Read Karbi 1 PHURKIMO 15 Bible Online

1 PHURKIMO 15 - Karbi bible

1 PHURKIMO 15

¹Amethang aphan David Arongsopi along David hem-heihei kimlo. La Arnam Kechejok Asinduk aphanta adim isi sikpilo lapen laso aphan isi apehem parjap-lo.

²Anke la pulo, “Levi atumsi Kechejok Asinduk pon longchotji, pima latum aphansi la kepaponji lapen kaike laphan kepangdukji aphansi HEMPHU ingvailo.”

³Lasi kesiktang adim along Kechejok Asinduk Jerusalem along kevanji aphan David kedo-an Israel arat aphan phalo.

⁴Adunthu la Aaron asumar lapen Levi atum aphan phalo.

⁵Kohath a-Levi aro pen Uriel, la aro bang 120 abangphu ahemphu;

⁶Merari aro pen Asaiah, bang 220 ahemphu;

⁷Gershon aro pen Joel bang 130 ahemphu;

⁸Elizaphan aro pen Shemaiah, bang 200 ahemphu;

⁹Hebron aro pen Eliel, bang 80 ahemphu;

¹⁰lapen Uzziel aro pen Amminadab, bang 112 ahemphu atum vangpet-lo.

¹¹Kurusar Zadok lapen Abiathar lapen bangthrok a-Levi, Uriel, Asaiah, Joel, Shemaiah, Eliel, lapen Amminadab aphan David hang-lo.

¹²Levi atum aphan alangli pulo, “Levi atum aro ajalin nangtum helo. Nangtum lapen nangtum Levi akorte an chepangthir non, anke Israel a-Arnam HEMPHU a-Kechejok Asinduk laphan ne kesiktang adim nangtum van unpo.

¹³Pima aphrang aphong la keponji aphan nangtum ave lapen netum laphan karcho nangji ateng keklemkledet amat etum a-Arnam HEMPHU netum aphan adukpilo.”

¹⁴Israel a-Arnam HEMPHU Kechejok Asinduk kerung ponji aphansi kurusar atum lapen Levi atum chepangthirlo.

¹⁵Moses pen ajok HEMPHU hukum kepitang ason si Levi atum arphang pen halatum aphang athak chebatsi la ponlo.

¹⁶Cheng-beleng-heihei lapen prakso-heihei pen Levi atum ning arong alun kepalunjisi Levi ajalin atum aphan David hukumpilo.

¹⁷Lunse aro pen halatum bitoi aprakso kethipji aphan kangvai amonit lahei helo:

¹⁸Joel asopo Heman, la adon Berekiah asopo Asaph, Kushaiah asopo Ethan, Merari aro.

¹⁹Latum aphan kerapdunji aphan halatum ase kangtui akumbeleng kepardengji a-Levi atum aphan ingvailo.

²⁰Jekaariah, Jaaziel, shemiramoth, Jahiel, Unni, Eliab, Maaseriah lapen Benaiah.

²¹Ase kangdai akumbeleng kepardengji aphan latum lahei a-Levi atum aphan ingvailo: Mattithiah, Eliphelehu, Mikneiah, Azaziah lapen Kardomhemthepi tonbang atum, Obed Edom lapen Jeiel.

²²Kelun-kethip anat kethekser apotsi Chenaniah aphan Levi aduhuidi atum ahemphu ingvailo.

²³Berekiah lapen Elkanah, Obed Edom lapen Jehiah aphan Kechejok Asinduk kepaton abangphu ingvailo.

²⁴Shebaniah, Joshaphat, Nathanel, Amasai, Jekaariah, Benaiah lapen Elizer kurusar atum aphan Kechejok Asinduk angno pong-ut-heihei kebutji aphan ingvailo.

²⁵Lasi Israel ajalin lapen ron-armu ahemphu, David Recho, Kechejok Asinduk keponjisi Obed Edom ahem damlo, lapen latum isi thedung aketalon padolo.

²⁶Latum jon throksi achainong alo, lapen jon throksi abiresak Kechejok Asinduk kepon a-Levi atum aphan Arnam keparapdun jisi athok pilo.

²⁷Akemenei ahon kanglit ape pen keselam achoisi David chingthang-lo, lapen duhuidi atum antalo, halatum ajalin Chenaniah, lapen Kechejok Asinduk kepon a-Levi atum anta chingchoilo, arlo pe kanglit achoi ta David chingchoilo.

²⁸Lasi Israel kedo-an ning arong ase, pong-ut-heihei arki, anu apong-ut, lapen prakso arki lapen kumbeleng-heihei ate-ot ase pen pen Jerusalem anat an Kechejok Asinduk kevan along dunlo.

²⁹Sinduk rongsopi nanglutsi, Sol asopi, Mikal inghapso pen ardiksi David Recho kekan lapen aning arong akechon thek-longsi alangliphan bangpi abang aning dokde-pinlo.