Read Karbi 2 PHURKIMO 28 Bible Online

2 PHURKIMO 28 - Karbi bible

2 PHURKIMO 28

¹Ningkan 20 arta ahutsi Ahaz recho plang-lo, lapen la Jerusalem along ningkan 16 pangrilo. Alangli aphusar David Recho akam arjan endundedet-lo; lapen HEMPHU aning kedokde akamsi klemlo,

²lapen Israel arecho atum a-arjansi endunrong-lo. Alangli Baal akumlin kangtangrak amar pen paselamlo,

³Hinnom Arlok along mephik thorlo, lapen Israel aso kethe ahut HEMPHU kephlungtang arat atum kecheseke kehijim-meme akam charli dunsi kumlin-heihei along kephrin athok aphan asopomar pidet-lo.

⁴Karchotap-heihei adim-heihei along, inglong-heihei athak, thengpi abin arum along, athok-heihei lapen mephik-heihei Ahaz thorlo.

⁵Ahaz pap keklem apotsi, alangli a-Arnam HEMPHU laphan Siria arecho parem longtoilo, lapen ongdung a-Judia atum aphan Damaskas anat beng pon-et-lo. HEMPHU-si puthot Israel arecho Remaliah asopo Pekah arideng Ahaz aphan paremlo, lapen arnisi angbong Judia angthin-kethenei aron-aso bang suri 120 pathilo.

⁶Halatum aphusar atum a-Arnam HEMPHU la paplang long-lo, pima Judah arat atum alangliphan obup-lo.

⁷Inut Israel aron-aso amen Zikri pu abang Ahaz Recho asopo Maaseiah, rechohem kelang abang Azrikam, lapen Elkanah, recho adun hukumpibang aphan pathilot-lo.

⁸Judah aso atum halatum chepho-chero saide lo seta Israel aron-armu atum lakni a-arloso lapen osomar atum aphan beng ponsi kethipon ongdung amar penpen Samaria pondet-lo.

⁹Inut amonit amen Oded, inut HEMPHU amontri, Samaria arongsopi alongsi kedo. Israel aron-armu atum kebengpon Judah aso atum penpen rongsopi nanglutji dok-dok-lo, alangli chetongdunlo, lapen pulo, “Nang phusar atum a-Arnam HEMPHU Judah aputhak aningthilo lapen halatum aputhak nangtum aphan pahaitoilo, bonta la nangtum halatum aphan kechenek akepathi arjulong-lo.

¹⁰Lapen non Jerusalem lapen Judah apinso-arlo aphan nangtum ban kebiji nangninghang-lo. Nangtum chechininema nangtumta nangtum a-Arnam HEMPHU aphan langplotsi pap klemtang-lo pu?

¹¹Ne lam arjutha! Lahei kebengtang atum nangkorte lapen nang ingjir atum saidelo. Latum aphan pachevoi longnon, kalite aning kethi pen HEMPHU nangtum aphan aduk nangpidetpo.”

¹²Nirep adet bangphli ajalin atum Jehohanan asopo Azariah, Meshillemoth asopo Berekiah, Shallum asopo Jehizkiah, lapen Hadlai asopo Amasa atum ta ron-armu atum akam khindedunlo.

¹³Latum pulo, “Lahei kebengtang amonit ladak vanri! Ephan eduk ekepiji aphan dorphlup apap HEMPHU aphan langplotsi klemtang-lo, lapen aning pathilo. Non nangtum pine keklem pen ajok etum ado pa-onglipo.”

¹⁴La ansi ron-armu atum kebengpon amuluk atum lapen kethipon amar an rat lapen halatum ajalin atum arideng hodai-et-lo,

¹⁵lapen bangphli amonit atum kethipon amar ensi latum aphan pe-ri pilo. Halatum latum aphan pen lapen kengden pa-i-lo, kecho-kejun dorphlup pilo lapen halatum amek keso adim jit ajangthu hilo. Kedam ke-un-e, ke-aini atum aphan gadha-heihei athak pardonlo, lapen kebengpon amonit an aphan Judah alongri Sotele arongsopi Jeriko along thondunlo. Ansi Israel aso atum ha Samaria ahem anat chevoithulo.

¹⁶Puthot Edom aso atum Judah tengkhengsi ongdung amonit aphan bengponlo,

¹⁷lasi Ahaz Recho, Assiria Arechokethe Tiglath Pileser akerap chohang-lo.

¹⁸Halaso ahut amat Philistia atum nichi angbong akeng-ri arongso-heihei lapen Judah anitur anat Philistia atum nichi anglong akeng-ri arongsopi-heihei lapen Judah anitur anat tengkheng-lo. Latum Beth Shemesh, Aijalon lapen Gederoth, Soko, Timnah, Gimzo arongsopi-heihei halahei arong penpen cheraidet-lo, lapen hadak doverlo.

¹⁹Pima Judah Ahaz Recho arat ajakong ingdilo, lapen HEMPHU aphan kroimolo. Lasi Judah aputhak HEMPHU akesung-heihei vanlo.

²⁰Assiria Arechokethe, Ahaz aphan kerapji kali laphan khindesi pasung thurong-lo.

²¹Lasi Ahaz Kardomhemthepi, rechohem lapen rat ajalin atum ahem-heihei pen ser ponsi rechokethe aphan pidamlo, bonta la-jokta akerap longledet-lo.

²²La akesung tanpiksi laso amonit Ahaz HEMPHU aphan langplotsi aphrang an sose pap klemthumuchot-lo.

²³Laphan keparem Siria atum a-arnam-heihei aphan la athok-heihei pilo. La pulo, “Siria atum a-arnam-heihei, Siria arecho atum aphan rap-lo, lasi ne jongsi latum aphan athok pilote, latum nephanta nerap tahai.” La laphan lapen adet aphan akevir vanlo.

²⁴La aparta, la kardomhem amar an ponsi beng-ilo. La Kardomhemthepi ingkir-het-lo, lapen Jerusalem bithe-bitha adang dovan-heihei parjap-lo.

²⁵Judah arongsopi lapen arongtinta, la karchotap adim-heihei kimlo, hadak bang adet a-arnam-heihei aphan mephik thorlo. Lasonsi la aphusar atum a-Arnam HEMPHU aningkethi amethang aphuthak chevanlo.

²⁶La recho-kecho akaprek ongdung an kecheng pen kejut an Judah lapen Israel Arecho atum Aphurkimo along tok-et-lo.

²⁷Ahaz Recho thilotsi Jerusalem along pip-lo, bonta recho athiri-heihei along kali. La asopo Hezekiah si alanglilar recho cholo.