Read Karbi 2 PHURKIMO 17 Bible Online

2 PHURKIMO 17 - Karbi bible

2 PHURKIMO 17

¹Jehoshaphat apo Asa alar la recho cholo, lapen Israel abethursi la ajakong chepangtang-lo.

²La Judah apaisong kedo arongsopi-heihei along lapen Judia arong-heihei anat ron-asong bilo, lapen Asa kecherai Ephraim alongri bithe ta bilo.

³Jehoshaphat aphan HEMPHU pahirjumelo, pima la apo kecheng akai arjan endunlo, lapen Baal aphan archochedet-lo.

⁴La apo a-Arnam aphan ingduk-lo, Arnam ahukum-heihei kroilo, lapen Israel atum keklem akam klemkledet-lo.

⁵HEMPHU si Jehoshaphat aphan Judah adet adang aputhak pathirdet-lo, lapen rat atum alanglilong dan-heihei pavanpilo, anke la plangsi man atheng paplang-lo.

⁶La HEMPHU aphan kangduk chehok-lo, lapen Judah along karchotap adim-heihei lapen arnampi Asherah akumlin-heihei pavir-et-lo.

⁷Alangli recho-kecho kethom aningkan Judah arongsopi-heihei along kepathanjisi lahei amonit toilo: Benhail, Obadiah, Jekaariah, Nethanel lapen Mikaiah.

⁸Halatum along bang sirkep a-Levi atum lapen bang hini akurusar atum dunlo. Levi atum ke Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, lapen Tobadonijah; lapen kurusar atum ke Elisham lapen Jehoram.

⁹Latum HEMPHU Aron aloh ponlo, lapen Judah arongso kedo-an damsi la rat aphan thanlo.

¹⁰Adung-arei adet atum Jehoshaphat pen ron kechedanji aphan HEMPHU papherelo.

¹¹Ajehak Philistia atum Jehoshaphat aphan ongdung arup lapen akaprek adan-heihei ta vanpilo, lapen ajehak Arab atum jon 7,700 abiresak lapen jon 7,700 abi vanpilo.

¹²Lasi Jehoshaphat ajakong the ponbomlo. Judah bithe-bitha la apaisong arongsopi-heihei kimlo,

¹³hadak ongdung kecho-amar bilo. Jerusalem along alangli anong keche-thanghu achakrisi bilo,

¹⁴halatum aro atengsi bilo. Adnah ke Judah aro aron apinpolo, lapen la bang suri pharokethom aron-aso la aber dolo.

¹⁵Adun aphai angthun ke Jehohanan, la along Laknira bang suri 80 aron-aso dolo,

¹⁶lapen adun ke Amasiah, la Zikri asopo along lakni do (Amasiah ke amethang aning kehang pen HEMPHU aphan ingduk-lo.)

¹⁷Benjamin aro aron-asong apinpo ke Eliada, la inut anong kechethang aron-asolo, lak ni amonit chong-heihei lapen thai-heihei kedo atum apinpolo.

¹⁸La adun apinpo ke Jehozabad, bang suri 180 amonit do, ron aphan chesikpame atumlo.

¹⁹Lahei amonit atum recho aphan Jerusalem alongsi ingduk-lo, la pen apar la ajehak aron-asong aphan Judah angbong paisong arongsopi-heihei along bilo.