Read Karbi 2 PHURKIMO 2 Bible Online

2 PHURKIMO 2 - Karbi bible

2 PHURKIMO 2

¹Solomon Recho, kardomhem ehum hadak HEMPHU aphan rechohem ehum kekimji aphan mathathip-lo.

²La bangsuri throksi kep mar kepavan akam keklem amonit lapen bangsuri throknerkep arlong kehong akam aphan kamkeklem amonit bilo. Kam kelang arpu ke-en atum bang suri kethomra bang pharothrok dolo.

³Tair archo Hiram aphan Solomon isi abirta lolo: “Rechohem kekimji aphan nangli nelipo David aphan kedar athengpi jorsi alangli pen beha keklem asonthot neli pen beha klem iknon.

⁴Neli Arnam HEMPHU aphan man kepijisi neli kardomhem ehum kimbomlo. La isi kangthir-et adim plangpo, hadak mosala aduk kethor pen ajok nelirat aso lapen neli ta Alangliphan archopo, hadak nelitum Alangliphan chemitme pin pen him kangthir pajirji, lapen hadak nelitum adapvang lapen arnivang arnikangsam, lapen kesang, chiklo kemi arong-aje ahut, lapen akaprek kangthir arni netum Arnam HEMPHU aphan man kepijisi kephrin athok pipo. Alangli laso ahukum kaiketa Israel atum aphan piverlo.

⁵Neli ehum thedung akardomhem kekimji ninghang-lo, pima nelitum a-Arnam ke akaprek a-arnam aparta themulang.

⁶Puvoiphit seta baduta Arnam aphan kardomhem kimpi un-e, pima sining kedo-an adang kethe seta Alangliphan bi un-e. Tangte Arnam aphan methek kethor adimchot apar neli kosonsi kardomhem kekimthekpoma?

⁷Non lasi neliphan inut amonit ser, rup, tam angchin lapen ingchin akam kehongthek abang, pe kelir erring lapen pe-ke-er akam keklemthek abang, alangli nelipo kangvaitang Judah lapen Jerusalem ari asai keklem atum pen paklemrappetpo.

⁸Neli chini nangli thengpi kerok amonit atum ko-an kam klemthek-loma. Lasi kedar, Saipres lapen Juniper athengpi Lebanon pen neliphan nang-lonon. Neli monit nangchetoiji aphan chesikding-lo, nangli monit aphan keparap dunji aphan

⁹ongdung athengpi kerim akam aphan pima la neli kekimji akardomhem ke thepikji, lapen langmepikji.

¹⁰Nangli monit aphan neli mon suri phokep athengthe, mon suri phokep asoktipli, drakha ahorlang mon surikep, lapen jit ajangthu mon surikep nang-lopo.”

¹¹Solomon aphan Hiram Rechota epak aloh pen ajok thak-lo, alangli tok-lo, “Pima HEMPHU amethang arat aphan kechinghon apot, alangli nangliphan halatum aphuthak recho bat-lo.

¹²Israel a-Arnam HEMPHU sining-pirthe kepinchong abang anong pathenang! Alangli David Recho aphan inut bidi kedo asopo pilo.” Kechini thekser lapen asaikethekser abang, la non HEMPHU aphan ehum kardomhem lapen amethang aphan rechohem ehum kekimji mang-lo.

¹³Neli nangliphan inut bidi kedo lapen asai ketheknei ri-asai klembang amen Huram nangtoilo.

¹⁴Alangli apei inut Dan akhei abangpi lapen apo ke inut Tair kedo abangpo. La ser, rup, tam angchin, ingchin, arlong lapen thengpi pen kosonsi kam klemnangjima thek-lo. La kelir, erring lapen ake-er ape lapen pe kanglit pen kam klemthek. La kehong akam an ta klemthek, lapen laphan kepinkhat arjan ason an ta klemthek. La nanglipo David aphan keklempi ri-asai klembang atum pen paklemrappet lonang.

¹⁵Lasi non thengthe, soktipli, drakha ahorlang lapen jit ajangthu nangli kechechak an nang-lo iknon.

¹⁶Lebanon anglong along nelitum nangli akenang kedar athengpi an pipo, apeng raksi lahei talo alang athak panglangsi Joppa an nang-lopo. Hadak pen nangli Jerusalem chepon unpo.

¹⁷Solomon Recho Israel adet arlo kedo bang adet aso an lakha enlo, apo David kelakha ke-en asonthot-lo.

¹⁸Hadak ahem kedo bang suri 70 hormu keparim atum lapen bang suri 80 inglong along arlong kehong lapen kam keklem kepachunji aphan bang suri 3,600 kam kelang atum bat-lo.