Read Karbi 2 PHURKIMO 12 Bible Online

2 PHURKIMO 12 - Karbi bible

2 PHURKIMO 12

¹Rehoboam amethang recho ajakong chepathirdet aphi, la lapen la amonit atum HEMPHU Aron obup-lo.

²Rehoboam recho kecho pho aningkan ahut halatum HEMPHU aphan kekroithekthe apot aduk pilo.

³Ijip arecho Shishak 1200 aronhemkonglong, 60,000 losei kardon atum, lakha un-epin aron-aso armu angbong Libia atum, Sukkim, lapen Sudan atum aron-asong penpen Jerusalem tengkheng-lo.

⁴La Judah apaisong kedo arongsopi-heihei cheraidetsi Jerusalem an vang-lo.

⁵Shemaiah montri Rehoboam Recho, Shishak pen kechepajokji aphan Jerusalem along kechingrum Judah ajalin atum along damlo. Halatum aphan alangli pulo, “Nanglitum aphan HEMPHU abirta lahelo: Nangtum Nephan Ne-obup-lo, lasi Neta nangtum aphan Shishak arideng nang-o-bup-lo.”

⁶Recho lapen jalin atum pap klemtang-lo pu chechinilo, lapen halatum pulo, “HEMPHU kopisi keklemma Alangli ahokpetsi klemlo.”

⁷HEMPHU la thek-longsi, Alangli Shemaiah aphan thanthulo, lapen laphan pulo, “Pima latum apap chechinilo apot Ne latum aphan pavirvelo. Bonta Shishak ketengkheng ahut latum ari angsesi jokpo. Jerusalem aputhak ningkethe plengsetse-detpo,

⁸bonta halatum aphan Shishak haidetpo, lapen halatum Nephan kangduk lapen pirthe kepangri atum aphan kangduk akeprek chinipo.”

⁹Shishak Recho Jerusalem vangsi Kardomhemthepi lapen Rechohem pen khi kedo-an pon-et-lo. La jat asonta pon-et-lo, Solomon Recho keselam ser achong-heihei ta pon-et-lo.

¹⁰Halahei adim, Rehoboam tam angchin achong-heiheisi selamlo lapen rechohem anghap keton ahemphu aridengsi lahei kelang arpu pidet-lo.

¹¹Aphongtin recho Kardomhemthepi kedam ahut tonbang atum chong-heihei ponlo lapen lahei tonbang angdeng chevanthulo.

¹²Pima la HEMPHU aphan chehodaidet-lo, HEMPHU aningkethi laphan pavirdet khangjangjedet-lo, lapen Judah adang mesen pensi dolo.

¹³Jerusalem along Rehoboam pangrisi la recho ajakong pathelo. La recho keman ahut arta ningkan 41 dolo, lapen la Jerusalem HEMPHU Israel kedo-an alongri angbong pen Alangliphan keparchojisi kangvaitang adim arongsopi along ningkan 17 pangrilo. Rehoboam apei Naamah, bangpi Ammon adet pen.

¹⁴Kopisi kehingnoma la klemlo, pima la HEMPHU aningkehang keriji bor-i-edet-lo.

¹⁵Rehoboam akam kecheng pen kejut an lapen la ahemtun alam Shemaiah Montri a-Phurkimo lapen Iddo Montri a-Phurkimo alongsi tok-lo. Rehoboam lapen Jeroboam atum banghini lahin lahin ron chethurverlo.

¹⁶Rehoboam thisi David Arongsopi recho athiri-heihei along pip-lo, lapen la asopo Abijah la alar rechocholo.