Read Karbi 1 PHURKIMO 18 Bible Online

1 PHURKIMO 18 - Karbi bible

1 PHURKIMO 18

¹Penang an arni aphi David Recho Philistia atum aphan puthot tengkhengthu lo, lapen halatum aphan paremdet-lo. Gath arongsopi lapen la adung-arei arong-heihei halatum arideng pen alangli cheraidet-lo.

²Alangli Moab atum aphanta paremsi alangliber chevandet-lo, lapen alangliphan midu papinang-lo.

³Adunthu, Siria atum adet Zobah, Hamath alongri adung arecho Hadadezer, aphan David tengkheng-lo, la Hamtha alongri adung, pima Hadadezer ke Euphratis athak alongri arideng kechepahemphuji bor-ilo.

⁴Alangli ronhemkonglong hum 1000, bang 7000 losei kardon amonit atum lapen bang suri ingkoi akeng pen kedam aron-aso atum aphan David nep-lo. Alangli humpharo isi ronhemkonglong aphan dorphlup alosei bisi ahin anke akeng palok-et-lo.

⁵Hadadezer Recho aphan kerap-dunjisi Damaskas a-Siria arecho ron-armu ketoi ahut, David la tengkhengsi bangsuri ingkoi amonit aphan pathilo.

⁶Anke alangli ron-asong amukam-heihei halatum alongri angbong kimlo, lapen latum alangliber donangsi alangliphan midu pinang-lo. Alongtinta David aphan HEMPHU pahaithorlo.

⁷Hadadezer achakri atum kepon ser achong-heihei thidun-etsi ha Jerusalem anat pon-et-lo.

⁸Hadadezer kepangri arongsopi Tibnath lapen Kun pen ongdung tam angchin alangli ponlo. (Aphi Solomon si laso tam angchin pen langteng archok-bong-long, lapen Kardomhemthepi along kerim tam angchin ajohton selam ilo.)

⁹Hadadezer kedo-an aron-armu aphan David paremtang-lo pu Hamath arecho Toi arjulong-lo.

¹⁰Lasi alangli David Recho, Hadadezer aphuthak ron kehai apot kechoro akardom kepapijisi asopo Joram toilo, pima la abethursi Toi ongdung aphong chedan-olo. Ser, rup, lapen tam angchin pen keselam anong-e, David aphan Joram vanpilo.

¹¹Lahei David kehai adet Edom, Moab, Ammon, Philistia, Amalek pen ke-en aser, arup penpen alangli karchoji aphan keparimjisi hodaidet-lo.

¹²Abishai, la apei Zeruiah, Ingti Arlok along Edom atum aphan paremdet-lo, lapen halatum bangsuri 18 aphan pathi-et-lo.

¹³La ron-asong amukam Edom adet angbong kimlo, lapen hadak kedo arat atum David Recho aber donang-lo. Alongtinta David aphan HEMPHU pahai longverlo.

¹⁴Israel kedo-an aphuthak David pangrilo, lapen arat atum aphan mesen lapen ahokpet pen kelangpon-thekji aphan klempamelo.

¹⁵Abishai a-ik Joab si ron-armu ahemphulo; Ahilud asopo Jehoshaphat ke ketok-kebi ahemphulo;

¹⁶Ahitub asopo Zadok lapen Abiathar asopo Ahimelek atum ke kurusarlo; Seraiah-ke kangsaihem achunbang-lo;

¹⁷Jehoiada asopo Benaiah ke David angphun kerai atum ahemphulo; lapen David Recho asomar la akam along kangtui anghoi longdunlo.