Read Karbi 2 PHURKIMO 19 Bible Online

2 PHURKIMO 19 - Karbi bible

2 PHURKIMO 19

¹Judah arecho Jehoshaphat Jerusalem along rechohem thangthesi nangchelelo.

²Inut amontri, Hanani asopo Jehu damsi recho aphan chetong-lo, lapen alangliphan pulo, “Kehingno atum aphan kerapdun mesenlo putong nangli kemathama lapen HEMPHU aphan kehijim atum anat kedodun mesenma?

³Nangli keklem akam HEMPHU aning nangliphuthak papung-lo. Rat atum karcho arnampi Asherah akumlin-heihei nangli pavedet-lo, lapen nangli Arnam aning kehang keklemji bor-ilo.”

⁴Jehoshaphat Recho Jerusalem along do seta la rat atum angbong dambom, nitur anat Beersheba pen ha Ephraim anglong arong angchun anirep anat, la rat atum aphan halatum aphusar atum a-Arnam HEMPHU anat kevanji aphan klemlo.

⁵Alangli Judah apaisongkedo arongsopi alongtin along kangsai abang bat-lo:

⁶“Kangsai ahut cherepame nangji; nangtum monit ajakong aputhak-le keklem kali, bonta HEMPHU ajakong aphuthak lapen nangtum lam kerip ahut Alangli nangtum along dolo,

⁷HEMPHU aphan man pinon, lapen kechere pen klemnon, pima etum a-Arnam HEMPHU ke kechokche ason chechakche mate abe-ahoi mate tangka choche.”

⁸Jerusalem along Jehoshaphat do seta, Levi atum, kurusar atum, alangli pen ajehak arlengkethe atum aphan HEMPHU Aron kangdi mate rongsopi kedorap angbong rat alam kangsaiji aphan bat-lo.

⁹Halatum aphan alangli lahei alam pinkhat-lo: “HEMPHU aphan man kepijile nangdeng an kekroithip pen Alangliphan kroira keklem nangji akam an klemnon.

¹⁰Mane nangdon-nangrap rongsopi pen lam-kepho alam mate aron mate hukum kangdi alam vanlote, lam karju ahut halatum kosonsi kedo nangjima pacherera halatum aphan pinkhatnon, anke latum HEMPHU angno pap keklem ado avedetpo. Kalite HEMPHU aningkethi akup nangphuthak lapen nang korte aphuthak klopo. Bonta nangtum nangdeng cheklemlote, nangdai avelo.

¹¹Amariah kurusar kethesi dhorom alam an aputhak kerip ajakong dopo, lapen Ishmael asopo Zebadiah, Judah a-Govornorsi rat atum an kerip ajakong dopo. Levi atum ke kangsaitang alam ateng klemloma klemklema langdun nangpo. Nangthin chepathera lahei kepinkhat an klemnon; lapen ke ahokpet anat-le HEMPHU nangpado dunlo-nang!”