Read Karbi 2 PHURKIMO 13 Bible Online

2 PHURKIMO 13 - Karbi bible

2 PHURKIMO 13

¹Israel arecho Jeroboam rechokecho 18 aningkan ahutsi Abijah Judah arecho plang-lo,

²lapen la Jerusalem along ningkan 3 pangrilo. La apei Gibeah arongsopi pen Uriel asopi Mikaiah. Abijah lapen Jeroboam atum angbong ron thurlo.

³Abijah suri pharophli aron-aso pangrumlo, lapen Jeroboam laphan bang suri pharonerkep aron-aso pen khamkhedunlo.

⁴Ephraim Anglong arong along ron-armu atum chetong-lo. Abijah Recho Zemaraim anglong arludamsi Jeroboam lapen Israel aso atum aphan hang-lo: “Nephan arjutha!” La pulo.

⁵“Nangtum chininema, Israel a-Arnam HEMPHU phri un-epin alam David pen ingti a-Kechejok aloh chepathik-lo, la aso-asu aphansi Israel aphuthak recho pachotoilo kalima?”

⁶Nebat asopo Jeroboam arecho Solomon abethurlo.

⁷Aphi la amokevangve ajat kelangno atum aphan pangrumsi isi asong seng-lo, lapen halatum aningkehang alam Solomon asopo Rehoboam aphuthak pasik-lo, la halatum aphan kekhangji bihek-lang lapen kechini ave-olang.

⁸Non nangke HEMPHU David aso-asu aphan kepitang recho ajakong abe thursi kechedanji vang-lo. Nang ongdung aron-armu do, lapen Jeroboam nangtum aphan arnamlo pu nang keselampi aser achainong aloso do.

⁹Nang HEMPHU akurusar atum aphan phlung-et-lo, Aaron aso-asu lapen Levi atum aphan nang phlung-et-lo. Halatum adim akaprek adet keklem atum asonsi nang kurusar bat-lo. Nang arnam akurusar atum along chainong alo ejon mate biresak jon 7 vanlote halatum ingthirtang-lo.

¹⁰Bonta netum ke netum Arnam HEMPHU aphansi ingdukbomlang lapen laphan o-elang. Aaron aro pen kevang akurusar atumsi halatum akam cheklembomlang, lapen halatum aphan Levi atumsi rapdunlo.

¹¹Arnivang adap-arnikangsam halatum alang-liphan athok pilo, mephik thorlo, lapen pi arpum phrinlo. Halatum aron ateng kepangthirtang atebul athak him athok pilo, lapen ajovang halatum ser amelur archok along melur keilo. Netum HEMPHU kopisi paklemtoiloma la klemlo. Bonta nangtum alangliphan obup-lo.

¹²Arnam amethangsi netum ajalin lapen la akurusar atum ladak pong-ut pen dolo, kebutji aphan chesikding-lo lapen nangtum pen ron kechedanji ehang-lo. Israel arat atum, nangtum aphusar a-Arnam HEMPHU abe thurpen ron chedanri! Nangtum hai un-e!

¹³Halaso ahut amat Judah aron-armu atum anung Jeroboam aron-asong nangtoijoilo, lapen ahin anke angno dosi chepangno-phrong lo.

¹⁴Judah arat chelangsi halatum aphan kekomchen chethek-long-lo, latum kerap kelongjisi HEMPHU aphan hangjolo, lapen kurusar atum pong-ut but-lo.

¹⁵Judah atum asekethe pen hangserlo lapen Abijah halatum aphan japonsi tengkheng-lo; Arnam Jeroboam lapen Israel aron-armu aphan paremdet-lo.

¹⁶Israel aso atum Judah atum pen kat-lo, lapen halatum aphuthak Arnam Judah atum aphan pahailong-lo.

¹⁷Abijah lapen la aron-armu Israel atum aphan parempik khangjang-lo, suri pharopho akemenei Israel aron-aso atum aphan pathilo.

¹⁸Lasi Judah arat atum Israel aso aphuthak haidet-lo, pima latum aphusar atum a-Arnam HEMPHU aphan chikilo.

¹⁹Jeroboam aron-armu aphi phi Abijah hungdunlo lapen la ajehak arongsopi cheraidet-lo: Bethel, Jeshanah, lapen Ephron, lapen lahei arongsopi adung-arei arong-heihei.

²⁰Abijah Recho kecho un ahut Jeroboam ajakong chelongledet-lo. Kejut-ke laphan HEMPHU chok-lo, lapen la thilot-lo.

²¹Abijah, tebonseta, ajakong thepon-bomlo. La apiso bang 14 do lapen asopo bang

²²lapen asopi 16 do. Abijah ahin aphurkimo an la kepu lapen keklem an Iddo Montri a-Phurkimo alongsi tok-et-lo.