Read Karbi 1 PHURKIMO 21 Bible Online

1 PHURKIMO 21 - Karbi bible

1 PHURKIMO 21

¹Israel arat aso aphuthak Soitan kesung kevanji aninghang-lo, lasi la David aphan aphai palakhajisi aning pachesik-lo.

²Joab lapen akaprek achakri atum aphan David hukum-heihei pilo, “Israel adang damra, kecheng pen ha kejut ahin an rat aphai lakhanon. Bang ko-an doma ne chini ingtung.”

³Joab thak-lo, “Israel arat aphan HEMPHU phan-pharo aphai halatum non apar pa-ongnang! Recho halatum kedo-an ta nangliban lo. Nangli kopisi la keklemji nanglining hang-loma lapen det kangthim aphan adai vanpoma?”

⁴Bonta Recho ke Joab aphan hukum pakroitoilo. Joab barsi Israel adet adang an damlo, ansi Jerusalem anat chevoithulo.

⁵La David Recho aphan pangrumpet ron kedun un pinso amonit bang suri pharo kre-isi Israel along lapen Judah along bang suri pharophlira throksi kep aphai thanlo.

⁶Recho ahukum Joab kroidunmo apotsi la Levi lapen Benjamin akhei aphai en-edet-lo.

⁷Keklemtang akam Arnam aphan aning padokdelo, lasi alangli Israel aphan adukpilo.

⁸Arnam aphan David pulo, “La keklem pen ajok neli isi pherememe apap klemtang-lo! Kanghon pen nelidiyatha. Neli kelu pensi klemtang-lo.”

⁹Ansi David amontri Gad, aphan HEMPHU pulo,

¹⁰“Damra David aphan Ne sonthom angbong pachongvai toilo pura thandamnon. Alangli kangvai asonsi Ne klempo.”

¹¹David along Gad damlo, lapen HEMPHU keputang alam laphan thanlo, lapen arjulo, “Kolo abang-lo?

¹²Ningkan kethom akhim ma? Mate nithom angbong HEMPHU anokjir pen nangphan patengkheng nang mate Israel adang la apherangke pen nangdet mavur pavang nangma? HEMPHU aphan ne kopisi thakdun nangjima?”

¹³Gad aphan David thak-lo, “Ne kesung-lo! Bonta ne monit pen aduk kelongji nening hanghe. HEMPHU inut nat-le nephan aduk nepapi lonang, pima alangli kangjinso pen plengset.”

¹⁴Lasi HEMPHU Israel arat aphuthak mavur toilo, lapen halatum bang suri throksi kep thinang-lo.

¹⁵Anke la Jerusalem kepavirji aphan apherangke toilo, bonta Alangli aning chelarsi pherangke aphan pulo, “Ingtonnon! La anta chok-lo!” Pherangke abang Araunah, pu inut Jebusi amonit asok kesi adim si arjaptherlo.

¹⁶Tomon angbong pherangke abang karjapding David thek-long-lo, alangli rideng la anokjir otdong, Jerusalem aphan kepavirji chesikding-lo. Anke David lapen rat ajalin kedo-an pethoila che-umrepsi arum tongkika, amahang longle paphosap-lo.

¹⁷David ardomlo, “O Arnam, neli helo kechokche keklem abang. Ne si aphai kelakha ahukum pilo. Lahei keduk atum kopisi keklemloma? HEMPHU, ne Arnam, neliphan lapen nelihemtun aphanle aduk nelipinon, lapen nangli rat aphan pajoktha.”

¹⁸David padam pen Araunah asok kesi adim HEMPHU aphan isi adovan kepabuiji ahukum kepapijisi HEMPHU apherangke Gad aphan thanlo.

¹⁹HEMPHU ahukum David kroilo, lapen Gad laphan kepaklemtoi asonthotsi klemdamlo.

²⁰Sok kesi adim Araunah lapen la asopo bangphli soktipli sibomlang, lapen latum pherangke aphan thek-longsi asomar atum chepatudamklip-lo.

²¹David Recho kevang thek-longsi Araunah sok kesi osi atehang longle paphoroksi angphun patongkilo.

²²Laphan David pulo, “Nangli sok kesi adim neliphan nelijordetnon, anke neli HEMPHU aphan avur kepahamjisi isi adovan builongpo. Neli nangliphan dorphlup anam nanglipi ikji.”

²³La en iknon Recho, Araunah thak-lo, “Lapen nanglining kehang alingle klem-iknon. Ladak chainong dolo dovan athak kephrin athok kepiji aphan chainong dolo, lapen ladak sok ketheng athengpi dolo la theng aphan lapen sok-sang adan aphan sok-tipli ta dolo. La kedo-an neli nangliphansi pilo.”

²⁴Bonta recho thak-lo, “Kali, anam kenangji an neli nanglipiji. Nanglimar lapen neliphan anam kave pin ason pen HEMPHU aphan neli athok pipe.”

²⁵Lapen la Araunah aphan ser angkleng dum pharothrok sok kesi adim alongle anam pilo.

²⁶Hadak alangli HEMPHU aphan isi adovan builo, lapen kephrin athok, kejelang athok-heihei alangli pajirlo. Alangli ardomlo, lapen dovan athak athok kepachojisi HEMPHU sining pen me nangketoi pen ajok kardom thak-lo.

²⁷Apherangke aphan anokjir kepabijoiji aphan HEMPHU pulo, lapen pherangke kroilo.

²⁸La pen ajok David akardom HEMPHU thak-lo, pu chinilo, lasi Araunah asok kesi-adim adovan athak alangli athok-heihei pilo.

²⁹Kejejangtang ajo Moses keselam HEMPHU kedo apehem lapen athok-heihei kephrin adovan along helo Gibeon along halaso ahut karcho adimlo;

³⁰bonta Arnam aphan karchoji hadak David dam un-elo, pima HEMPHU apherangke anokjir aphan alangli pherelo.