Read Karbi 2 PHURKIMO 23 Bible Online

2 PHURKIMO 23 - Karbi bible

2 PHURKIMO 23

¹Ningkan throk inghongsi kurusar Jehoiada kam keklem nangji aporlo pusi la mathathip-lo. La bangpho ron-armu achakri atum pen kechejok aloh Jeroham asopo Azariah, Jehoahanan asopo Ishmael, Obed asopo Azariah, Adaiah asopo Maaseiah, lapen Zikri asopo Elishaphat atum pen chepathik-lo.

²Latum Judah arongsopi an damlo, lapen Levi atum aphan lapen aro ajalin kedo-an halatum aphan Jerusalem van-et-lo.

³Kadokave Kardomhemthepi along chingrumlo, lapen hadak latum recho asopo Joash pen kechejok alo chepathik-lo. Halatum aphan Jehoiada pulo, “Kethilot arecho asopo ladak dolo! David aso-asu si recho cholongji pu HEMPHU kechechak atengsi la non recho plang nangpo.

⁴Laheisi cheklem nangpo. Kesang arni kurusar atum lapen Levi atum kam angdeng kecheklem ahut, phanthom pen ephan ke Kardomhem anghap-heihei ton nangpo.

⁵Akaprek ephan bang ke rechohem tonpo, lapen ahin atum an ke putah anghap along dopo. Kadokave arat anke Kardomhem atikup along chingrumpo.

⁶Adeng kedo akurusar atum lapen a-Levi atum pen apar baduta Kardomhem lut longlelo. Latum lut-longji pima, latum chepangthir-tang-lo, bonta ahin arat atum ke HEMPHU kepinkhat-heihei kroivek nangji lapen ingtansi donangpo.

⁷Levi atum recho adung arei halatum kesattang anokjir pen arjappet nangpo lapen recho kedam aling dun nangpo. Badutame Kardomhemthepi arlo kelutji kebor-i abangphan pathilotpo.”

⁸Levi lapen Judah arat atum Jehoiada kepinkhat-heihei klemlo, kesang arni pinso atum adim avedet seta halatum aphan toitedet-lo. Lasi hukum kepi atum kam kevang lapen kedam atum aphan seta lang-lo.

⁹chakri atum aphan Kardomhemthepi along kebi David Recho achin lapen achong-heihei Jehoiada pilo.

¹⁰La Recho aphan keparaijisi pinso atum aphan Kardomhemthepi athengno adung arei kesat-tang anokjir pen patonding-lo,

¹¹anke Joash aphan Jehoiada japonlo. Aphu athak recho aphutup kup-lo, lapen recho kecho ason aloh pilo. Lasonsi laphan recho paplang-lo. Jehoiada kurusar lapen la asopo Joash aphan jangthu patip-lo, lapen abangphutinta, “Recho achethe padingnang!” pusi hang-lo.

¹²Recho aphan kehangjo ase Athaliah arjulong-lo, lasi bangpi Kardomhemthepi rat atum kechingrum adim anat damserak-serak-lo.

¹³Hadak recho kemi kardomhem amangho along recho aphan kepanong a-archok along karjap lapen adung arei ron-armu achakri atum lapen pong-ut kebut atum kekompet bangpi thek-long-lo. Kedo-an arat atum aning arong pen hang-lo lapen pong-ut but-lo, lapen kardomhem alunse atum halatum kelun-i ajohton ketalon jalo. Bangpi aning ke-oi pen ape chingseksi hangserlo, “Chobeilo! Chobeilo!”

¹⁴Athaliah aphan kardomhem angkang Jehoiada kepathiji aning-hanghe, lasi ron-armu achakri aphan hangsi pulo, “Tonbang atum karjap-ren adak pen bangpi aphan ingtan pondet non, lapen bangpi aphan kepajokji kebor-i abangphan pathilotnon.”

¹⁵Latum bangpi aphan rechohem an phlung-lo, lapen hadak Losei Anghap along latum bangpi aphan pathilot-lo.

¹⁶Jehoiada kurusar ta Joash Recho long-lo lapen laphan rat atum chelangdunsi latum HEMPHU arat-lo pu kechejok aloh chepathik-lo.

¹⁷Anke latum Baal akardomhem sansi la phridam-et-lo. Latum hadak kedo adovan-heihei lapen akumlin-heihei theng-rairaisi dovan athengno Baal akurusar Mattan aphan pathilot-lo.

¹⁸Kurusar atum lapen Levi atum aphan Kardomhemthepi akam arpu Jehoiada pilo. Latum David Recho kepi akam adeng klemnangpo lapen Moses aron atengsi latum latum HEMPHU aphan athok-heihei pajir nangpo. Latum lun lapen ketalon-heihei chepahemphu nang-lo.

¹⁹Mane aron ateng pen kangthirthe doma la kepalangjisi Kardomhem anghap-heihei along Jehoiada tonbang atum patonlo.

²⁰Ron-armu achakri atum arlengkethe, ban atum lapen ahin kedo-an arat atum Jehoiada along chejengduntoisi recho aphan Kardom-hemthepi pen rechohem vanlo. Latum abinong anghap pen lutsi recho amethang recho anghoi chongnilo.

²¹Kadokave arat atum aning arong pen plengset-lo, lapen Athaliah aphan pathilot aphi rongsopi ingsamlo.