Read Karbi 1 PHURKIMO 22 Bible Online

1 PHURKIMO 22 - Karbi bible

1 PHURKIMO 22

¹Lasi David pulo, “Ladak helo HEMPHU Arnam a-Kardomhemthepi lo. Ladaksi Israel arat atum kephrin athok-heihei kepi adimlo.”

²Israel adet kedo kaprek adet amonit atum an aphan pachingrumpet jisi David Recho hukum pilo, lapen halatum aphan alangli kam paklemtoilo. Ajehak atum ke Kardomhemthepi kekimji a-arlong paroitoilo.

³Thengpi anghap-heihei along kenangji asak lapen kepacherap-het ajohton-heihei kepaselam aphan la ongdung angchin vanpilo, lapen lasonsi baduta la alin lin un-epin tam angchin ta vanlo.

⁴Tair lapen Sidon amonit atum ongdung a-Kedar athengpi kepavanji aphan alangli pathik-lo.

⁵David mathalo, “Nesopo Solomon kekimji a-Kardomhemthepi ke pirthe adang angbong ahir-asang kedonei lapen anong kedonei plangpo. Bonta la risolang lapen akechini-o kalilang. Lasi la aphan ne sikpi mek nangpo.” Lasi David kethi aphrang ongdung ahormu sikpilo.

⁶Alangli amethang asopo Solomon aphan hang-lo, lapen Israel a-Arnam HEMPHU aphan ehum Kardomhemthepi kepakimji laphan hukum pilo.

⁷La aphan David pulo, “Po ne Arnam HEMPHU aphan man kepijisi ne ehum Kardomhemthepi kekimji ninghang-lo.

⁸Bonta HEMPHU nephan nepulo, ne ongdung arat aphan pathilo, lapen ongdung aron chedan tang-lo. Lapen kedo-an avi kepabu apot Alangli nephan Kardomhemthepi nepakim toitedet-lo.

⁹Seta Alangli nephan eson chechak-lo. Alangli pulo, ‘Nangsopo inut ingsamjin pen pangripo, pima la ahotur atum kedo-an pen ne pangsamji. Alangli men ke Solomon helo, pima la kepangri ahut Israel aphan Ne ningkangsam lapen kejokvan piji.

¹⁰Alanglisi Nephan ehum Kardomhemthepi Nekimpipo. La nesopo plangpo, lapen Ne la apo plangpo. La aso-asu Israel aputhak kaike pangriverpo.’ ”

¹¹David ningjebomlang, “Non, ke po, HEMPHU nang Arnamle nanglong nangpado dunnang, lapen Alangliphan kekimpi nangji a-Kardomhemthepi kechechak an ateng paplangnang.

¹²Lapen kechiniji ajakong nangphan nang-papilonang, anke acho-arak alam, kethekkere, lapen bidi nangpapi lonang anke la aron ateng pen nang Israel aphan pangri thekpo.

¹³Moses Israel aphan kepi la aron an nang kroi lote nangkam chunji. Ning mathathip-ra ning chethethipnon, lapen thangnat asonta nangphan nang papherelongri.

¹⁴Kardomhemthepi aphan ke ne mon suri 85 aser lapen mon suri 850 arup la kekim ke-enji aphan pangrumlo. La apar ta lakha un-e pin angchin lapen tam angchin dotang-lo. Thengpi lapen arlong-heiheita sikkoilo, bonta nang ongmuchot pangrum nangjilang.

¹⁵Nang ongdung kam keklem atum dolo. Arlong ketheng aphan monit dolo,

¹⁶lapen bipan kethek atum ser, rup, tam lapen ingchin-heihei akam aphan monit dolo. HEMPHU nanglong padonang.”

¹⁷Israel ajalin kedo-an atum Solomon aphan keparap dunjisi David hukum pilo.

¹⁸Alangli pulo, “Nanglitum Arnam HEMPHU nanglitum along nangdodunlo lapen kedo-an ahin penta nanglitum aphan pangsamjinlo, lapen latum non nanglitum abe lapen HEMPHU ahukum aber dolo.

¹⁹Non lasi HEMPHU nang Arnam aphan nangning ajakong kedo-an lapen nangpran ajakong kedo-an pen ingduknon. Kardomhemthepi kekim pangchengnon, anke la arlo HEMPHU Kechejok Asinduk lapen laphan karcho ji ke-en akaprek kangthir amar-heihei bi longpo.”