan Jebusi atum rongsopi arlo nanglut longle pusi pulo, bonta halatum kechepachong a-Zaion apaisong David cheraidet-lo, lapen la “David Arongsopi” pusi chethang-lo.

⁶David pulo, “Jebusi atum aphan kepathicheng abangsi ron apinpo plangpo!” Zeruiah asopo Joab ketengkheng japonsi la ron apinpo plang-lo.

⁷Pima David chepachong adim anat kedo damjisi damlo, la “David Arongsopi” pusi amen chethang-lo.

⁸Nihang Anglong anat longle kepapleng nangji adim pen pangchengsi alangli rongsopi kimthulo, lapen Joab si ahin kedolang arongsopi adim-heihei kimthulo.

⁹David ingtang ponbomlo, pima Jakongkethenei HEMPHU alanglilong dolo.

¹⁰David anong kedohu aron-aso amen lahei helo. Israel ahin arat atum penpen HEMPHU kechechak ateng laphan recho kepachojisi latum rapdunlo, lapen la adet latum pangtang-lo.

¹¹Kechengsi Hakmon aro pen Jemhobeam, la “Bangkethom ” ajalinlo. La achir pen bang pharo kethom amonit aphan chedanlo, lapen ron along halatum aphan pathi-et-lo.

¹²“Bangkethom” angbong adun anong kechethanghu abang ke Ahoh aro Dodo asopo Eleazar helo.

¹³Pas Dammim aron along Philistia atum abe thursi la David anat ron chedanpilo. Israel atum kekat ahut la soktipli ahidi ajosi do,

¹⁴Lasi la lapen la amonit atum hidi angbong arjapthipsi Philistia atum pen ron chedanlo. HEMPHU laphan pahaidet khangjang-lo.

¹⁵Adullam alongku adung David kedo alongchong anat arnisi adung bangkethom atum damlo, halaso ahut esong a-Philistia atum Rephaim Arlok along mukam chekimlo.

¹⁶Halaso ahut David ke isi pairaikom anglong si do, lapen esong a-Philistia atum Bethlehem cheraidet-lo.

¹⁷David ahem chingtungsi pulo, “Bethlehem anghap along alangtuk pen ne kejunji aphan lang inutbak nevanpi asonte ko-an akemeji apot-lo!”

¹⁸Bangkethom anong kechethang anokbe atum Philistia atum amukam hatsi damlo, lapen langtuk pen lang ajehak soksi la David along vanlo. Bonta alangli la junjedetsi la HEMPHU aphan isi athok paplangsi dung-et-lo,

¹⁹lapen pulo, “Ne la junnolo! La kejun ke apran kechesongdut amonit atum avi kejun asonpo!” Lasi alangli junmolo. Lahei helo bangkethom anokbe atum angthinkethe akam-heiheilo.

²⁰Joab akorte Abishai helo “Bangthomkep ” anong kedohu atum ajalinlo. La achir pen inutvet bang pharo kethom amonit atum pen chedanlo lapen halatum aphan pathi-et-lo, lapen “Bangthomkep ” angbong pen anong chethangneilo.

²¹Alangli bangthomkep angbong pen anong kechethangneilo lapen halatum ajalin plang-lo, bonta la hala bangkethom atum an anong chethangthe.

²²Kabzeel pen Jehoiada asopo Benaiah ta inut anong kechethang anokbelo; la ongdung angthinkethe akam klem-olo, Moab aso ron kechedanthekpo banghini aphanta alangli pathilo. Alangli ephong ar-e kelok keklo ahut hilik anat hirdamsi hingho ejon pathilo.

²³Ingrup phli kangtui ajon keding a-Ijip aso thepo aphanta pathilo, hala achir thepik laphan Benaiah chong epak pen tengkheng-lo. Ijip aso arideng pen achir thijoksi la pen amat halaphan pathilot-lo.

²⁴Halahei helo Benaiah bangthomkep angbong pen inut angthin kethe akam keklem abang-lo.

²⁵Bangthomkep angbong pen alangli helo anong kelitsong abangphulo, bonta la “Bangkethom” atum ason an anong chethangthe. Laphan David angphun kerai ahemphu bat-lo.

²⁶Akaprek kelitsong anokbe atum lahei helo: Joab amu Asahel, Bethlehem pen Dodo asopo Elhanan,

²⁷Harod pen Shammoth, Pelet pen Helez,

²⁸Tekoa pen Ikkesh asopo Ira, Anathoth pen Abiezer,

²⁹Hushah pen Sibbekai, Ahoh pen Ilai,

³⁰Netophah pen Maharai, Netophah pen Banah asopo Heled,

³¹Benjamin alongri Gibeah pen Ribai asopo Ithai, Pirathon pen Benaiah,

³²Gaash arlok-heihei adung pen Hurai, Arbah pen Abiel,

³³Bahurum pen Azmaveth, Shaalbon pen Eliahba,

³⁴Gizon pen Hashem , Harar pen Shagee asopo Janathan,

³⁵Harar pen Sakar asopo Ahiam, Ur asopo Eliphal,

³⁶Mekerah pen Hepher, Pelon pen Ahijah,

³⁷Karmel pen Hezro, Ezbai asopo Naarai,

³⁸Nathan akorte Joel, Hagri asopo Mibhar,

³⁹Ammon pen Zelek, Beeroth pen Joab arisim kepon abang Naharai,

⁴⁰Jattir pen Ira lapen Gareb,

⁴¹Hitti aso Uriah, Ahlai asopo Zabad,

⁴²Shiza asopo Adina (Reuben akhei abangphu inut ajalin, amethang asong bang 30 aron-aso do.)

⁴³Maakah asopo Hanan, Mithan pen Joshaphat,

⁴⁴Ashterah pen Uzziah, Aroer pen Hotham asopo Shamma lapen Jeiel,

⁴⁵Tiz pen Shimri asopo Jediael lapen Joha, Mahavah pen Eliel,

⁴⁶Elnaam asopo Jerbai lapen Joshaviah, Moab pen Ithmah,

⁴⁷Zobah pen Eliel, Obed, lapen Jaasiel.