Read Karbi 2 PHURKIMO 30 Bible Online

2 PHURKIMO 30 - Karbi bible

2 PHURKIMO 30

¹Kechengsi achiklo, athik apor ahut rat atum Kejok Amei Arong-aje talon thekthelang. Pima kedorphlup akurusar aron ateng pen keche-pangthirtang avelang, lapen ongdung arat Jerusalem along chetong-petpelang.

²Lasi Hezekiah Recho alangliban atum aphan, lapen Jerusalem arat atum aphan la hini achiklosi ketalonji aphan cheparailo,

³lapen Recho alam Israel arat kedo-an lapen Judah arat aphan pachinipet-lo, la Ephraim lapen Manasseh akhei aphan loh kepaleji aphan akenangsot ake-ora pen loh palolo, lapen Israel a-Arnam HEMPHU aphan man kepijile Kejok ketalonji aphan Jerusalem a-Kardomhemthepi along halatum aphan kepavangjisi phalo.

⁴Halatum akemang akam along recho lapen rat atum anta aning dok-hurlo,

⁵lasi latum kedo-an a-Israel aso aphan Nirep anat Dan pen Nitur anat Beersheba pen Jerusalem along vangsi aphrang pen aphai ong muchot aron pen Kejok Amei ketalon thekji aphan phalo.

⁶Recho lapen la aban atum ahukum apot pherangke atum lahei kepha alam penpen Judah lapen Israel adang an damlo: Israel arat atum, det Assiria aron pen kejok atum an. Non Abraham, Isaak lapen Jakob a-Arnam HEMPHU along vangthunon, lapen alangli nanglitum along vangthupo.

⁷Halatum a-Arnam HEMPHU aphan kekroithipthe nangliphusar atum lapen nangli korte Israel atum ason cheplangri. Nanglitum kethek-long ason, alangli halatum aphan aduk pipik-lo.

⁸Halatum ason bang alam arjujeri, bonta HEMPHU aphan kroinon. Nang Arnam HEMPHU kaike aphan kroinon, kepangthirtang a-Kardom, hemthepi, Jerusalem along vangpetnon, lapen Alangliphan archonon anke Alangli nanglitum aphan aning thivervedetpo.

⁹Nanglitum jongsi HEMPHU along nang chevoithu lote, nanglitum adon-arap aphan kebeng pon atum halatum aphuthak jinsopo lapen halatum aphan hem pachevanglongpo. Nanglitum a-Arnam HEMPHU ke nanglitum aphan mathapik lapen kangjinso thepik, nanglitum jongsi Alanglilong chevoithulote, Alangli nanglitum aphan dengji.

¹⁰Pherangke atum Ephraim lapen Manasseh akhei, lapen ha nirep Zebulun akhei alongri arongsopitinta damlo, bonta rat atum latum aphan ingnekchoisi pinremdunlo.

¹¹Tebonseta, hadak Asher, Manasseh lapen Zebulun akhei pen Jerusalem kevangji aninghang-lo.

¹²Arnamta Judah along kam klemsi recho lapen la aban atum ahukum-heihei pachedondun pen ajok la aningkehang kepakroithipjisi rat aning isipet-lo.

¹³Thapkave a-Him Arong-aje ketalonjisi ake-ongpi arat atum hini achiklo Jerusalem along chetongpet-lo.

¹⁴Halatum athok-heihei kepiji aphan, lapen mephik kethor-i aphan Jerusalem along ke-en adovan-heihei kedo-an pensi lahei Kidron arlok along vardam-et-lo.

¹⁵Lapen chiklo angbong krephli arni latum Kejok Amei athok aphan biresak alo-heihei thulo. Aron ateng pen kangthirthe akurusar atum lapen a-Levi atum therak-ongsi latum amethang-methang HEMPHU aphan chehodailo, lapen non latum Kardomhemthepi along kephrin athok-heihei pi unlo.

¹⁶Arnam amonit Moses aron along kepinkhat ateng Kardomhemthepi along latum adim-heihei chedolo. Levi atum athok-heihei avi kurusar atum aphan pilo, latum lahei dovan athak arsilo.

¹⁷Pima ongdung arat atum aron ateng pen kangthir-et kalidet apotsi, latum Kejok Amei abiresak alo-heihei thu longledet-lo, lasi halatum alar Levi atum si la klempilo, lapen biresak alo-heihei HEMPHU aphan hodailo.

¹⁸La aparta, Ephraim, Manasseh, Issakar, lapen Zebulun akhei angbong pen kevang ongdung amonit atum aron ateng pen chepangthirthedet-lo, lapen latum Kejok Amei ahokpet pen talon thekthedet-lo. Halatum aphan Hezekiah Recho laso akardomsi ardom pilo:

¹⁹“O nephusar atum a-Arnam HEMPHU, Nangli mesen apot aron ateng pen chepangthirthe seta aning aklong pen Nangliphan karcho atum an aphan diyatha.”

²⁰Hezekiah Recho akardom HEMPHU thak-lo; Alangli rat atum aphan diyalo lapen halatum aphan pasungsedet-lo.

²¹Ni throksi an rat atum Jerusalem along chingrumsi Thapkave a-Him Arong-aje ning arongpik pen talonlo, lapen ajakong kedo-an pen arni arni la Levi lapen kurusar atum HEMPHU aphan rolo.

²²HEMPHU anat halatum asaikedo pen karcho kejathek apot Levi atum aphan Hezekiah chorolo. Ni throksi halatum aphusar a-Arnam HEMPHU aphan kero pen athok-heihei halatum pidet aphi,

²³latum puthot ni throksi aphong salajong ketalonthuji aphan cheparailo. Lasi latum aning arong pen talonlo.

²⁴Rat atum kethatji lapen kechoji aphan Hezekiah Recho jon 1000 achainong alo lapen jon 7000 abiresak pilo, lapen aban atum halatum aphan jon 1000 achainong alo lapen jon 10,000 abiresak pilo. Ongdung akurusar atum aron ateng pen chepangthirlo.

²⁵Lasi abangphutin Judah arat atum lapen nirep pen kevang arat atum lapen Israel lapen Judah adet kedo bang adet aso atum anta chehokpik-lo.

²⁶Jerusalem arongsopi ta ning arong pen plengset-lo, pima David asopo Solomon Recho arni pen nonpu-an lason avepinlang.

²⁷Kurusar atum lapen Levi atum rat aphuthak ahirjume hangpilo. Alangli sining ahem pen halatum akardom Arnam thak-lo, lapen latum aphan deng-lo.