Read Karbi 2 PHURKIMO 15 Bible Online

2 PHURKIMO 15 - Karbi bible

2 PHURKIMO 15

¹Obed asopo Azariah aphu-thak Arnam akarjong vang-lo,

²Alangli Asa Recho aphan kechetongjisi alangli damlo. Alangli hang-lo, “Nelilam arjutha, Asa Recho, lapen Judah lapen Benjamin arat kedo-an! Nanglitum HEMPHU along dotik an Alangli nanglitum along dolo. Nanglitum jongsi Alangliphan rilote, Alangli nanglitum aphan palongji, bonta Alangli pen nanglitum suilote, Alangli nanglitum aphan nang-obuppo.

³Penang an aningkan Israel atum ahok Arnam ave pin pen dolo, halatum aphan kethanji abang kurusar avedet-lo, lapen Aron ta avelo.

⁴Bonta kesung vang-lote halatum Israel Arnam HEMPHU along vangpo. Halatum Alangliphan ripo lapen Alangliphan longpo.

⁵Halaso ahut jokvan pen chedam-chevang longle, pima adet tinta akesung dorep-lo.

⁶Isi adet akaprek adet aphan chenek-lo, lapen erongsopi akaprek arongsopi aphan chenek-lo, pima Arnamsi halatum aphuthak lapuson akesung vanlo.

⁷Bonta nanglitum chepangtangrak-ra ning bibedetnon. Nanglitum keklem akam apot nong-e nangpidetji.”

⁸Obed asopo Azariah kemontri alam Asa arjulongsi, la aning arong-olo. Judah lapen Benjamin alongle along kedo akumlin an lapen la kecherai Ephraim anglong along arongsopi-heihei akumlin pavir-et-lo. Kardomhem atikup along kedo HEMPHU adovan ta paselamlo.

⁹Ephraim, Manasseh lapen Simeon pen ongdung arat atum Asa anatsi vangpet-lo, lapen la adetsi dodunlo, pima la along HEMPHU dolo pu halatum thek-long-lo. Latum kedo-an lapen Judah lapen Benjamin arat aphan Asa hangpet-lo.

¹⁰Latum Jerusalem along Asa Recho kecho 15 aningkan kethom achiklo chingrumpet-lo.

¹¹Halatum kethidam kelong amar pen HEMPHU aphan halabangso arni athok ajir pilo: Jon 700 achainong aphu lapen jon suri 7 abiresak thulo.

¹²Halatum aning aklong pen, karjong ajakong kedo-an pen lapen halatum aphusar atum a-Arnam HEMPHU aphan archopo pu cheparaisi chejok-lo.

¹³Badu ariso tame, kesar tame, pinso-arlo tame, HEMPHU aphan karchoche abangphan pathilot-lo.

¹⁴Halatum kechejok ateng dopo pura HEMPHU amen pen ase pathedungsi halatum semetang-lo lapen halatum hangserlo lapen pong-ut-heihei but-lo.

¹⁵Judah arat-aso an aning arong-lo, pima laso akechejok latum aning aklong pensi klemlo. Halatum HEMPHU aphan karcho aning cheparong-lo, lapen Alangli halatum aphan deng-lo, lapen latum aphan ahintin penta ningpangsam lo.

¹⁶Asa Recho aphi Maakah aphan Pei-rechopi anghoi pen pasuntuk-lo, pima bangpi Asherah arnampi akumlin paselamlo. Asa kumlin chorpetsi, chordak-dak-lo, lapen la-heihei Kidron Arlok along me keidut-lo.

¹⁷Det adang kedo-an karchotap adim-heihei Asa pavir-et-e seta akai dingpi an alangli HEMPHU aphan kroithip-lo.

¹⁸Alangli po Abijah HEMPHU aphan kehodai amar an lapen alangli-methang kehodai aser, arup amar an Kardomhemthepi along bi-et-lo.

¹⁹Alangli recho kecho ningkan 35 an det ron avedet-lo.