Read Karbi 1 PHURKIMO 17 Bible Online

1 PHURKIMO 17 - Karbi bible

1 PHURKIMO 17

¹David Recho non alangli amethang rechohemsi chedolo. Arnisi la Nathan montri aphan hangsi laphan pulo, “Ladak ne kedar athengpi pen kekim ahemsi dolo, bonta HEMPHU Kechejok Asinduk ke pehem arlosi donang-lo!”

²Nathan thak-lo, “Nanglining kopisi kemathama klemnon, pima HEMPHU nanglilong dolo.”

³Bonta halaso aningve Nathan aphan Arnam pulo,

⁴“Damra Neban David aphan Nesi kepulo pura thandamnon, ‘Ne kedoji Kardomhemthepi kekimji abang nang kali.

⁵Ne Israel arat aphan Ijip arideng pen kepajok arni pen nonpu anta Ne kardomhem arlole kedo kali; Ne kaita pehemsi kedo lapen adim adim cheterekvoilo.

⁶Ne Israel arat pen kedamvoi ahut latum Ne kebattang ajalin inutbak aphan Nephan kopisi kedar pen keselam akardomhem neselampipe det-loma pu arjuje.’ ”

⁷Lasi Neban David aphan Ne HEMPHU, Kangtangnei a-Bangsi kepulo pura thannon, “Ne nangphan hidi abiresak kelang pen nangponlo lapen nangphan Nerat Israel aphuthak kepangri-abang nang pinchong-lo.

⁸Nang konatma kedam Ne nangdunkrilo, lapen nang kepaphrangbom ahut nang hotur kedo-an aphan Ne paremlo. Pirthe angbong kethedung ajalin atum ason Ne nangnong pachethangji.

⁹Nerat Israel atum aphan Ne elong adim ingvai-et-lo, lapen hadaksi latum aphan padoverpo, hadak latum aphan baduta cheneknedetpo.

¹⁰Laso alongle latum nangkelut pen kehingno arat atum latum aphan tengkheng-olo, bonta lason mo nonphi pacheplang longlelo. Nang hotur kedo-an aphan keparemjisi Ne chechak-lo, lapen nangphan nangpoton nangpipo.

¹¹Nang kethi lapen nangphusar atum along kechepipdundet ahut seta nangsopomar angbong inut abangphan ke Ne recho pacholongpo lapen la adet pangtang-kringpo.

¹²La abangsi Ne Kardomhem nekimpipo lapen Ne la arecho-arat kaike padover binongpo.

¹³Ne la apo cheplangpo, lapen laphan Nesopo ason chekampo. Sol aphan Ne keklem ason laphan Ne kerap che-o-elo. Pima halaphan Ne lardetsi nangphan recho pacholong-lo.

¹⁴La Ne rat aso lapen Nedet aputhak ahemphu kaike aphan batpo. La apoton jutjelo.”

¹⁵Nathan aphan Arnam kepaklang ason an David aphan than-et-lo.

¹⁶Anke David Recho pehem arlo lutdamsi HEMPHU angno damsi chongnilo, lapen ardomlo, “HEMPHU Arnam Nangli neliphan keklemtang pen lang-lote neli thangnat a-ot ave, nelihemtun anta ave.

¹⁷Seta non Nangli aphrang an sose klembomlo; kevangbomji aningkan neliso-nelisu atum alam Nangli chechak-lo, lapen Nangli, HEMPHU Arnam si neliphan inut arlengkethe asonthot paplang-lo.

¹⁸Neli kopi Nangli pujilang! Nangli neliphan chinipame, seta Nangliban neliphan Nangli man pilo.

¹⁹La Nanglining kehang lapen la nangli neliphan keklemji pu mang-lo, lapen mo aphi neli ketheji alam neliphan paklang-lo.

²⁰HEMPHU, Nangli sonthot baduta ave; nelitum kaita chinilo, Nangli inutnatsi Arnamchot.

²¹Nangli methang arat kepaplangjisi Israel atum aphan ban pen pajok-lo, lason akhei pirthe adang avepinlang. Thedung lapen manghumeme akam Nangli latum aphan keklempi pirthe adang anta nanglinong chethang-lo. Nanglirat aso aphan Nangli Ijip pen pajok-lo, lapen Nanglirat aso atum kepaphrang un ahut akhei kaprek atum aphan Nangli phlung-et-lo.

²²Kaike aphan Israel atum Nanglirat aso paplang-lo, lapen Nangli, HEMPHU-si halatum a-Arnam plang-lo.”

²³Lapen non, O HEMPHU Arnam neliphan lapen neliso-nelisu atum aphan Nangli kechak asontin alam pachekok-lonang, lapen Nangli keklemji pu kepu ason an klem-iknon.

²⁴Nanglinong the-o-po, lapen rat atum kaiketa puverpo, “Jakongkethe HEMPHU-ke Israel aphuthak Arnamlo, lapen nangli nelidular kaiketa pachemitmedetpo.

²⁵Laso akardom Nangliphan neli ingthin chepathelo, ne Arnam, pima lahei Nangli Nangliban neliphan nelipaklangdak-lo, lapen neliphan nethanlo, Nanglisi neliso-nelisu aphan recho pacholongpo.

²⁶Nangli HEMPHU si Arnam, lapen la Nanglisi neliphan manghumeme akechak padolo.

²⁷Neli neliso-nelisu aphuthak ahirjume kepiji aphan chohang-lo, anke latum kaiketa Nang kechedondun pen aning chepangsam longpo. Nangli HEMPHU latum aphan pahirjumelo lapen Nangli hirjume halatum along kaike doverpo.”