Read Karbi 1 PHURKIMO 16 Bible Online

1 PHURKIMO 16 - Karbi bible

1 PHURKIMO 16

¹Latum David kesiktang apehem anat Kechejok Asinduk ponlo lapen la arlo bilo. Ansi latum athok-heihei pilo, lapen Arnam aphan kechelang athok pilo.

²David athok-heihei kepi pajutsi, la HEMPHU amen pen rat aphan pahirjumelo,

³lapen latum kadokave aphanta an pilo. Israel along kedo abangphutin apinso-arlo aphanta la him eplang lapen kementang a-ok ethan than lapen ajehak drakha akreng pilo.

⁴Kechejok Asinduk angno Israel a-Arnam HEMPHU aphan lun pen kero karcho kepajaji aphan David ajehak a-Levi atum aphan kam bak-lo.

⁵Asaph aphan kejalin abangphu bat-lo, la along Jekaariah pacherap-dunlo. Jeiel, Shemiramoth, Jehiel, Mattithiah, Eliab, Benaiah, Obed Edom, lapen Jeiel atum kumbeleng ardeng nang-lo,

⁶lapen kurusar banghini, Benaiah lapen Jahaziel atum Kechejok Asinduk angno aphongtin ta pong-ut but nangverlo.

⁷La David si Asaph lapen ajirpo a-Levi atum aphan HEMPHU aphan kero-heihei arpu kepicheng-lo.

⁸HEMPHU aphan kero pinon, la akethe pachethangnon; la kopi klemloma det-heihei aphan thannon.

⁹HEMPHU aphan kero alun lunnon; la manghumeme keklem akam-heihei thannon.

¹⁰La along eli dolo, ning cheparong non; laphan karcho atum an chehoknon!

¹¹HEMPHU aphan rinon lapen Alangli jakong; lapen kaiketa Alangli mahang rivernon.

¹²Arnam aban, nang Jakob asomar, Arnam kangvai Israel aso,

¹³Arnam manghumeme keklem lapen la kepi keparai ason ning chebitha.

¹⁴HEMPHU-ke e-Arnam; la ahukum pirthe adang aphan.

¹⁵La kepinchong kepadoverji Arnam a-Kechejok tengneri,

¹⁶Abraham lapen alangli Kechejok, Isaak aphan la kechak ason an.

¹⁷Jakob pen HEMPHU Kechejok, la kaiketa doverji.

¹⁸“Ne nangphan Kanaan adet nangpiji,” Alangli pulo, “La nangmethang cherailongpo.”

¹⁹Arnam arat ke aphai ong-e, Kanaan adet along det kaprek asor plang-lo.

²⁰Latum adet pen adet kaprek, isi arecho-arat pen akaprek arat damnang-lo.

²¹Bonta latum aphan Arnam pachenek longle; latum aphan keraijisi Alangli recho atum aphan papherelo.

²²“Ne kangvaitang Neban aphan pasungri, Ne montri atum aphan paphori.”

²³Pirthe adang HEMPHU aphan lun petnon! La epajoktang-lo pu abirta-keme arnivangta pachethangnon.

²⁴Alangli nong det-heihei aphan la akam kethe rat kedo-an aphan pachethangnon.

²⁵HEMPHU thedung lapen un an rovek nangji; kaprek arnam atum apar Laphan man pimuchot nangji.

²⁶Akaprek adet-heihei arnam atum ke kumlinchot, bonta HEMPHU ke sining-heihei thip-lo.

²⁷Adak atur lapen ahir-asang laphan komlo, jakong lapen ning arong la a-Kardomhemthepi plengset-lo.

²⁸Pirthe arat kedo-an, HEMPHU aphan ronon, la anong lapen ajakong ronon.

²⁹HEMPHU anong amen ronon; Athok-ajir vanra la a-Kardomhemthepi along vangnon. Alangli kangthir pen kecheklang ahut HEMPHU angno ingphun pakinon.

³⁰Pirthe adang laphan klemhurnon! Pirthe kedo adim pathirtang-lo, lapen terek un-elo.

³¹Pirthe lapen sining chehoknon! Det-heihei aphan HEMPHU-si recholo pu thannon.

³²Talo lapen la arlo kedo-an api lapen, hidi-heihei lapen la along asontin amar pachehoknang!

³³HEMPHU pirthe kepangriji kevang ahut ingnam athengpi chehoksi hangpo.

³⁴HEMPHU aphan kero pinon. Pima Alangli mesen; Alangli akanghon kaike dover.

³⁵Alangliphan punon, “Netum aphan nerainon, O nerai a-Bang; netum aphan nepangrum non, det-heihei pen netum aphan nepajoknon, anke netum choroverpo lapen Nangmen kangthir aphan roverpo.”

³⁶Israel a-Arnam HEMPHU aphan ronon! Alangliphan non lapen kaiketa ronon, anke kedo-an arat atum pulo, “Amen,” lapen HEMPHU aphan rolo.

³⁷Kechejok Asinduk kebi adim kaike aphan karchoji aphan David Rechosi Asaph lapen ari-asangho atum aphan pachehemphu toilo. Latum arnivangta hadak akam cheklem nang-lo.

³⁸Zeduthun asopo Obed-Edom lapen la aro pen bang 68 amonit atum halatum aphan rapdun nang-lo. Hosah lapen Obed Edom atum inghap-heihei keton ahemphulo.

³⁹Zadok kurusar lapen alangli ari-asangho kurusar atum Gibeon along HEMPHU aphan karcho akam chepahemphu lo.

⁴⁰Israel aphan HEMPHU kepi aron ateng pen adap arnikangsam latum athok-heihei arpum pen dovan athak phrin nang-lo.

⁴¹Hadak halatum along kedo atum Heman lapen Zeduthun lapen akaprek prekjek pen kangvaitang atum kaike dover. HEMPHU kanghon apot Alangliphan kero-heihei alun lun nang-lo.

⁴²Heman lapen Zeduthun atum pong-ut lapen prakso-heihei akam chepahemphuji lapen akaprek kelun ajohton-heihei kero kelun ahut rot-lo. Zeduthun aro abangphu atum inghap-heihei keton akam chepahemphulo.

⁴³Ansi abangphutin ta hem chedamlo, lapen David ta ahem asor pen ajehak apor kedodamjisi hem chevoilo.