Read Karbi 1 PHURKIMO 19 Bible Online

1 PHURKIMO 19 - Karbi bible

1 PHURKIMO 19

¹Penang an arni aphi Ammon arecho Nahash thilot-lo, lapen alanglisopo Hanun si recho cholo.

²David Recho pulo, “Apo Nahash nephan keklem asonthot Hanun aphan ne jirpo cherap paklangpo.” Lasi kangjinso kepaklangjisi David apherangke atum aphan toilo. Latum Ammon nanglesi Hanun Recho aphan hang-lo,

³Ammon ajalin atum recho aphan pulo, “Nanglipo aphan David man kepira nangliphan kangjinso kepaklangji aphantong lahei amonit la nangketoima pu nangli mathama? Kali! Alangli latum aphan det palangjoijisi nangtoilo, anke alangli la tengkhengdetpo!”

⁴David apherangke atum aphan Hanun nep-et-lo, halatum aphan angmum soi-et-lo, lapen akengtham an ape-ari rot-etsi halatum aphan toiphlot-lo.

⁵Halatum ahem kechevoiji aphan therak-o-lo, lahei keplangtang alam David arjulongsi halatum aphan Jeriko along padotoilo, lapen halatum angmum dingdetik vang nangnelang pu alam chakdunlo.

⁶Hanun Recho lapen Ammon aso atum David aphan halatum ahotur pinchong-lo pu chechinisi, Mesopotamia athak, Siria atum adet Maakah lapen Zobah pen ronhemkonglong lapen kardon atum aphan kerongjisi lin suri 34 arup latum pilo.

⁷Suri 32 aronhemkonglong latum rong-lo lapen Maakah Recho aron-armu vang-lo lapen Medeba adung mukam kimlo. Ammon atumta halatum kedo-an arongsopi-heihei pen nangbarsi ron kechedanji aphan chesikding-lo.

⁸Keplangbom alam David arjulongsi, alangli Joab lapen ron-armu kangthim toilo.

⁹Ammon atum ta nangbarsi halatum adim charjap-rep-lo, halatum arongsopi Rabbah, halatum adet arongsopi kethe amangho along lapen halatum aphan kerapdun arecho atum anta rong ingtan halatum adim charjap-rep-lo.

¹⁰Joab thek-long-lo, hotur aron-asong alangliphan angno pen, tengkheng tahai, lasi la Israel angbong akemenei aron-aso ingvaisi Siria atum anat papangno toilo.

¹¹Lapen ahin aron-asong ke amu Abishai aridengsi hodailo, komat abangsi halatum aphan Ammon aso atum anatsi papangnotoilo,

¹²Joab pulo, “Jongsi Siria atum nephan keparem nangthek-long-lote, nang vang-ra nephan neraptu, lapen jongsi Ammon aso atum nangphan nangparem lote, ne vangsi nangphan nangrappo.

¹³Chepangtang non lapen nangthin chepathenon! Erat lapen e-Arnam arongsopi aphan ron kechedan pasik-lonang, lapen HEMPHU aningkehangle papleng lonang.”

¹⁴Ketengkheng jisi Joab lapen alangli monit atum paphrang-lo, lapen Siria atum bephlung-lo.

¹⁵Siria atum kekat thek-longsi Ammon aso atum Abishai pen kat-lo lapen rongsopi anat aphi chiruilo. Ansi Joab Jerusalem anat chevoilo.

¹⁶Siria atum aphan Israel atum paremlo, pu halatum chechinilo, lasi Euphratis Aroi anihang ahin kedo Siria adet aron-aso latum vanpak-lo, Zobah arecho Hadadezer aron-armu apinpo Shobak arideng halatum hodailo.

¹⁷David la arjulongsi alangli Israel aron-aso pangrumsi Jordan hatpet-lo, lapen Siria atum anat pangnosi parjap-rep-lo. Ron kechedan cheng-lo,

¹⁸lapen Israel atum Siria aron-armu arphlungsi pachiruilo. David lapen la amonit atum suri throksi Siria aronhemkonglong kardon atum aphan lapen akeng pen kedam aron-aso bang suri 40 amonit aphan pathilo. Lapen latum Siria aron apinpo Shobak aphanta pathilot-lo.

¹⁹Hadadezer aber kedo arecho atum chechinilo Israel arideng pen latum remtang-lo pu lasi David pen latum chepangsamlo lapen alangliber dolo. Siria atum Ammon aso aphan kerapdunji aning hanghedet-lo.