Read Karbi 2 PHURKIMO 29 Bible Online

2 PHURKIMO 29 - Karbi bible

2 PHURKIMO 29

¹Ningkan 25 arta ahutsi Hezekiah, Judah arecho plang-lo, lapen la Jerusalem along ningkan 29 pangrilo. Alangli pei Abijah ke Jekaariah asopi.

²Alangli phusar David Recho arjan endunsi, HEMPHU aphan aning kepadok akam klemlo.

³Hezekiah Recho keplang anin-gkan kecheng achiklo, alangli Kardom-hemthepi anghap-heihei ingputhulo, lapen selamphruilo.

⁴Alangli Kardomhemthepi nihang atikup anat isi kurusar atum lapen Levi atum arong pachingrumlo,

⁵lapen hadak halatum aphan thanlo. Alangli pulo, “Nangli Levi atum, nangphusar atum a-Arnam HEMPHU a-Kardomhemthepi kepangthirjile nangmethang chepang-thirnon. Kardomhemthepi aphan aman kepave amar an la tereket-non.

⁶Ephusar atum HEMPHU aphan kroithip thekthedet-lo, lapen Alangliphan aning kepadokde asonsi klemlo. Halatum laphan obup-lo, lapen Alangli kedo-an adim latum panungkuk-lo.

⁷Latum Kardomhemthepi anghap-heihei ingkirphlup-lo, melur ame thorthe det-lo lapen mephik thorthe mate Israel a-Arnam Kardomhemthepi along kephrin athok-heihei pi thek-thedet-lo.

⁸Pima, laso apotsi Judah lapen Jerusalem aphuthak HEMPHU aningthilo, lapen latum aphan la keklem akam abangphutin aphan pathirik-lo, lapen papherelo. La nangtum chinipame.

⁹Epo atum ron along thi-et-lo, episo atum, esomar atum aphan bang pon et-lo.”

¹⁰Ne lasi Israel a-Arnam HEMPHU pen kechejok aloh chepathikji aphan chesik-lo, anke La etum aphan aningthithelo.

¹¹Sopo atum apor padamrinon. Nangtum aphan mephik kepathorji aphan lapen Alangliphan rat atum karchojile kepajaponji aphansi HEMPHU nang ingvaitang-lo.

¹²Lahei a-Levi atumsi hadak dolo: Kohath aro pen Amasai asopo Mahath, lapen Azariah asopo Joel. Merari aro pen Abdi asopo Kish lapen Jehallel asopo Azariah. Gershon aro pen Zimnah asopo Joah lapen Joah asopo Eden.

¹³Elizaphan aro pen Shimri lapen Jeuel. Asaph aro pen Jekaariah lapen Mattaniah.

¹⁴Heman aro pen Jehuel lapen Shimei. Jehuthun aro pen Shemaiah lapen Uzziel

¹⁵Lahei amonit atum, halatum chepho-chero a-Levi atum aphan pangrumlo, lapen halatum kedo-an amethang chepangthirlo. Anke halatum aphan recho kepaklemtoi asonsi halatum HEMPHU Aron ateng pen Kardomhemthepi pangthirlo.

¹⁶La kepangthirji aphan kurusar atum la arlo lutdamlo, lapen aron ateng pen kangthirthe amar an ingtan vansi kardomhem atikup arlo van-et-lo. Hadak pen Levi atum rongsopi angtan la ponsi ha Kidron arlok anat lahei kedo-an pondet-lo.

¹⁷Kecheng achiklo, kecheng arni kam cheng-lo, lapen nerkep arni latum kam kedo-an lapen Kardomhemthepi amangho anta patang-et-lo. Ansi puthot ni nerkep aphan klemsi chiklo ejon angbong krethrok arni an Kardomhemthepi karchoji aphan sik-lo.

¹⁸Levi atum Hezekiah Recho aphan lahei alam-pachinilo: “Nelitum Kardomhemthepi kephrin athok-heihei aphan adovan, kangthir ahim aphan atebul lapen la kenang amar an aron ateng kepangthir akam papleng-et-lo.

¹⁹Lapen Ahaz Recho la Arnam aphan kekroithekthe aningkan-heihei angbong kepon kedo-an amar-heihei nelitum vanthulo, lapen nelitum halahei hodaithudet-lo. Lahei kedo-an HEMPHU adovan angno si dopet-lo.”

²⁰Paderdesi Hezekiah Recho rongsopi ajalin atum aphan pangrumsi halatum penpen Kardomhemthepi anat dam rap-rap-lo.

²¹Recho ahemtun lapen Judah arat kepaponji athok aphan lapen Kardomhemthepi kepangthirji aphan latum jonthroksi achainong alo, jon throksi abiresak, jon throksi biresak aloso, lapen bi jon throksi enlo. Aaron asu akurusar atum aphan dovan athak pi athok kepapijisi recho pulo.

²²Aphrang si kurusar atum chainong that-lo, laso aphi biresak, lapen biresak aloso, lapen athoktin avi dovan athak arsilo.

²³Padu si kurusar atum, recho lapen akaprek karcho atum along bi ponlo, halatum lahei aputhak ari bat-lo.

²⁴Anke kurusar atum bi thulo, lapen lahei avi rat kedo-an apap kepaponji athok asonsi dovan athak vi arsilo, pima kedo-an a-Israel aphan kepathok athok lapen kephrin athok-heihei kepapiji aphan recho hukum pitang-lo.

²⁵Recho amontri Gad lapen Nathan montri pen ajok David Recho aphan HEMPHU kepinkhat ason an recho paklemlo; la Levi atum aphan Kardomhemthepi along kum-beleng-heihei lapen prakso-heihei,

²⁶David arni ahut kerim ajohton pen pachingtonlo. Kurusar atumta pong-ut-heihei penpen arjapdun-phrong-lo.

²⁷Kephrin athok kepapiji aphan Hezekiah hukumpilo; lapen athok kepi cheng si, rat atum HEMPHU akero alun lunlo, lapen duhuidi atum pong-ut lapen akaprek ajohton pen kethip-kerot pangcheng-lo.

²⁸Hadak kedo abangphutinta karcho lapen kelun along cheto dunlo, lapen athok kephrin cho-et-etik lunbom, lapen kerot padobomlo.

²⁹Anke Hezekiah Recho lapen rat kedo-an akengphu patongsi Arnam aphan archolo.

³⁰David lapen Asaph montri ketok alun-heihei HEMPHU aphan lun kepalunjisi recho lapen det ajalin atum Levi atum aphan pulo. Lasi abangphutinta akengphu patongrui pen Arnam aphan karcho ahut aning arongpik pen lun lunlo.

³¹Rat aphan Hezekiah pulo, “Non nanglitum aron ateng pen ingthir-et-lo, HEMPHU aphan kero kepi athok-heihei vannon.” Halatum kroisi ajehak atum kephrin athok-heihei kepiji aphan aningkehang pen pi vanlo.

³²Halatum jon 70 achainong alo, jon 100 abiresak, lapen jon 200 abiresak aloso HEMPHU aphan kephrin athok vanpilo;

³³halatum jon 600 achainong alo lapen jon 3000 abiresak rat kechoji athok vanlo.

³⁴Lahei api kethatji aphan dorphlup akurusar avedet apotsi akam plengpletik halatum aphan Levi atum rap dunlo, la pen ajok ongdung akurusar atum aron ateng pen amethang chepangthirlo. (Kurusar atum an aphan mute Levi atum aron ateng kekroi pen chepangthir muchot.)

³⁵Arpum pen kephrin athok-heihei kepi pen aparta rat atum kecho angbong pen kepi athu kephrin athok along kepidun adrakha ahorlang kedungdun ke kurusar atum arpulo. Lasi Kardomhemthepi karcho chechengthulo.

³⁶Hezekiah Recho lapen rat atum aning arong-o, pima lahei Arnamsi paprapjin keklem thekji aphan rapdunlo.