Read Karbi 2 PHURKIMO 11 Bible Online

2 PHURKIMO 11 - Karbi bible

2 PHURKIMO 11

¹Rehoboam Recho Jerusalem nanglesi la suri 180 ketheknei aron-aso Benjamin lapen Judah akhei pen hangpet-lo. La nirep a-Israel akhei pen ron chedansi aber kechevanji aphan aninghang-lo.

²Bonta Shemaiah montri along arnam alam vang-lo,

³lapen Rehoboam Recho lapen Benjamin, Judah akhei aphan HEMPHU kepu alam pathan damtoilo:

⁴“Nangdon-nangrap atum aphan tengkheng-ri. Hem chedamnon, nangtum kedo-anta kopi plang-loma la nening kehang.” Halatum HEMPHU ahukum arjusi Jeroboam pen ron chedandedet-lo.

⁵Rehoboam, Jerusalem along dosi Judah lapen Benjamin arongsopi-heihei kimthulo:

⁶Bethlehem, Etam, Tekoa,

⁷Bethzur, Soko, Adullam,

⁸Gath, Mareshah, Ziph,

⁹Adoraim, Lakish, Azekah,

¹⁰Zorah, Aijalon, Hebron, lahei apaisong kedo lake Benjamin alongri Judah arlosi dolo.

¹¹La lahei apaisong pathemuchot-lo lapen alongtin inut ahemphu bat-lo, lapen alongtin ta kecho ason, jit ajangthu, drakha ahorlang,

¹²lapen chong-heihei, chir-heihei pilo. Lasonsi la Judah lapen Benjamin amethang aber chebilo.

¹³Alongri kedo-an a-Israel akurusar lapen Levi atum nitur anat Judah vangpet-lo.

¹⁴Levi atum pi kevi ahidi lapen akaprek alongle che-otekangsi Judah anat lapen Jerusalem vang-lo, pima Israel arecho Jeroboam lapen la apoton atum latum aphan HEMPHU akurusar ason pangduk longledet-lo.

¹⁵Jeroboam amethang akurusar batsi karchotap adim-heihei lapen hi-i atum aphan lapen la keselam chainong aloso akumlin aphan pangduk-lo.

¹⁶Kedo-an Israel akhei angbong aning aklong pen Israel a-Arnam HEMPHU aphan karchoji aningkehang atum Levi atum along Jerusalem dunlo, ansi latum aphusar atum a-Arnam HEMPHU aphan athok-heihei pilong-lo.

¹⁷La Judah adet ajakong pathelo, lapen ningkan kethom Solomon asopo Rehoboam aphan Solomon kebi aron abersi halatum dolo.

¹⁸Mahalath aphan Rehoboam pangrilo, bangpi apo ke David asopo Jerimoth, lapen apei ke Jesse asupi lapen Eliab asopi Abihail.

¹⁹Latum asopo bangkethom do, Jeush, Shemariah lapen Zaham.

²⁰Aphi la Maakah aphan pangrilo, bangpi Absalom asopi, lapen latum asopo bangphli dolo: Abijah, Attai, Ziza lapen Shelomith.

²¹Kadokave Rehoboam apiso bang 18 lapen bang 60 enpangtar apiso do, lapen la asopo bang 28 lapen asopi bang 60 do. Kadokave piso lapen enpangtar apiso angbong pen Maakah aphan la chinghonneilo.

²²Lapen la bangpi asopo Abijah aphan asomar kedo-an angbong pen laphansi la alar recho pacholo.

²³Rehoboam chepareset pen la asomar atum aphan kam thak-rep-lo, lapen halatum aphan Judah lapen Benjamin apaisong kedo arongsopi-heihei along padotoilo. Alangli halatum aphan padorphlup pen pilo lapen ongdung apiso halatum aphan ripilo.