Read Karbi 2 PHURKIMO 10 Bible Online

2 PHURKIMO 10 - Karbi bible

2 PHURKIMO 10

¹Rehoboam ha Shekem anat damlo, hadak nirep a-Israel arat laphan recho kebatjisi chingrumlo.

²Solomon Recho arideng pen chepajoksi Ijip adet kedam abang Nebat asopo Jeroboam laso abirta arjulongsi, la hem chevang-lo.

³Nirep akhei arat atum laphan hang-lo, lapen halatum kedo-an Rehoboam along damlo, lapen laphan pulo,

⁴“Nanglipo nelitum aphuthak arpu-heihei akardik nangbat-lo. Nangli jongsi lahei arpu pardikdera kai pajejangtang lote, nelitum kaiketa nangliphan ingdukverpo.”

⁵Rehoboam thak-lo, “Laso abaha aphan neliphan nithom bak kematha apor nepitha. Anle vangthunon.” Lasi rat atum dam et-lo.

⁶Apo Solomon aphan bidi-sore pi si kangduk arlengkesar atum aphan Rehoboam Recho arjulo, “Laso arat aphan kopi kethakdunsi kemeji pura nanglitum neliphan paredunpoma?”.

⁷Halatum thak-lo, “Laso arat aphan nangli jinso pulote, lapen isi mesen akethakdun pen latum aphan aning pangsamji pulote, latum nangliphan ingdukverpo.”

⁸Bonta alangli arleng kesar atum kepare alam ano chedendedetsi alangli pen ketherap-kedingrap, riso amonit, non alangliphan bidi-sore kepi atum along damsi arjudamlo,

⁹Alangli arjulo, “Nangtum kopisi thanparepo? Halatum arpu-heihei pardikdedet nangji pu kepu arat aphan ne kopi thakdun nangjima?”

¹⁰Halatum thak-lo, “Nang lason si halatum aphan thakdun nangpo: ‘Nelipo avam mute nelirimunso themu,’

¹¹Halatum aphan thannon, ‘Nepo nanglitum aphuthak arpu kardik nangpilo, neli halahei pardikmuchotpo. Alangli champre abu pen nangsap-lo, neli ke losei kesap-i a-ok-reng pen si nangsappo!’ ”

¹²Nithom aphi Jeroboam lapen la halatum aphan kepinkhat dun ateng pen rat kedo-an Rehoboam Recho along chevangthulo.

¹³Arlengkesar atum kephardun alam recho arjujesi rat atum aphan lamtang pen thakdunlo,

¹⁴la riso atum kepare ateng si thakdunlo, “Nelipo arpu kardik nanglitum aphuthak nangbat-lo; neli la pardikmuchotpo. Alangli nanglitum aphan champre abu pen nangsap-lo, neli ke nanglitum aphan losei kesap-i a-ok-reng pen nangsappo!”

¹⁵La Shiloh pen Ahijah montri Nebat asopo Jeroboam aphan kemontri pachekokji aphan Arnam HEMPHU aning kehang-lo. La apotsi recho ke rat atum alam asapta ano chedendedet-lo.

¹⁶Latum alam recho arjujelo pu rat atum chinisi, halatum hangjolo, “David lapen la ahemtun pavirnang! Latum ephan kopilo keklem? Israel amonit atum eli hem chedam lonang! Rehoboam amethangle pachelang-lonang!” Lasi Israel arat atum thurkrapsi

¹⁷Rehoboam aphan Judah alongri kedo arat atumsi recho pu hokchotsi obup-lo.

¹⁸Anke jakong akam ahemphu Adoniram ha Israel aso atum along kepadamjisi Rehoboam Recho toilo, bonta laphan halatum arlong pen varbop-lo. La apotsi paprapjin pen Rehoboam ronhemkonglong arlo arlu seraksi chepajok-lo lapen Jerusalem anat vang-lo.

¹⁹Halaso arni pen nirep a-Israel arat atum David aro abe thurlo.