Read Karbi 2 PHURKIMO 27 Bible Online

2 PHURKIMO 27 - Karbi bible

2 PHURKIMO 27

¹Ningkan 25 arta ahutsi Jotham recho plang-lo, lapen la Jerusalem along ningkan 16 pangrilo. La apei Jerushah, Zadok asopi.

²La apo keklem ason HEMPHU aning padok akamsi klemlo, bonta apo asonsi la mephik kethor pen ajok Kardomhemthepi along pap klemkle. Bonta rat atum ke pap klembomlo.

³La Jothamsi Kardomhemthepi a-Nirep Anghap kimlo, lapen Jerusalem angkang Ophel pu adim rongsopi apaisong akampi klemlo.

⁴Judah anglong-heihei along la rongsopi-heihei kimlo, lapen nampi ajo chepachong ahem lapen hemchardon-heihei kimlo.

⁵La Ammon arecho lapen la aron-armu pen chedanlo, lapen halatum aphan paremdet-lo. Anke Ammon atum aphan la aningkanvang lahei ningkan kethom an midu alangliphan papinang-lo: Lin 3,400 arup, mon 2000 athengthe, lapen mon 2500 asoktipli,

⁶Jotham nang ingtangbomlo, pima la a-Arnam HEMPHU aphan kroipamelo.

⁷Akaprek ason la keparcho ahut, la aron-heihei, lapen kam keklem akaida-heihei Judah lapen Israel a-recho atum Aphurkimo along kedo-an tok-lo.

⁸Jotham Recho keplang ahut arta ningkan 25 vet-lang, lapen Jerusalem along la ningkan 16 pangrilo.

⁹La thilo, lapen David Arongsopi alongsi pip-lo, lapen la asopo Ahaz si la alar recho cholo.