Read Karbi 2 PHURKIMO 24 Bible Online

2 PHURKIMO 24 - Karbi bible

2 PHURKIMO 24

¹Joash ningkan throksi arta ahutsi Judah arecho plang-lo, lapen la Jerusalem along ningkan 40 pangrilo.

²La apei Jebiah, Beersheba arongsopi pen Jehoiada kurusar rengtik an la HEMPHU aningkedok akam klemlo.

³Joash Recho aphan Jehoiada piso banghini ingvaipilo, lapen latum laphan pinsomar lapen arlosomar mahang pathekpilo.

⁴La recho chobom ahut, Kardom-hemthepi keselamthuji aphan chesik-lo.

⁵La kurusar atum lapen Levi atum an aphan Judah arongsopi an padamsi rat kedo-an pen Kardomhemthepi ningkan esek keselamji aphan dorphlup atangka keparungji ahukumpilo. Halatum aphan la paprapjin pen klemnangji pusi pulo, bonta Levi atum paderlo,

⁶lasi halatum ajalin Jehoiada aphan hangsi athe kopima arjulo, “HEMPHU kedo apehem aphan HEMPHU aban Moses Judah lapen Jerusalem arat atum pen kerungnangji amidu kopi apotsi nangli la lang dundedet-loma?”

⁷(Kehingno a-arloso , Athaliah atoi atum Kardomhemthepi phangnolo lapen kangthir amar Baal aphan karchoji enlo.)

⁸Tangka kerungji aphan isi Asinduk keselamji si Levi atum aphan recho hukumpilo, lapen la kardomhem anghap along pabilo.

⁹Latum Arnam aban Moses kejejangtang ajo kerungcheng asonsi abangphutinta HEMPHU aphan midu kepavanjisi Jerusalem lapen Judah adang an, alam pachethang-lo.

¹⁰Laso akam rat lapen halatum ajalin atum aphan aningpadok-lo, lapen halatum amidu atangka vansi sinduk la pen paplengset-lo.

¹¹Arnivangta Levi atum sinduk la hemphu recho aban along ponlo. La plengset lote recho achunbang lapen kurusarkethe atoi tangka ensi sinduk adimthot voisi la bi thupo. Lapen lasonsi latum ongdung atangka pangrumlong-lo.

¹²Recho lapen Jehoiada, Kardom-hemthepi kekim ahemphu aphan tangka pipo, lapen latum arlong kerokbang lapen thengpi akam klembang atum lapen ingchin akam klembang atum keselamji aphan rong-lo.

¹³Kam keklem atum kedo-an klem chepaduk-lo, lapen latum Kardomhemthepi aphrang arje asonthot selamthulo.

¹⁴Keselam patangsi, ahin aser lapen arup recho lapen Jehoiada aphan pilo, lapen latum Kardomhemthepi ke-enji aphan harlung-heihei lapen akaprek aphule-phukok paselamlo. Jehoiada rengtik an Kardomhemthepi along athok-heihei pibomlo.

¹⁵La arta ningkan 130 lesi, alangli thilot-lo.

¹⁶Alangli rat aphan, Israel aphan lapen Kardomhemthepi aphan kam keklem apot halatum laphan David arongsopi recho athiri alongsi pip-lo.

¹⁷Bonta Jehoiada thilot aphi, Judah ajalin atum Joash Recho aphan halatum alamsi parjutoilo.

¹⁸Lasi rat atum halatum aphusar atum a-Arnam HEMPHU aphan Kardomhemthepi along karcho ingtonkok-lo, lapen kumlin-heihei lapen arnampi Asherah akumlin-heihei aphansi archorong-lo. Halatum laso apap-heihei adai si Judah lapen Jerusalem aphuthak HEMPHU aning papung-lo.

¹⁹Latum la along pachiruithuji aphan HEMPHU montri atum aphan toilo, bonta rat atum arjumolo.

²⁰Anke Arnam akarjong Jehoiada kurusar asopo Jekaariah aphuthak nanghirlo. La rat atum kethek-long phrong adimsi arjap-lo, lapen hang-lo, “Arnam HEMPHU nangtum aphan arjulo, kopisi La ahukum kroikreloma lapen nangmethang aphuthak kevir chevanloma! Nangtum Alangliphan obup-lo, lapen Alanglita nangtum aphan obup-lo.”

²¹Joash Rechota Jekaariah aphan kephangnoji chelang-dunlo, lapen recho ahukum pen kardomhem atikup along Jekaariah aphan rat atum arlong varlo.

²²Jekaariah apo Jehoiada ko-an recho aphan rap-loma, la chetengnebup-lo, la Jekaariah aphan papthilot-lo. Jekaariah kethipo ahut la hangserlo, “Nangkopima keklem HEMPHU nangpalang lonang, lapen nangphan aduk nangpapi lonang.”

²³Halaso aningkan ningkreng nangleji dok-dok Siria aron-armu Judah lapen Jerusalem tengkheng-lo, lapen kadokave ajalin an aphan pathi-et-lo, lapen ongdung amar thiponsi Damaskas chedamlo.

²⁴Siria aron-armu ke ong-e bonta Judah aron-armu ongdung seta HEMPHU-si halatum aphan paremtoilo, pima rat atum Alangliphan, latum aphusar atum a-Arnam HEMPHU aphan obup-lo. Lasonsi Joash Recho aphan adukpilo.

²⁵La arengsopik-lo, lapen ahotur atum dam-et aphita la aban atum banghini Jehoiada kurusar asopo aphan kepathi alar kehuijisi laphan amek kejang angdeng along pathilot-lo. Laphan David Arongsopi alongsi pip-lo, bonta arecho athiri along kali.

²⁶Laphan kepathi abang Ammonpi Shimeath, asopo amen Zabad lapen inut a-Moabpi amen Shimrith asopo Jehozabad.

²⁷Kechok alam recho atum aloh along Joash asopo atum atomo alam laphan kemontri alam lapen la kopusonsi Kardomhemthepi kimloma, aketok do. La asopo Amaziah si la alar recho cholo.