Read Karbi 2 PHURKIMO 18 Bible Online

2 PHURKIMO 18 - Karbi bible

2 PHURKIMO 18

¹Judah arecho Jehoshaphat plangsi anong chethangpik ahut, la ahemtun abangphu angbong pen Israel Arecho Ahab ahemtun angbong pache-en pachedolo.

²Penang an aningkan aphi Ahab along kevurdamjisi Jehoshaphat, Samaria arongsopi damlo. Jehoshaphat lapen la along nangkedun atum aphan man kepijisi kecho aphan Ahab abiresak lapen achainong ake-ongdung that pilo. Gilead along Ramoth arongsopi ketengkhengji aphan la Jehoshaphat aphan kepakroiji bor-ilo.

³Alangli arjulo, “Ramoth ketengkhengji aphan nangli nelilong nangdunjima?” Jehoshaphat thak-lo, “Nangli damlote nelita chesikding-lo, lapen neliron-armuta-lo. Nelitum nanglilong nang jalangdunpo.”

⁴Anke alangli pulo, “Bonta kechengsi eli HEMPHU aphan arju lonang.”

⁵Lasi Ahab montri atum aphan hang-lo, latum bang 400 do lapen latum aphan arjulo, “Ne Ramoth damsi tengkheng nangjima mate nangnema?” La tengkhengnon, halatum thak-lo. “Arnamsi nangliphan pahaipo.”

⁶Bonta Jehoshaphat arjulo, “Dak HEMPHU aphan karjuji aphan anut kaprek amontri aveloma?”

⁷Ahab thak-lo, “Ladak inut dolang, Imlah asopo Mikaiah. Bonta ne laphan langselet-lo, pima la nephan kaita akeme ason montritrelo; la kaita kehingno si montrilo.” Lapuson nangli puri! Jehoshaphat thak-lo.

⁸Lasi Ahab Recho inut aban aphan hangsi Mikaiah aphan non amat kepavanji aphan pulo.

⁹Banghini arechota halatum recho achoi chingchoisi sarnung angsong halatum amethang anghoi chongnirep-lo, la Samaria anghap angtanchot, lapen halatum angno kedo-an montri atum montrijolo.

¹⁰Halatum angbong inut Chenaanah asopo Zedekiah, ingchin anu selamsi Ahab aphan pulo, “La pensi nangli Siria pen ron chedanpo lapen halatum aphan parempamepo.”

¹¹Akaprek amontri atumta lasonthotsi ningjelo. “Ramoth abe thurra damnon, lapen nangli haivekpo.” pusi halatum pulo. “HEMPHU si nangliphan pahaipo.”

¹²Halabangso ahut Mikaiah aphan kepahang damtoi aban abang laphan pulo, “Kedo-an amontri atum recho kehaiji alamsi montrilo, lapen nanglita isinatsi akeme ningjepo.”

¹³Bonta Mikaiah thak-lo, “HEMPHU kereng-et amen pen neliphan Arnam kopisi nepathantoi jima la anchotji.”

¹⁴La Ahab Recho angno kecheklang ahut, laphan recho arjulo, “Mikaiah, Jehoshaphat Recho lapen ne Ramoth tengkheng nangjima nangnema?” Tengkheng non! Mikaiah thak-lo,. “Nangli haiji. HEMPHU-si nangliphan pahaipo.”

¹⁵Bonta Ahab thak-lo, “Nang nephan HEMPHU amen pen keningje ahut ahok alamle ningjetu! Laso alam ne nangphan batai ko-ansi nangpu nangjilang?”

¹⁶Mikaiah thak-lo, “biresak atum kevi abang kave asonsi Israel aron-armu atum inglong adang bithe kepratsei neli thek-long-lo. Lapen HEMPHU pulo, ‘Lahei amonit atum ajalin ave, latum ahem ingsamjin pen pachedam longnon.’”

¹⁷Jehoshaphat aphan Ahab pulo, “Neli nangthan lok ke, la kaita nephan akeme ason montritrelo; la kaike akehingno saidelo!”

¹⁸Mikaiah ningjebomlo, “Non HEMPHU kopisi kepuma arjutha! Kedo-an apherangke Alanglidung sido sining angsong HEMPHU Alangli anghoi athak kangni ne thek-long-lo.

¹⁹HEMPHU arjulo, ‘Ahab aphan komatsi pachobeidampo, anke la dampo lapen Ramoth along thidamlotpo?’ Ajehak apherangke atum eson alam pulo, lapen akaprek atum akaprek ason ningjelo,

²⁰inut akarjong nangbarsi HEMPHU anat vangvetik an, lapen pulo, ‘Ne laphan pachobeipo.’ ‘Kopusonlo?’ HEMPHU arjulo.

²¹Karjong thak-lo, ‘Ne damsi Ahab amontri kedo-an aphan kechobei alam paningjepo.’”

²²Mikaiah keningje pajut-lo! “Lahelo keplang nangjilo. HEMPHU-si nangli montri atum nangliphan pachobeitoilo. Bonta la amethangsi thandak-lo, nangli akevir chetongvekpo!”

²³Anke Zedekiah montri Mikaiah anat arludamsi amahang ardep-lo, lapen arjulo, “Komantusi HEMPHU akarjong nephan osi nang pen kechingkilo?”

²⁴Nang ajehak arlo angdeng anung anat kechepatudam ahut thek-longpo, Mikaiah thak-lo.

²⁵Anke Ahab Recho achakri inut aphan hukumpilo, “Mikaiah aphan nepchek-ra rongsopi a-Govornor, Amon lapen Joash Rechoso along pondet-non.

²⁶Halatum laphan kebengchekjile thannon, lapen ne nangchirui pamemetik an him lapen lang laphan pichotnon.”

²⁷Nangli jongsi nang-chiruilong pame lote, Mikaiah pu-thip-lo, “Tangte HEMPHU nelipen ningjeje pu mathanon!” Lapen la lam ningjethubom lang, “Arjutha, abangphutinta, ne keputang alam an!”

²⁸Anke Israel arecho Ahab lapen Judah arecho Jehoshaphat, Gilead along Ramoth arongsopi ketengkheng jisi damlo.

²⁹Jehoshaphat aphan Ahab pulo, “Elitum kedam ahut neli arje chepatupo, bonta nanglike recho apele chingthang non.” Lasi Israel arecho arje chepatusi ron damlo.

³⁰Siria arecho aronhemkonglong apinpo aphan hukumpilo, Israel arecho pen apar badu aphanta tengkheng-ri.

³¹Lasi latum Jehoshaphat aphan thek-longsi la Israel arecholo pu kadokaveta mathapet-lo, lapen laphan ketengkheng jisi halatum chetevarlo. Bonta Jehoshaphat hangserlo, lapen laphan HEMPHU pajok-lo, lapen alangli pen ketengkheng pachetevarlo.

³²Ronhemkonglong apinpo thek-long-lo, la Israel arecho kali, lasi latum laphan kephlung ingtonkok-lo.

³³Chininepin pen inut a-Siria aron-aso Ahab Recho tam-achoi kechechu adak along thai pen apchok-lo. “Nereng sodak-lo!” pusi la aronhemkonglong kardon abangphan hangserlo. “Chelangra ron pen nephan ingtan neponnon!”

³⁴Ron kechedan sik muchot ahut Ahab Recho aronhemkonglong athak charchaksi Siria atum anat pangnoding-lo. Arni kangsam ahut la thilot-lo.