Read Karbi 2 PHURKIMO 26 Bible Online

2 PHURKIMO 26 - Karbi bible

2 PHURKIMO 26

¹Judah arat kedo-an Amaziah alar la ningkan krethrok arta asopo Uzziah aphansi recho ingvailo.

²(La Amaziah thidet aphi si Elath che-enthulo, lapen rongsopi kimthulo.)

³Ningkan krethrok arta ahutsi Uzziah Recho plang-lo, lapen la Jerusalem along ningkan 52 pangrilo. La apei Jekoliah, Jerusalem pen.

⁴Apo arjan endunsi la HEMPHU aning kedok akamsi klemlo.

⁵Jekaariah, la dhorom anat pare abang rengtik an la kekroithip pen HEMPHU aphan ingduk-lo, lapen laphan Arnam pahirjumelo.

⁶Uzziah damsi Philistia atum pen ron chedanlo. Alangli Gath, Jamnia lapen Ashdod arongsopi-heihei apaisong lapen ahin Philistia adang an kimlo.

⁷Philistia atum Gurbaal kedo Arab aso lapen Meuni aphan keparemjisi laphan Arnam rapdunlo.

⁸Ammon aso atum Uzziah aphan midu pinang-lo, lapen la anong lapen ajakong thelo, la anong Ijip adet anta chethang-lo.

⁹Ano Anghap along, Arlok Anghap along lapen paisong kekek adim along an hemchardon-heihei kekim pen ajok Jerusalem apaisong Uzziah pangtang-lo.

¹⁰Rong ahidi ajo ta alangli hem chardon-heihei kimlo, lapen ongdung alangtuk-heihei tuk-lo, pima la nichi anglong akeng-ri-heihei along lapen thoi ajo ongdung kepangreng api dolo. Pima la sai ketiki aning dok-o, la rat atum aphan inglong akeng-ri drakha arikang arong pa-etoilo, lapen aho-or kedo alongle along sai kepaklemji aning parung-lo.

¹¹Ron kechedanji aphan la ongdung aron-armu kesiktang do. Lahei la achunbang atum Jeiel lapen Maaseiah si tokdunlo, lahei akam langcharibang, Hananiah si langdunlo.

¹²Ron-armu ke bang 2,600 achakri atumsi chepahemphulo.

¹³Latum aber lak thomra bang suri throksi ra pharopho aron-aso recho ahotur pen chedan pamethek atumlo.

¹⁴Ron-armu aphan Uzziah chong-heihei, chir-heihei, phutup-heihei ron achoi-heihei, thai lapen thai-aso lapen phamri kevarji aphan long koiso-heihei pilo.

¹⁵Jerusalem along la keplangmi atum thai aso-heihei lapen hemchardon angsong pen lapen rongsopi apaisong ano-heihei pen nang kevar aphan arlong angkleng selamlo. La anong bithe-bitha ta chethang-lo, lapen la ajakong thepik-lo, pima Arnam pen akerap kelong apot.

¹⁶Bonta Uzziah Recho ingtangrak ahut la bang alam arjujebomlo, la si laphan pavirlo. La Kardomhemthepi along damsi mephik kethor adovan along mephik kethor pen ajok amethang a-Arnam HEMPHU aphan kroimolo.

¹⁷Azariah kurusar along bang 80 kangtangrak lapen angthinkethe akurusar atum recho aphan kekhamkhe dunjisi aphi aphi dunlo.

¹⁸Latum pulo, “Uzziah! HEMPHU aphan nangli mephik kethorji jakong ave. Aaron aro pen kevang akurusar atumsi laso akam aphan pangthirchot. Laso kangthir adim onon. Nangli Arnam HEMPHU aphan aning padokde-tang-lo, lapen nangli la ahirjume longlelo.”

¹⁹Mephik Adovan adungsi Uzziah Kardomhemthepi along arjaptherlo lapen mephik kethor aphule otdong-lo. La kurusar atum aphan aningthilo, lapen menmen amat atehang along si-i akeso nangchithit-ronlo.

²⁰Azariah lapen akaprek akurusar atum kephere pen recho atehang along lang-lorlo, lapen alangliphan Kardomhemthepi pen pa-o-bor-idet-lo. Alangli barserak-serak-lo, pima alangliphan HEMPHU aduk pitang-lo.

²¹Ahin akai an Uzziah Recho aron-ateng pen ingthirthedet-lo, pima la akeso apot. Kardomhemthepi arlo puthot lutdam longledet-lo, la amethang ahem along donang-lo, kadokave akam pen sangsi la asopo Jotham si det palang-lo.

²²Amoz asopo Isaiah montrisi Uzziah Recho kecho esek ahut keklem akaprek akam an tok-lo.

²³Uzziah thilo lapen recho aphan kepip alongle along pip-lo, bonta la akeso apot alangliphan recho athiri-heihei along pippedet-lo. La asopo Jothamsi la alar recho cholo.