Read Karbi 2 PHURKIMO 20 Bible Online

2 PHURKIMO 20 - Karbi bible

2 PHURKIMO 20

¹Penang an aphi Moab lapen Ammon aron-armu chelangpet pen a-Meuni atum Judah tengkheng-lo.

²Ajehak apherangke atum vangsi Jehoshaphat Recho aphan parjulo: “Isi ongdung aron-armu Edom atum nangliphan ketengkhengjisi Talo Kethi ahin pen vang-lo. Halatum Hazazon Tamar cheraitang-lo.” (La Engedi akaprek amenlo.)

³Jehoshaphat pheresi HEMPHU pen keja kelongjisi ardomlo. Anke det adang an an kehum ketalonjisi alangli hukum-heihei pilo.

⁴Judah arongsopitin pen HEMPHU akeja kelongji aphan karjujisi Jerusalem vang serak-rak-lo,

⁵halatum lapen rat atum Jerusalem Kardomhemthepi atikup-hini along chingrumpet-lo. Jehoshaphat Recho halatum along damsi arjap damlunlo,

⁶lapen asekethe pen ardomlo, “Nephusar atum a-Arnam HEMPHU, Nangli pirthe adang adet an aputhak sining pen pangrilo. Nangli jakong thepik lapen ingtangrak, lapen Nangliphan baduta nangkhang un-e.

⁷Nangli netum a-Arnam. Nanglirat aso Israel atum laso alongle along kevang ahut, Nangli ladak kedo arat aphan phlung-et-lo, lapen Nanglijirpo Abraham aso-asu aphan kaike halatum kepacheraijisi pidet-lo.

⁸Halatum ladak dolo, lapen Nangliphan man kepijisi ehum a-Kardomhemthepi kimlo, halatum chinilo,

⁹jongsi latum aphan kevir pen aduk pilote, ron , avur, akhim tame, anke halatum vangsi Nangliphan karcho adim laso a-Kardomhemthepi angno arjappo. Halatum akesung ahut halatum Nangliphan ardom longpo, lapen halatum aphan arjusi pajokpo.”

¹⁰Non Ammon, Moab, lapen Edom arat atum nelitum aphan tengkhengtang-lo. Nephusar atum Ijip adet pen kevang ahut Nangli halatum aphan lahei adet pavurlongledet-lo, lasi neliphusar atum latum adung-arei akung-kungsi damlo, lapen halatum aphan pavirvedet-lo.

¹¹Bonta latum netum aphan lason klemlo.

¹²Nangli netum a-Arnam! Halatum aphan aduk pinon, pima netum aphan nang ketengkheng ke-ongdung aron-armu angno netum kecheklangji aphan nahok penta akerap longlelo. Netum kopisi keklem nangjima chechininedet-lo, bonta netum Nangli pensi akerap chohang-lo.

¹³Judah amonit kedo-an halatum apiso-aso penpen Kardomhemthepi along arjapphrong-lo.

¹⁴HEMPHU akar-jong inut a-Levi aphuthak nanghirlo, la rat armu alongsi dolo. La amen Jahaziel, Jekaariah asopo; la Asaph aro bangphulo, lapen Asaph pen, Mattaniah, Jeiel, lapen Benaiah aso-asulo.

¹⁵Jahaziel pulo, “Recho lapen Judah lapen Jerusalem arat kedo an, HEMPHU pulo, ‘Nanglitum ningbi nangne lapen la ke-ongdung aron-armu pen kechedanji phereri. Ron Arnam aphuthaksi chiki, nanglitum aphuthak kali.

¹⁶Ziz atovar halatum kevang ahut halatum aphan penap tengkhengnon. Jezreel adung ingnam arong anat kedam a-arlok angchun along nanglitum halatum aphan chetongpo.

¹⁷Nanglitum laso aron aphan chedan nangnedetji. Nanglitum adim-heihei chedorepnon, lapen inghongnon; nanglitum thek-longpo, HEMPHU nangpahai-tang-lo. Judah lapen Jerusalem arat nanglitum chak-hik-he mate phereri. Ron barnon, lapen HEMPHU nanglitum along dopo!’ ”

¹⁸Anke Jehoshaphat Recho angphun patongkisi, amahang longle papholo, lapen alanglilong kedo-an arat atumta alanglilong angphun patongkilo, lapen HEMPHU aphan archolo.

¹⁹Kohath lapen Korah aro a-Levi atum arjapphrongsi jasemet kehangser pen Israel a-Arnam HEMPHU aphan chorolo.

²⁰Puthot adap rat atum ingnam arong Tekoa adung damlo. Halatum kedam pangchengsi laso alam pen Jehoshaphat halatum aphan pulo, “Judah lapen Jerusalem amonit atum! Nang Arnam HEMPHU aphanle chikinon, lapen Arnam lapen nangtum arjapthip unpo. La amonit kepu alam kroinon, lapen nangtum chunpo.”

²¹Rat pen chingkidet aphi, ajehak alunsepo atum aphan halatum kangthir akam ahut kechingthang ape pachingthangji aphan recho hukumpilo, lapen “HEMPHU aphan chorolo! La akanghon kaike dover!” palunsi ron-armu aphrang padamtoilo.

²²Latum kelun pangchengsi ketengkheng aron-armu aphan HEMPHU pamanghulo.

²³Ammon aso atum lapen Moab aso atum, Edom aso aron-armu aphan tengkheng-lo, lapen la pavirdet khangjang-lo, lapen halatum angbongta lahin lahin ron pachedan seroilo.

²⁴Judah aron-armu atum sangti ajo ahemchardon lesi halatum hotur aphan lang-lo, lapen halatum longle athak kethi ketiche thek-long-lo. Inut bakta jok-longledet-lo.

²⁵Jehoshaphat lapen la aron-asong mar ke-endamjisi damlo, lapen latum ongdung achainong , kecho-amar, pe-ri lapen akaprek adorkeso amar long-lo. Lahei kethipon amar latum kepangrumji aphan latum nithom en nang-lo, bonta hadak lapu-an ake-ong latum asontin pon-et un-edet-lo.

²⁶Phli arni halatum Berakah Arlok along chingrumsi HEMPHU keklemtang an akam apot chorolo. Lasi Arlok amen Berakah irlo.

²⁷Jehoshaphat aron-asong-heihei kehai pen Jerusalem chevoilo, pima halatum ahotur aphan HEMPHU paremdet-lo.

²⁸Halatum rongsopi kele ahut latum Kardomhemthepi kumbeleng lapen pong-ut arki penpen lutdamlo.

²⁹Kosonsi Israel ahotur aphan HEMPHU paremloma la karjulong adet an pherelo,

³⁰lasi Jehoshaphat ingsamjin pen pangrilo, lapen ahintin pen ta Arnam laphan pajokvanlo.

³¹Arta ningkan 35 ahutsi Jehoshaphat Judah arecho plang-lo lapen Jerusalem along ningkan 25 pangrilo. La apei Shilhi asopi Azubah.

³²Apo Asa asonsi la kopima HEMPHU angno akechok si klemlo;

³³bonta karchotap adim-heihei pavir-et-edet-lo. Rat atum aphusar atum a-Arnam aphan aning aklong pen archochedet-lo.

³⁴Jehoshaphat Recho kecho kecheng pen kejut an la keklem ason an Hanani asopo Jehu Aphurkimo aloh along tok-et-lo, la Israel arecho atum Aphurkimo pabeng-lo.

³⁵Ephong Israel arecho Ahaziah kehingno akam keklem-abang, pen Judah arecho Jehoshaphat pajirpolo.

³⁶Eziongeber along latum talopi kedam atelongpi-heihei kimlo.

³⁷Bonta Dodavahu asopo Eliezer, Mareshah pu abang Jehoshaphat aphan pacherelo, “Pima nangli Ahaziah pen kepajirpo apot nangli kekimtang an HEMPHU pavirpo.” Lapen telongpi-heihei an ruraisi vek-longledetpo.