Read Karbi 1 PHURKIMO 12 Bible Online

1 PHURKIMO 12 - Karbi bible

1 PHURKIMO 12

¹David Ziklag alongsi do hadak la Sol Recho arideng pen chepajokjisi damlo,

²Hadak ongdung kethekpame, chikiklong aron-aso, Benjamin akhei abangphu atum chelangdun-lo, Sol ta laso akhei lo. Latum thai jothek lapen ar-e mate arvi penta sirkang pen arlong varthek.

³Latum Gibeah pen Shemaah asopo Ahiezer lapen Jos ahukum abersi klemlo. Ron-aso atum lahei helo: Azmaveth asopo Jeziel lapen Pelet, Anathoth pen Berakah lapen Jehu,

⁴Gibeon pen Ishmaiah, inut anong kechethang aron-aso lapen Bangthomkep angbong inut ajalinlo. Jeremiah, Jahazeel, Jehonnan, lapen Jozabad atum Gederah arong pen lo.

⁵Eleezai, Jerimoth, Bealiah, Shimariah, lapen Shephatiah atum Hariph penlo.

⁶Elkanah, Isshiah, Azarel, Joezer, lapen Jemhobeam, Korah aro penlo.

⁷Gedor pen Jeroham asopo Joelah lapen Zebadiah.

⁸Anong kechethang kethekpame aron-aso Gad akhei pen David aron-asong along la kejejangtang ajo apairaikom along kedo ahut kechelangdun atum amen lahei helo. Latum hingho ason kelang pherememe lapen inglong athijok ason kechat asonthot latum chong lapen chir-heihei pen kechedanthek-pame atumlo.

⁹Latum aphai angthun lahei helo: Ezer, Obadiah, Eliab,

¹⁰Mishmannah, Jeremiah,

¹¹Attai, Eliab,

¹²Johanan, Elzabad,

¹³Jeremiah lapen Makbannai.

¹⁴Gad akhei pen ajehak amonit atum chakri barim plangsi suri angbong akethe plang-lo, lapen akaprek bangpharo angbong achakriso plang-lo.

¹⁵Ningkan angbong kecheng achiklo, Jordan Aroi la akung anta Kangbak-ri ahut latum langroi vekpet-lo, langroi parai a-arlok nihang lapen nichi anat kedo arat aphan papratseilo.

¹⁶Ephong Benjamin lapen Judah akhei pen esong amonit atum David kedo apairaikom along damlo.

¹⁷Latum aphan kechetongdam jisi David damlo, lapen pulo, “Nangtum jongsi jirpo ason neliphan nekerapjisi kevang-lo pulote, ladak nanglitum aphan phalo. Nang chelangdun non! Bonta nanglitum jongsi neli hotur anat neliphan pachobeiji pulote, neli nanglitum aphan paphosetji bor-i-e seta nangliphusar atum a-Arnam la chini lapen nanglitum aphan adukpipo.”

¹⁸Halatum angbong inut aphan Arnam akarjong plengset-lo, la Amasai, aphi “Bangthomkep” angbong ajalin keplang abang la pulo, “Jesse asopo David, nelitum nangli monit-lo! Nanglikam kepachun lapen nangli kerapji atumlo! Arnam nanglinat dolo.” Latum aphan David hang-lo lapen la aron-armu achakri halatum aphan bat-lo.

¹⁹Lapen Sol Recho aphan kechedanjisi Philistia atum penpen kedam un ahut Manasseh akhei pen ajehak ron-aso atum David abe dunlo, jalangdunlo. Abinong-et ke alangli Philistia atum aphan rapdunde, pima halatum arecho atum la aphrang ahemphu Sol anat dosi pachobeidetji pusi pherelo, lasi laphan Ziklag anat toithujuilo.

²⁰David kechevoi ahut Manasseh pen kejelangdun aron-aso amen lahei helo: Adnah, Jozabad, Jediael, Maikel, Jozabad, Elihu, lapen Zillethai. Manasseh along latum kedo-anta suri angbong akethe abangphulo.

²¹Latum David aron asong aputhak chakri asonsi alangliphan ingduk-lo, pima latum kedo-anta kelitdong aron-aso atumlo. Aphi latum Israel aron-armu aphuthak chakri plang-lo.

²²Arnivang asonthak-thaksi akemi amonit atum David asong along chelangdunlo, la ansi alangli aron-armu ongdapprang-lo.

²³David Hebron along kedo ahut, ongdung kethanlongtang aron-aso atum alangli aron-armu along chelangdunsi Sol alar alangliphan recho kepachoji aphan rapdunlo. Halatum aphai lahei helo:

²⁴Judah: bang 6,800 risim kedo amonit chong lapen chir-heihei kedo atum,

²⁵Simeon: bang 7,100 kethan-pametang amonit.

²⁶Levi: bang 4,600 amonit;

²⁷Jehoiada, Aaron asu along bang 3,700 amonit.

²⁸Zadok adon-arap, kechedanthek ariso atum: bang 22;

²⁹Benjamin (Sol amethang akhei) bang 3000 amonit (ongdung a-Benjamin amonit atum Sol aphansi ingdukbomlang);

³⁰Ephraim: Bang 20,000 amonit amethang aro along anong kechethangtang atumlo;

³¹Nichi a-Manasseh: David aphan Recho kepaplangji aphan kangvaitang bang 18,000 pinso amonit atum padamlo.

³²Issakar: Bang 200 ajalin, pen halatum aber kedo amonit atum (lahei amonit Israel atum kopi apor ahut kopi klemnangjima latum chinipamelo);

³³Zebulun: Bang 50,000 kekroipame lapen chikiklong, ron kechedan aphan chesik pame amonit atum, jat arisim penta kechedanthek amonit atumlo.

³⁴Naphtali: Bang 1000 ajalin penpen bang 37,000 risim kedo amonit, latum chong lapen chir-heihei do.

³⁵Dan: Bang 28,600 kethanlongtang amonit.

³⁶Asher: Bang 40,000 ron kechesikding amonit;

³⁷Jordan anihang akhei-heihei lake Reuben, Gad, lapen nihang a-Manasseh: Bang suri 120 jat arisim tame kerimthek amonit atumlo.

³⁸Lahei aron-aso kedo-anta ron aphan chesikdingsi David aphan Israel kedo-an aphuthak Recho kebatjisi mathathipsi Hebron anat damlo. Israel ahin arat atum anta la isivet aphansi aning chingripet-lo.

³⁹Hadak David along latum nithom pangthang-lo, arong asor keselam ason pen chobom, junbomlo.

⁴⁰Nirep akhei Issakar, Zebulun lapen Naphtali pen rat atum Gadha-heihei, ka-ut-heihei, losei-heihei lapen chainong alo-heihei athak sok-sang-heihei aduk, thebo, drakha akreng, drakha ahorlang lapen jit ajangthu-heihei thongsi vanlo. Latum chainong lapen biresak kechoji aphan vanlo. Lahei det adang aning arong chepaklang angthek-lo.