Read Karbi 1 PHURKIMO 29 Bible Online

1 PHURKIMO 29 - Karbi bible

1 PHURKIMO 29

¹Kedo-an rat armu aphan David Recho pachethang-lo, “Nesopo Solomon aphansi Arnam invailo, bonta la arta ave-olang lapen akethek ave-olang. Keklem nangji akam ke thepik, pima la monit aphan isi rechohem kali, bonta Arnam HEMPHU aphan ehum Kardomhem.

²Kardomhem kekimji aphan ser, rup tam, ingchin, thengpi, adorkeso arlong, lapen bor-arlong, aklong aphan a-arlong, ongdung amarbol, asontin bor-i-si ne un an sik-lo.

³La pen apar ne methang apuru pen ser, rup pilo, pima ne Arnam a-Kardomhemthepi aphan kechinghon apot-lo.

⁴Lin suri 100 an sose aju-kavepin aser lapen lin suri 240 anbak arup Kardomhemthepi arpong-heihei alon kepiji aphan lapen

⁵ri asai atum kepaselamji amar-heihei aphan ne pitang-lo. Non komatsi ningdak dak pen HEMPHU aphan dan pi ingtungma?”

⁶Anke aro ajalin atum, khei aban atum, ron-armu apinpo lapen recho akhi kelang atum, aning kehang pen kepiji chesik-lo.

⁷La Kardomhemthepi akam aphan aber-heihei amar helo: Lin suri 170 an sose aser, lin suri 340 an sose arup, lin suri 620 anbak tam angchin, lapen mon 8500 sose angchin.

⁸Adorkeso a-arlong kedo atum Kardomhem khipuru chepahemphu-bang Gershon aro a-Levi Jehiel aridengsi hodailo.

⁹HEMPHU aphan rat atum aningdak dak pen pilo lapen ongdung akepi apot aning arongpik-lo. David Rechota aning-arongpik pen chehok-lo

¹⁰Kechingrum arat angno David Recho, HEMPHU aphan rolo lapen pulo, “Netum aphusar Jakob a-Arnam, HEMPHU, Nang kaike ta kero kelongver nangji atheng-lo!

¹¹Nangli thepik lapen jakongthepik, anongthepik, ahir-asang dopik, lapen recho atheng. Sining lapen pirthe along kedo-an amar nanglimarlo, lapen Nanglisi recholo, kedo-an aputhak kepangri a-Bang-lo.

¹²Kedo-an akeplang lapen akhi Nangli pensi vang-lo; Nangli kangtang lapen nangli jakong pensi asontinta Nangli pangrilo, lapen Nangli badu aphanta pathe lapen pangtang un.

¹³Non, netum a-Arnam, netum Nangliphan chorolo, lapen Nangnongjume amen aphan netum chorolo.”

¹⁴Seta nerat atum lapen ne Nangphan ahokpet pen thangnat ta nangpi thekthedet-lo, pima asontin ta Nangpen kelong adan saidelo, lapen Nang pen kelong amarsi netum nangpi thu-thekchot-lo.

¹⁵Nangli chini, O HEMPHU, nephusar atum asonthotsi nelitum ban atum lapen bang adet aso asonsi kai chepajang-lo. Nelitum arni lake kedamvoi aharchi asonlo, lapen netum kethi pen chepajok un-e.

¹⁶O netum a-Arnam HEMPHU, lahei akhi Nangmen kangthir aphan man kepijisi ehum kardomhem kekimjisi netum kedo-an van rappet-lo, bonta lahei Nang pensi vang-lo lapen la kedo-an Nangmarlo.

¹⁷Ne chinilo, Nang abangphutin aning asat enlo, lapen rat atum ning isipet kedo Nangning dok-lo. Ahokpet lapen athikpet pen la kedo-an ne ningdak dak pen la kedo-an nangpidet-lo, lapen ne thek-long-lo kopusonsi Nang rat aso atum nanglong dan-heihei kevan aning cheparong-loma.

¹⁸Netum aphusar Abraham, Isaak, lapen Jakob kaiketa Nangrat aso aning aphuthak padonang lapen halatum Nangliphan nang kekroithipver jile padonon.

¹⁹Ne sopo Solomon aphan Nang kepi ahukum an kekroipet thekjile aning aklong pen lapen lahei ne kesiktang ason pen Kardomhemthepi kekim thekjile aning pahangtha.”

²⁰Ansi David rat aphan hukum pilo, “Nangli Arnam HEMPHU aphan chorohurnon!” Ansi kechetong kedo-an arat atum halatum aphusar a-Arnam HEMPHU aphan chorolo, lapen latum angphun patongkisi HEMPHU lapen recho aphan aman pilo.

²¹Puthot arni halatum pi thatsi athok pilo, lahei HEMPHU aphan panong-lo, la ansi lahei arat aphan kepachojisi pilo. La apar latum jon suri isi achainong alo, jon suri isi abiresak alo lapen jon suri isi abiresak aso arklisi dovan athak arpum penpen phrinlo. Latum drakha ahorlang ta vanlo.

²²Lasonsi latum HEMPHU angno chojunsi aning cheparongpik-lo. Phongni aphong aphan latum Solomon Recholo pu pachethang-lo. HEMPHU amen pen laphan latum jangthu patipsi latum aphan pangribang lapen Zadok inut kurusarlo pu hok-lo.

²³Lasi Solomon ke HEMPHU kepathirtang recho anghoi apo David alar ingnilo. La inut kepangrithek arecholo, lapen laphan Israel adet kangthim kroipet-lo.

²⁴Ban kedo-an lapen ron-aso an, lapen David akaprek asomar atum anta Solomon recholo pu kekroiji aphan chechak-lo.

²⁵Det adang kangthim HEMPHU-si Solomon aphan pakroipet-lo, lapen laphan alangli akaprek Israel arecho kechotang atum an sose anong pathelo.

²⁶Jesse asopo David Israel aputhak pangrilo.

²⁷Alangli ningkan 40 kepangrilo angbong Hebron along ningkan 7 pangrilo, lapen Jerusalem along ningkan 33 pangrilo.

²⁸Alangli kesar kemen artasi thilong-lo, plangpik lapen aman atheng, lapen alangli asopo Solomon si alangli lar recho cholo.

²⁹David Recho aphurkimo kecheng pen kejut an bangkethom amontri Samuel, Nathan lapen Gad along ketoktang dolo.

³⁰Ketok-kebi pen alangli kopusonsi pangriloma, alangli ko-ansi jakongtheloma, lapen alangliphan lapen Israel aphan lapen adung-arei adet-heihei aphan keplang ason an ethan-et-lo.