Read Karbi 1 PHURKIMO 14 Bible Online

1 PHURKIMO 14 - Karbi bible

1 PHURKIMO 14

¹Tair arecho Hiram isi kejor-kenam akam alam David aphan loh nang-lolo; alangliphan la kedar athengpi lapen arlong aphlak lapen rechohem kekim abangphu atum ta nang-lolo.

²Lasi David chechinilo HEMPHU si alangliphan Israel arecho kepachoji pathirtang-lo lapen alangli arat ajok laphan det pachingthurlo.

³Jerusalem along ongdung apiso David pangrilo lapen asopo asopi do-olo.

⁴Jerusalem along lahei a-osomar laphan mahangthekpilo: Shammua, Shobap, Nathan, Solomon,

⁵Ibhar, Elishua, Elpelet,

⁶Nogah, Nepheg, Japhia,

⁷Elishama, Buliada, lapen Eliphelet.

⁸Non David aphan Israel adet kangthim arecho battang-lo pu Philistia atum arjulongsi laphan kepanepjisi halatum aron-armu damlo. Lasi David halatum aphan kechetongjisi barlo.

⁹Philistia atum Rephaim Arlok along nanglelo lapen Hormu kethipon pangcheng-lo.

¹⁰Arnam aphan David arjulo, “Ne Philistia atum aphan tengkheng non ma? Nang nephan pahaivekjima?” HEMPHU thak-lo, “Tengkhengnon! Ne nangphan nang pahaipo!”

¹¹Lasi Baal Perazim along halatum aphan David tengkheng-lo lapen halatum aphan paremdet-lo. Alangli pulo, “Arnamsi nephan hotur aputhak langthepi ason kepapratji aphan nerimlo. “ Lasi laso adim Baal Perizim pusi irlo.

¹²Philistia atum kekat ahut halatum akumlin aphi che-otekangbup-lo, lapen David halahei kepaphrindutji aphan hukum pilo.

¹³Philistia atum Arlok chevangthu dapprang-lo lapen puthot mar kethipon pangcheng-lo.

¹⁴Puthot aphong David Arnam aphan arjulo, “Halatum aphan ladak pen tengkheng-ri bonta adung arei damra akaprek ahin Balsam-arong adung pen ketengkhengji aphan chesiknon.

¹⁵Thengpi angsong nangkebar arki arjulong-lote, anle tengkheng non, pima Philistia aron-aso aphan keparemjisi Ne nangtum aphrang barpo.”

¹⁶Arnam hukum kepi atengsi David klemlo, lapen Philistia atum aphan Gibeon pen Gezer atovar soding phlung pachevoilo.

¹⁷David anong alongtin ta chethang-lo, lapen adettin ta HEMPHU laphan papherehurlo.