Read Karbi 2 PHURKIMO 21 Bible Online

2 PHURKIMO 21 - Karbi bible

2 PHURKIMO 21

¹Jehoshaphat thilot-lo, lapen David Arongsopi recho athiri along pip-lo, lapen la asopo Jehoramsi la alar recho cholo.

²Judah arecho Jehoshaphat asopo Jehoram akorte bang throk do: Azariah, Jehiel, Jekaariah, Azariahu, Mikael lapen Shephatiah.

³Latum apo latum aphan ongdung aser-arup lapen kaprek kecheraime adorkeso amar pilo, lapen latum abangphutin aphanta Judah apaisongkedo arongsopi along bisi pachehemphulo. Bonta Jehoram abang sokleng apotsi Jehoshaphat laphan apoton pinchong-lo.

⁴Jehoram det chepahemphu pame ahut la akorte kedo-an aphan lapen ajehak Israel aban aphan pathilo.

⁵Ningkan 32 arta ahutsi Jehoram recho plang-lo, lapen Jerusalem along ningkan nerkep pangrilo.

⁶La Ahab Recho lapen akaprek kehingno a-Israel arecho atum a-arjan endunlo, pima la Ahab asopi angbong inut aphan piso pangrilo. La HEMPHU aphan langplotsi pap klemlo,

⁷bonta David aro aphan kepavirdetji HEMPHU aninghanghe, pima Alangli David pen chechak-lo lapen la aso-asusi kaita pangri-longverpo pu chechak-lo.

⁸Jehoram Recho kecho ahut, Edom, Judah abethurlo, lapen isi kejok adet plang-lo.

⁹Lasi Jehoram lapen la achakri ronhemkonglong penpen damsi Edom tengkheng-lo. Hadak Edom aron-armu latum aphan kompet-lo, bonta ajo ahut latum kat-longsi chepajok-lo.

¹⁰Halaso ahut, pen amat Edom, Judah ator donangnedet-lo. Laso ahutsi Libnah arongsopi thurlo, pima Jehoram aphusar atum a-Arnam HEMPHU aphan obup-lo.

¹¹La Judah alongle kangtui adim-heihei along karchotap adim kimlo, Judah lapen Jerusalem arat-atum aphan HEMPHU abepathursi pap anat jalo.

¹²Elijah montri Jehoram aphansi isi aloh lolo, la lasonsi tok-lo, “Nangphusar David a-Arnam HEMPHU nangphan hingno pu hoktang-lo, pima nang nangpo Jehoshaphat Recho mate nangphu Asa Recho a-arjan en-dundedet-lo.

¹³La kalilesi nang Israel arecho atum a-arjan enlo lapen Judah lapen Jerusalem arat aphan Arnam anat kekroikre anat jalo, la Ahab lapen la aphi atum Israel aphan kepakroikre anat keja asonthot-lo. Nangphan kememuchot amonit nangkorte kedo-an aphanta nang pathi-et-lo.

¹⁴La athesi HEMPHU nangrat aso aphan nangsomar aphan lapen nangpiso atum aphan aduk pipikpo, lapen nang chepahemphu amar an pavir-etpo.

¹⁵Nangmethang amat ke nangphek akeso cholongsi arnivangta nang hingnobompo.”

¹⁶Ajehak a-Philisitia lapen Arab atum, ajehak Sudan atum adungsi talo akung dolo. Latum aphan HEMPHU chorungsi Jehoram abe ron pathurlo.

¹⁷Latum Judah tengkheng-lo, rechohem amar thipon-et-lo. Lapen Ahaziah la aso akebi pen apar recho apiso an lapen asomar an, bengpon-et-lo.

¹⁸Laso aphi recho aphek along HEMPHU kesopik akeso pavang-lo.

¹⁹Ningkan hini anbak keso nangkhaibomsi padu recho sopik pen thinang-lo. La arat atum la aphusar atum aphan keklem asonthot laphan amebui pipedet-lo.

²⁰Jehoram ningkan 32 arta ahutsi recho plang-lo, lapen Jerusalem along ningkan 8 pangrilo. La kethi ahut baduta aning dukdedet-lo. Laphan halatum David Arongsopi along pip-lo, bonta recho athiri along kali.