Read Karbi 1 PHURKIMO 23 Bible Online

1 PHURKIMO 23 - Karbi bible

1 PHURKIMO 23

¹David kesar-o ahut la asopo Solomon aphan Israel arecho bat-lo.

²Israel ajalin kedo-an, kurusar kedo-an, lapen Levi kedo-an aphan David Recho alangli pangrumpet-lo.

³Levi atum pinso arta thomkep lapen sosechot kedo-an aphai ensi lakhalo. Pangrumpet bang suri 38 an dolo.

⁴Bang suri 24 atum aphan Kardomhemthepi arlo akam kepaklem aphan recho adeng pilo, lapen bang suri 6 aphan ke loh ketok-kebi lapen kangsai kepharji akam adeng bak-lo,

⁵bang suri 4 ke keton adeng lapen bang suri 4 aphan ke HEMPHU aphan recho laso akam aphan kepathikpitang kelun ajohton-heihei pen kero akam bak-lo.

⁶Levi atum aro atengsi David pasongthom thak-lo; Gershon, Kohath lapen Merari asong.

⁷Gershon asopo banghini dolo: Ladan lapen Shimei.

⁸Ladan asomar bangkethom: Jehiel, Zetham lapen Joel,

⁹latum Ladan aro pen kevang ajalin atumlo. (Shimei asopo bangkethom do: Shelomoth, Haziel lapen Haran .)

¹⁰Shimei asopo bangphli dolo: Jahath, Zina, Jeush lapen Beriah, halatum arta angthun ateng-lo.

¹¹Jeush lapen Beriah atum ongdung aso-asu ave, lasi latum aphan ero pusi lakha enchot-lo.

¹²Kohath asopo bangphli do: Amram, Ezhar, Hebron lapen Uzziel.

¹³La aso-akleng Amram ke Aaron lapen Moses apolo. (Aaron lapen alangli so-asu atum kaike kangthir amar ke-otji lapen HEMPHU aphan karcho, laphan kangdukji lapen la amen pen rat atum aphan kepahirjumeji aphanlo.

¹⁴Bonta Arnam amonit Moses asomar ke Levi atum angbongsi dolo.)

¹⁵Moses asopo banghini do: Gershon lapen Eliezer.

¹⁶Gershon asomar angbong ajalin ke Shebuel.

¹⁷Eliezer asopo inut do: Rehabiah, bonta Rehabiah ke aso-asu do-o.

¹⁸Kohath asopo adakvam Izhar ta asopo inut do: Shelomith, la aro ajalinlo.

¹⁹Kohath asopo adakvam kebi abang Hebron asopo bangphli do: Jeriah, Amariah, Jehaziel lapen Jekameam.

²⁰Kohath asopo akebisi Uzziel abang asopo banghini do: Mikah lapen Isshiah.

²¹Merari, asopo banghini do: Mahli lapen Mushi. Mahli asopo banghini do: Eleazar lapen Kish,

²²bonta asopo avepinsi Eleazar thinang-lo. Asopimar atum dochot, la asopimar atum Kish asopomar atum aphan si penan chopilo.

²³Merari asopo adakvam Mushi asopo bangkethom do: Mahli, Eder lapen Jeremoth.

²⁴Lahei helo Levi aso-asulo, aro lapen halatum ahemtun ateng abangphutinta halatum amen chetok-rep-lo. Abangphutin ta amethang aso-asu arta ningkan ingkoi mate sosechot an lote HEMPHU a-Kardomhemthepi akam along cheto dun nang-lo.

²⁵David pulo, “Israel a-Arnam HEMPHU amethang arat aphan ningkangsam pitang-lo, lapen la amethang Jerusalem alongsi kaike doverpo.

²⁶Lasi Levi atum HEMPHU kedo apehem lapen karcho along kerim ajohton kedo-an kerungponver ji akenang avedetpo.”

²⁷David kejut kepinkhat ateng Levi atum kedo-an ningkan ingkoi arta lelote kam aphan amen chethap nang-lo,

²⁸lapen lahei akam adeng pilo: Aaron aro pen kevang akurusar atum aphan Kardomhemthepi arlo karcho ahut kerapdun, la atikup lapen la angdeng-heihei kelang lapen kangthir amar an pangthirjir pen kerim;

²⁹Arnam aphan kepajir ahim, sok-sang adan-heihei kepi ahut ke-en ahim aduk-heihei, thapkave ahim, kepaplangtang ahim adan, Kardomhemthepi along kelong adan kelin lapen kepun arpu-heihei ke-endun;

³⁰lapen adap, arnikangsam aphongtinta HEMPHU aphan kero lapen anong kepathe,

³¹lapen kesang arni HEMPHU aphan kephrin athok-heihei kepajir ahut, chiklokemi arong-aje lapen akaprek arong-aje-heihei ahut. Bang ko-an a-Levi atum laso akam aphongtin along akenang aphai an aron aloh along tokpamelo. Levi atum HEMPHU aphan keparchoverji akam adeng pilo.

³²Latum aphan HEMPHU kedo apehem lapen Kardomhemthepi kelang lapen Kardomhemthepi along karcho adon-arap Aaron aro pen kevang akurusar atum aphan kerapdun-heihei arpu pilo.