Read Karbi 1 PHURKIMO 28 Bible Online

1 PHURKIMO 28 - Karbi bible

1 PHURKIMO 28

¹Israel along kedo aban atum an aphan Jerusalem along David Recho pachingrumpet-jisi hukum pilo. Lasi akhei kedo-an aban atum, det kechari akam aban atum, aro-heihei ajalin atum, recho lapen asopo akhi lapen pi ahur kelang atum, ahokpet ke rechohem aban atum an, ron anokbe atum an lapen arlengkethe atum an Jerusalem along chingrumpet-lo.

²Halatum angno David arjapsi lam jailo: “Nerat atum, nelilam arjutha. E-Arnam HEMPHU akeng kebi anghoi, Kechejok Asinduk aphan neli ehum kethirklong ahem kimpi ingtung-lo. La kepamanjisi neli ehum Kardomhem sikpilo,

³bonta la keklemji aphan neli khang-lo, pima neli inut ron-aso lapen vi pabu-olo.

⁴Israel a-Arnam HEMPHU, neliphan lapen neliso-nelisu atum Israel aputhak kaike kepangriverji aphan neli ingvailo. La kejalin abang kepijisi Judah akhei ingvailo lapen Judah angbong pen nelipo ahemtun pen neliphan ingvailo. Hemtun angbong kedo-an pen alangli neliphansi ke-enponji aning hang-lo, lapen Israel aputhak neliphan recho pacholo.

⁵Alangli neliphan ongdung sopomar nelipilo, lapen halatum kedo-an angbong pen HEMPHU arat Israel aputhak Solomon aphansi kepangriji aphan Alangli ingvailo.”

⁶HEMPHU neliphan pulo, “Nangsopo Solomon si Ne Kardomhemthepi kimpo. Laphan neso keplangjisi Ne ingvailo, lapen Ne la apo plangpo.

⁷La non keklem asonthot Ne aron lapen hukum-heihei jongsi cherepame pen kroibom lote la adet Ne kaike padolongverji.”

⁸Lasi non, Nerat atum, e-Arnam lapen Israel kedo-an HEMPHU angno eliphan e-Arnam HEMPHU hukum kepi ason an kekroi thekjile nanglitum aphan neli choningrilo, anke laso alongle keme nanglitum cherai longpo lapen lasonsi a-ove ove anta kaike chepahemphu longpo.

⁹Lapen Solomon aphan alangli pulo, “Po, nangpo a-Arnam aphan nang chechininon lapen elep-pet aning penle lapen ning kehang pen alangliphan ingduknon. Alangli eli kematha lapen ening akar-i ason an chinipet abang-lo. Nang jongsi Alanglilong damlote, Alangli nangdengji, bonta nang jongsi Alangli pen chepahelo lote, Alangli kaike aphan nang-obuppo.

¹⁰Alangli Kardomhem kangthir kekimji aphan Alangli nangphansi ingvaitang-lo pu chechininon. Non la klemnon, lapen la nang ning mathathip penle klemnon.”

¹¹Kardomhemthepi kekim nangji kemang arjan do-an Solomon aphan David pilo, marpuru angdeng-heihei lapen akaprek angdeng-heihei, lapen Kangthirnei Adim hadak pap kediya do.

¹²La atikup lapen adung-arei angdeng-heihei, lapen Kardomhem ajohton lapen HEMPHU aphan kehodai adan kebi amarpuru angdeng-heihei aning kedo-an kemang arjan an laphan pilo.

¹³Kurusar lapen Levi atum keklem nangji halatum akam adeng keseng, Kardomhem keklem nang akam, lapen Kardomhem aphule-phukok-heihei kelang nangji akemang arjanta laphan David pilo.

¹⁴Phule-phukok-heihei keselamji aphan ko-an arup lapen aser kenangjima alangli pinkhat-lo,

¹⁵amelurtin lapen amelur archoktin aphan

¹⁶rup atebul aphan, lapen Arnam aphan him kehodai-i aser-atebul aphan,

¹⁷tok-phrok-heihei, harlung-heihei, langbong-heihei, lapen kasu-heihei aphan ko-an aju-kavepin aser lapen arup kenangjima alangli pinkhat-lo,

¹⁸lapen mephik kethor-i adovan aphan lapen arveng kedo api-heihei halatum arveng HEMPHU Kechejok Asinduk athak kepadip ahemkonglong aphan ko-an aju-kavepin aser kenangjima pinkhat-lo.

¹⁹David Recho pulo, “Lahei kedo-an kemang arjan aloh along kedo an kepachunji aphan HEMPHU amethangsi nephan nekepinkhat ateng tokjirlo.”

²⁰Asopo Solomon aphan David Recho pulo, “Ning chethethip-ra mathathipnon, Kam pangchengnon lapen jat ason ta nangphan laso akam pen nang pasanglongri. Ne kangduk a-Arnam HEMPHU-si nanglong nangdodunpo. Alangli a-Kardomhemthepi kekim tangtetik Alangli nanglong nangdo dunverpo.

²¹Kurusar lapen Levi atum Kardomhemthepi along keklem nangji adeng pirep-lo. Ri-asai akam keklem along nangphan nang kerapdunji aninghang-lo, lapen kedo-an arat lapen halatum ajalin anta nanghukum aberlo.”