Read Karbi 2 PHURKIMO 1 Bible Online

2 PHURKIMO 1 - Karbi bible

2 PHURKIMO 1

¹David Recho asopo Solomon, Israel adet amethang arideng chevanlo, lapen alangli a-Arnam HEMPHU laphan pahirjumelo lapen laphan jakong pathepik-lo.

²Bangsuri asong lapen bangpharo asong ahemphu aphan lapen recho aban kedo-an, hemtun ajalin an lapen kedo-an ahin arat aphan alangli penpen Gibeon along karcho adim kedampetji aphan Solomon hukum pilo.

³Solomon latum lapen kechingrum arat kedo-an hadak damlo, pima hadaksi HEMPHU kedo apehem dolo, la HEMPHU aban Moses si kejejangtang ajo selamlo.

⁴(Kechejok Asinduk, tebonseta Jerusalem along David Recho laso Asinduk Kiriath Jearim pen kevan ahut keparjangtang a-pehem arlo si bilo.)

⁵Hur asupo, lapen Uri asopo Bezalel keselam tam adovan ta Gibeon along HEMPHU kedo a-Pehem angnosi dolo. Solomon Recho lapen kedo-an arat atum hadak HEMPHU aphan archolo.

⁶Pehem athengno tam angchin athak-heihei kepi pen ajok HEMPHU aphan recho archolo; laso athak la jon suri api thusi arpum pen phrinlo.

⁷Halaso aningve Solomon aphan Arnam cheklang-lo lapen arjulo, “Ne nangphan kopisi nangkepi nangji nangninghangma?”

⁸Solomon thak-lo, “Nang kaike nepo David aphan kanghon paklang-lo, lapen non la alar nephan Nangsi recho pachotoilo.

⁹O Arnam, HEMPHU, nepo aphan nang kechechak alam pachekoknon. Ongdung lapen halatum lakha un-e-pin arat aphuthak Nang nephan recho bat-lo,

¹⁰lasi halatum aphan kepangriji akenangsot agian mate abidi lapen akechini ajakong nepitha. Kalite, ne kopusonsi la an ke-ongpi Nangrat aphan pangrithek poma?”

¹¹Solomon aphan Arnam thak-lo, “Nang akeme asonsi chongvailo. Khi-dat mate keplang-kephi man mate nang hotur kethinangji mate nangmethang aphan chethekeding hanghesi Ne recho nang kebat nerat aphuthak kepangri unji aphan bidi lapen kechini ajakong hang-lo.

¹²Ne nangphan bidi lapen kechinita nangpiji lapen la apar ta, Ne nangphan ongdung akhi, keplang, lapen man lason nang aphrang lapen nang aphi seta badu arechota avepinlang lapen avedetjilang lahei asonta nangpi detpo.”

¹³Lasi Solomon Gibeon along HEMPHU kedo a-Pehem, karcho adim osi , Jerusalem nangchevoilo. Hadak la Israel aphuthak pangrilo.

¹⁴La hum pharo krephli aronhemkonglong asong seng-lo lapen bangsuri krephli losei kardon atum seng-lo. Halatum ajehak la Jerusalem along bilo, lapen ahin an ke akaprek arongsopi-heihei along bilo.

¹⁵La recho kecho un ahut rup lapen ser Jerusalem along arlong asonsi nahokta long athai do, lapen kedar athengpi akaprek ingle athengpi arong asonthak-thaksi ongdung-lo.

¹⁶Recho amonit atumsi Musri lapen Silisia pen losei kevan lang-lo,

¹⁷lapen Ijip adet pen ronhemkonglong kevan ta lang-lo. Halatum Hitti lapen Siria arecho atum aphan losei pen ronhemkonglong, rup adum pharothrok pen ahumtin lapen ajontin alosei aphan dum 150 arup pen jorlo.