Read Karbi 2 PHURKIMO 25 Bible Online

2 PHURKIMO 25 - Karbi bible

2 PHURKIMO 25

¹Ningkan 25 arta ahutsi Amaziah recho plang-lo, lapen alangli Jerusalem along ningkan 29 an pangrilo.

²Alangli HEMPHU aning kedok akam si klemlo, bonta keklem bor-i.

³Alangli ajakong chelongdet aphi alanglipo aphan kepathi achakri atum aphan la pathilo,

⁴bonta halatum asomar atum aphan la pathithedet-lo, bonta Moses Aron aloh along kopisi HEMPHU hukum kepima la klemlo: “Asomar keklem kepathi akam keklem pen ajok halatum apo-apei aphan pathi longle, lapen apo-apei kepathi keklem akam pen ajok halatum asomar atum aphan pathi longle; inut amonit kepathi akam keklem apotsi halaphan pathilongchotji.”

⁵Judah lapen Benjamin akhei kedo-an pinsomar amonit pen Amaziah Recho esong ron-armu seng-lo, lapen halatum aro atengsi bilo, lapen bangsuri isi amonit angbong inut apinpo, lapen bangpharo isi angbong inut apinpo bat-lo. La inut apinso amonit arta ningkan 20 pen ha akesar an pangrumpet lak kethom do. Latum kehumjok aron-asong, ron aphan chesikven atumlo, chir-heihei lapen nokjir-heihei ke-otthek atumlo.

⁶La apar alangli lak isi aron-aso Israel adet pen rup lin 3,400 pisi rong-lo.

⁷Bonta inut amontri recho along damsi alangliphan pulo, “La Israel aron-aso atum aphan nanglilong cheponri. HEMPHU-ke la Nirep adet amonit atum along ave.

⁸Ron along latum nangliphan pangtang muchotpo pu nangli matha tahai, bonta HEMPHU-si pahaiji mate paremji, lapen alangli nangli hotur atum aphan nangliphan paremdetpo.”

⁹Montri aphan Amaziah arjulo, “Bonta ne halatum aphan kepitang arup ke kopusonpo?” Montri thak-lo, “La an sose HEMPHU nanglipidet un!”

¹⁰Lasi Amaziah kerong aron-asong toi-et-lo, lapen halatum aphan ahem pachedamtoilo. Laso alam apot halatum Judah arat aphuthak un an aningthisi hem chedam-et-lo.

¹¹Amaziah angthin chepangtangsi Ingti Arlok anat aron-armu japonlo. Hadak latum ron chedansi bangsuri kep a-Edom aron-aso atum aphan pathilo,

¹²lapen akaprek bangsuri kep aphan nep-lo. Latum Sela arongsopi alum athak ponsi halatum aphan longchong alum pen nangvarchor lo, anke halatum aber kedo a-arlong along klophratsi thilo.

¹³Halaso ahut Amaziah along ron kepadun longle a-Israel aron-aso atum Samaria lapen Beth Horon adak Judah arongsopi-heihei tengkheng-lo, lapen bangsuri kethom apinso amonit aphan pathilo, lapen ongdung amar thiponlo.

¹⁴Amaziah Edom aso aphan paremsi nangkechevoi ahut, la along halatum akumlin-heihei vandet-lo, lahei parjapsi archolo lapen lahei along mephik thorlo.

¹⁵Laso akam HEMPHU aphan aning pakang-lo, lasi Alangli Amaziah aphan inut amontri toilo. Montri abang hang-lo, “Kopisi nangli bang adet a-arnam-heihei, halatum amethang amonit aphan ajakong pen kepajok un-e aphanle karcholoma?”

¹⁶Komantulo, Amaziah lam beng-pet-lo, “Netum nangphan recho aphan keparebang nangbatma? Lam ingtonnon mate ne nangpathi nangkokpo!” Montri abang keningje ingtonkok-lo, bonta ethe ningje bor-idet-lo, “Non neli chinilo, Arnam nangliphan kepavirjisi chesik-lo, pima nangli lahei klemlo, lapen neli kepare arjuje-lo.”

¹⁷Judah arecho Amaziah lapen laphan parebang atum Israel abe thurlo. La anke Israel arecho Jehoash aphan isi abirta lolo, la Jehoahaz asopo lapen Jehu asulo, lapen ron-kechedanji phalo.

¹⁸Jehoash laso abirta pen Amaziah aphan thak-lo, “Ephong Lebanon anglong abapsudo kedar athengpi aphan isi abirta lolo: ‘Nesopo aphan nangsopi penan chopinon.’ Marat api hapu damsi bapsudo arong donglamlo.

¹⁹Non Amaziah Edom aphan paremdet apotsi nang cheparoka ilo, bonta ne nangphan hem kedojoiji aphansi nangparelo. Kopi athesi nangphuthak lapen nangrat aphuthak akevir kevangji akesung chopha loma?”

²⁰Bonta Amaziah karjuji molo. Amaziah keremdet nangji ke Arnam aning kehang-lo, pima la Edom aso atum akumlin-heihei aphan ardomtang-lo.

²¹Lasi Israel arecho Jehoash ta Judah arecho Amaziah abe ron thurlo. Latum Judah along Beth Shemesh pu adim chetong-lo.

²²Judah aron-armu atum remdet-lo, lapen ron-aso atum halatum ahem chekat-et-lo.

²³Amaziah aphan Jehoash nepchek-lo, lapen laphan Jerusalem pondet-lo. Haladak la rongsopi apai Ephraim Anghap pen ha Ano Anghap an phri-et-lo, ajak-keding mitar 200 an.

²⁴La Kardomhemthepi along aser, lapen arup an lapen Obed Edom aso-asu atum keton Kardomhem amar an, lapen rechohem akhipuru-heihei amar la Samaria pon-et-lo. La along keru-kethai a-arloso aphanta ponlo.

²⁵Israel arecho Jehoash thidet aphi Judah arecho Amaziah ningkan 15 an reng-lo.

²⁶Amaziah akeprek keklem akam an kecheng pen kejut la recho kecho an Judah lapen Israel arecho atum aphurkimo along tok-et-lo.

²⁷La HEMPHU aphan langplot pen keklem arni pen laphan Jerusalem along kepathiji kebor-i doverlo. Padu la Lakish pu arongsopi anat katnangjuilo, bonta la ahotur hadak anta hungdunsi hadak laphan pathilot-lo.

²⁸La abang arpum losei athak batsi Jerusalem vandet-lo, lapen laphan David Arongsopi recho athiri-heihei along pip-lo.