Read Karbi 1 PHURKIMO 13 Bible Online

1 PHURKIMO 13 - Karbi bible

1 PHURKIMO 13

¹Bangsuri lapen bangpharo ahemphu achakri kedo-an pen David Recho chingvailo.

²Ansi la Israel arat kedo-an aphan pachethang-lo, “Nanglitum jongsi nang chedondun lote, lapen la HEMPHU Arnam aning kehang-lo pulote emonit rong asor kedo-an aphan, kurusar atum lapen Levi atum arong kedo-an pherangke atum aphan eli toi pen halatum ladak etum along pachingrumpetji aphan pathan-dam lonang.

³Anke eli damsi Sol recho kecho ahut kelongle Arnam Kechejok Asinduk endam lonang.”

⁴Laso alam rat atum aningdok-hurlo lapen chedondun-sarlo.

⁵Lasi Kiriath-Jearim pen Jerusalem along Kechejok Asinduk kevanji aphan Ijip ahoi nijang pen Hamath atovar nirep anat det adang kedo-an arat aphan David pachingrumlo.

⁶David lapen rat atum Baalah arongsopi anat damlo, la Judah alongri Kiriath Jearim anat Arnam Kechejok Asinduk ke-endamji aphanlo, athe la along HEMPHU amen arveng kedo api-heihei athaksi dolo.

⁷Abinadab ahem along latum Kechejok Asinduk vanlo, lapen hemkonglong kemi athak la bat-lo,

⁸laso ahut David lapen rat kedo-an atum Arnam aphan man kepijisi aninghang an kanlo. Latum lun lunsi kumbeleng, cheng-heihei, prakso-heihei lapen muri thip-lo, vut-lo.

⁹Chidon along sok kesi adim nanglesi, chainong akeng patekungtut amat Uzzah ari chejotsi Kechejok Asinduk ot damdong-lo.

¹⁰Menmen Uzzah aphan HEMPHU aningthisi Sinduk ke-ot apot laphan pathilot-lo,

¹¹lapen halaso arni pen laso adim Perez Uzzah amen irlo. Uzzah aphan HEMPHU aningkethi apotsi David ta aning oilak-lo.

¹²Anke Arnam aphan David pheresi pulo, “Non ne kopisi Kechejok Asinduk nelong keponthekpoma?”

¹³Lasi David la Jerusalem ponpedet-lo. Lapen la Obed Edom pu amen inut Gath arongsopi asor ahem la tekangbup-lo.

¹⁴La hadak chiklo jonthom dolo, lapen Obed Edom ahemtun aphan lapen la kedo-an asontin amar aputhak HEMPHU pahirjumelo.