Read Karbi 2 PHURKIMO 31 Bible Online

2 PHURKIMO 31 - Karbi bible

2 PHURKIMO 31

¹Rong-aje jutsi, kedo-an Israel arat atum Judah arongsopitin damsi arlong archok-heihei bengdamlo, arnampi Asherah akumlin-heihei chorpet-pet-lo, lapen dovan-heihei lapen karchotap adim-heihei pavirlo. Judah adang an, lapen Benjamin, Ephraim lapen Manasseh alongri anta lasonsi halatum klemlo; anke kadokave atum ahem chevoilo.

²Kurusar atum lapen Levi atum asong Hezekiah Recho sengthulo, laso along halatum abangphutin kechinidak adeng pirep-lo. Lahei angbong kephrin athok-heihei, kardomhem akarcho along kechetodun, lapen Kardom-hemthepi akaprek kaprek ongdung along akero kepi-heihei ta parloponlo.

³Amethang api ahur pen si la adapvang lapen aningvevang kephrin athok-heihei akenang api padorlo, lapen kesang arni akepi, Chiklo kemi Arong-aje, lapen HEMPHU Aron ateng pen akenang akaprek arong-aje-heihei akenang anta padorlo.

⁴La aparta kurusar atum lapen Levi atum kelang nangji an Jerusalem arat aphan athok-heihei kepavanjisi pulo, anke latum HEMPHU Aron akenang apor an latum chepi thekpo.

⁵Hukum kepi pen amat Israel arat atum halatum akemenei asok, adrakha ahorlang, jit ajangthu, pijo alang, akaprek ketiki asai atum, adan-heihei, phankep pen ephan pen vanlo,

⁶lapen halatum kelong amar pen phankep pen ephan vanlo, lapen halatum ongdung adan-heihei ta vansi halatum a-Arnam HEMPHU aphan hodaidet-lo.

⁷Dan-heihei kethom achiklosi nangkelecheng-lo, lapen phli achiklo anke nanglebomsi pangsomdup-lo.

⁸Hezekiah Recho lapen alangliban atum lapu-an kepi thek-longsi latum HEMPHU aphan lapen arat Israel aso aphan chorolo.

⁹Dan-heihei alam kurusar atum aphan lapen Levi atum aphan recho thanlo,

¹⁰lapen Azariah kurusarkethe, inut Zadok asu laphan pulo, “Rat atum halatum adan-heihei kevan chengbomlo apot, kechoji aphan dorphlup dolo lapen aparta ahin ongdunglang. Elitum a-an long-lo, pima HEMPHU-si amethang arat aphan pahirjumelo.”

¹¹Recho ahukum pen latum marpuru-heihei Kardomhemthepi angkang angbong selamlo,

¹²lapen kedo-an adan lapen phankep pen ephan-heiheita lahei arlo thap-et-lo lake kangbobedetji aphanlo. Latum Konaniah pu a-Levi aphansi pachehemphu toilo lapen alangli korte Shimei ke alangliphan kerap abang-lo.

¹³Halatum aber bang kep a-Levi kam paklemlo: Jehiel, Azariah, Nahath, Asahel, Jerimoth, Jozabad, Eliel, Ismakiah, Mahath lapen Benaiah. La kedo-an Hezekiah Recho lapen Azariah kurusarkethe atum ajakong pensi paklemlo.

¹⁴Imnah asopo Kore, inut a-Levi Kardomhemthepi Nihang Anghap tonbang akethe, si HEMPHU aphan kepi adan-heihei kedengdun lapen lahei keron ahemphulo.

¹⁵Kurusar atum kedo akaprek arongsopi along lapen akaprek a-Levi atumsi kroipame pen laphan cherapdunlo: Eden, Miniamin, Jeshua, Shemaiah, Amariah, lapen Shekaniah. Aro ateng langlesi halatum akam ateng pen akorte a-Levi atum aphan latum kecho amar kethak pachingbarpet-lo.

¹⁶Halatum anghoi ateng langsi ningkan 30 lapen ongmuchot apinso atum arnivang Kardomhemthepi along arpu kedo atum aphan apharman pirep-lo.

¹⁷Kurusar atum aphan halatum adeng aro atengsi kam bak-lo, lapen Levi atum ningkan 20 lapen sosechot atum aphan asonsi kam bak-lo.

¹⁸Latum kedo-an apiso-aso lapen latum along kedodun abangphu atum penpen amen chetok-rappet-lo, pima latum keklem nangji kangthir akam akenang do lote aling apor seta klem nangji.

¹⁹Aaron asu atum aphan kepi arongsopi-heihei along kedo akurusar atum mate laso arongsopi-heihei api kechopan adim along kedo akurusar atumsi kurusar ahemtun-heihei along pinso amonit an lapen Levi aso akam kedo abangphutin aphan kecho amar keron arpu kurusar atum en-nang-lo.

²⁰Judah adang an, Hezekiah Recho Kopisi akeme lapen a-Arnam HEMPHU aphan aning kepadok akam an klemlo.

²¹La keklem pachunlo, pima la keklem Kardomhemthepi aphan mate Aron ateng keklem seta la karjong pen chehodai pamesi a-Arnam aphan klempilo.