Read Karbi 2 PHURKIMO 16 Bible Online

2 PHURKIMO 16 - Karbi bible

2 PHURKIMO 16

¹Judah arecho Asa recho-kecho 36 aningkan, Israel arecho Baasha Judah adet tengkheng-lo, lapen tovar kekhangjisi Ramah apaisong kimlo.

²Lasi Kardomhemthepi lapen rechohem akhipuru-heihei arup, aser, Asa ponsi la ha Siria arecho Benhadad aphan Damaskas pen losi laso abirta pilo:

³Elitum apo atum ason elitum ta chelangpet-lonang. Laso arup, aser ke nangliphan isi adanlo. Non lasi Israel arecho Baasha pen kechelang nangli che-onon, anke la nelongle pen aron-asong cheponpo.

⁴Asa alam along Benhadad chedondunlo, lapen Israel arongsopi ketengkheng jisi aron apinpo lapen halatum aron-armu toilo. Latum Ijon, Dan, Abel Beth Maakah, lapen kecho amar kedo apuru Naphtali arongsopi-heihei an cherai-et-lo.

⁵Keplangtang alam Baasha Recho arjulongsi, la Ramah kekim ingtonkok-lo, lapen akam obup-lo.

⁶Anke Asa Recho Judah pen amonit kedo-an pangrumsi Ramah along Baasha ke-en a-arlong-heihei lapen athengpi-heihei keparoi-etji aphan hukumpilo, lapen latum lahei Geba lapen Mizpah arongsopi apaisong kekimji aphan enlo.

⁷Halaso ahut Hanani montri, Asa Recho along damlo, lapen pulo, “Pima nang nang Arnam HEMPHU aphan chikikesi Siria arecho aphan kechiki apot Israel arecho aron-armu nang pen jokpo.

⁸Sudan lapen Libia atum ronhemkonglong-heihei pen ongdung aron-armu lapen losei kardon atum avema? Bonta nang HEMPHU aphan kechiki apotsi halatum aphuthak haidet-lo.

⁹Pirthe adang aputhak HEMPHU-ke lang-chariver, lapen Alangliphan kekroibom atum aphan Alangli jakong pilo. Nang kelu akamsi keklemlo, lasi non pen apar kaiketa nang ron chedan nangpo.”

¹⁰Laso alam Asa aphan aning pathisi la montri aphan ingchin arri pen ingnang-lo. Laso ahut pen amat Asa ajehak arat aphan pasungpik-lo.

¹¹Asa recho-kecho kechengpen ha kejut an keklem akam Judah lapen Israel Arecho-atum Aphurkimo along tok-et-lo.

¹²Asa recho-kecho 39 aningkan ahut la akeng keso cholongsi akeng kengkokjok-lo; bonta la kerap akelongji aphan HEMPHU anat pangnone detsi daktor atum along damlo.

¹³Ningkanhini aphi la thilot-lo, lapen David Arongsopi along la amethang aphan kechehong arong athiri alongsi pip-lo.

¹⁴Kepip ahut halatum la abang arpum aphan mosala, jangthunempru-heihei sik-lo, lapen la kethi aning duksi me kethor abui pathelo.