Read Karbi 2 PHURKIMO 32 Bible Online

2 PHURKIMO 32 - Karbi bible

2 PHURKIMO 32

¹Lahei aphi Hezekiah Recho, HEMPHU aphan kekroithip pen kangduk an atum ahut seta, Assiria Arechokethe Sennacherib, Judah tengkheng-lo. Paisongkedo arongsopi-heihei alangli cherailo lapen la aron-armu aphan paisong-heihei phri si atovar kepinchongji aphan hukumpilo.

²Senacherib, Jerusalem aphanta ketengkhengji aninghang-lo pu Hezekiah Recho thek-longsi,

³alangli lapen alangli aban atum rongsopi angtan alang akrong kethanpetjisi chesik-lo, anke Assiria atum Jerusalem adung vang-lote, latum lang longledetpo.

⁴Aban atum ongdung aron-aso ponsi lang amek kedo-an khang-etsi lahei alang palilongledet-lo.

⁵Rongsopi paisong keselam pen ajok, lapen hemchardon kekim pen ajok lapen athak apaisong kekim pen ajok recho ajakong chepangtang-lo. La aparta, Jerusalem-ban anihang anat longle kepapleng pen ajok la cherangkhalo, lapen la ongdung achir, anok-heihei paselamlo.

⁶Inut ron-armu ahukum aber rongsopi along kedo-an amonit bilo, lapen rongsopi anghap athengno aklam kethe alongsi kepachingrumji aphan hukumpilo. Latum aphan alangli pulo,

⁷Mathathip lapen ning chepathenon, Assiria Arechokethe aphan mate la kejapon aron-armu aphan phereri. La arideng kedo aphan mute etum anatsi jakong ke-ongmuchot-lang.

⁸La monit ajakongsi dochot, bonta etum aphan ekerapji abang e-Arnam HEMPHU do, lapen Alanglisi etum aron chedanpo. Rat atum halatum arecho pen laso alam kelong apot aning rung-olo.

⁹Penang an aphi, Senacherib lapen la aron-armu atum Lakish along kedo un ahut, Jerusalem along kedo Hezekiah lapen Judah arat aphan laso abirta pilo:

¹⁰“Ne, Assiria arechokethe Sennacherib si nang karjulo, kopisi nangtum rat atum ning chethesi Jerusalem along kedo pen bang atum patengkheng jilangma.

¹¹Hezekiah tong nangtum aphan nangkeparema nangtum a-Arnam HEMPHU si netum ajakong pen nangtum aphan nangraipo pu kepuma, bonta Hezekiah ke nangtum aphan nangpachobeilo, lapen kangchir lapen kelang-it pensi nangtum aphan nangpathi toipo.

¹²La si HEMPHU akangthir ason lapen adovan-heihei kepavir abang-lo lapen Judah lapen Jerusalem arat aphan elongvet adovan along keparchoji lapen mephik kepathorji aphan kepulo.

¹³Akaprek adet-heihei atum aphan nephusar atum lapen ne keklem-heihei nangtum chininema? Akaprek adet-heihei a-arnam atum Assiria Arechokethe pen halatum arat aso aphan pajokthek-loma?

¹⁴Netum pen halatum adet kedo-an a-arnam atum amethang adet aphan pajok unpo pu nangtum aphan Hezekiah nangpachobei longri, mate lason nang paklem longrinon.

¹⁵Laphan kroiri! Badu a-arnamta amethang arat aphan Assiria Arechokethe arideng pen pajok un-epinlang. Lasi nangtum a-arnam jokta nangtum aphan nangpajok un-elo!”

¹⁶Assiria aban atum la an sose Arnam HEMPHU lapen Hezekiah, HEMPHU aban aphan pinremlo.

¹⁷Rechokethe ketok aloh Israel a-Arnam HEMPHU aphan pinremlo. La pulo, “Det-heihei a-arnam atum nejakong pen halatum arat aso aphan pajok un-elang, lapen Hezekiah a-arnam seta la arat aso aphan nerideng pen pajok un-e.”

¹⁸Ban atum la Ibri alam pen ningjelo, Jerusalem arongsopi apaisong athak kedo arat aphan kepaphereji lapen aning kepabijisi hang-lo, anke rongsopi kecheraiji joimuchotpo.

¹⁹Latum Jerusalem a-Arnam aphuthak ningjelo lapen lasonsi akaprek adet atum a-arnam ari pen keselam akumlin aputhak ta ningjelo.

²⁰Anke Hezekiah Recho lapen Isaiah montri, Amoz asopo Arnam aphan ardomsi kerap kelongji aphan hangcharbulo.

²¹HEMPHU inut apherangke nangtoisi Assiria aron-armu aron-aso lapen chakri atum aphan pathi-et-lo. Lasi Rechokethe amahang jangrem pen Assiria chedamnang-lo. Arnisi la kardomhem arlo Arnam along kedo ahut, alangli sopo ajehak anokjir pen laphan pathilot-lo.

²²Lasonsi Hezekiah Recho lapen Jerusalem arat aphan Assiria Arecho-kethe, Sennacherib ajakong pen lapen halatum ahotur atum pen HEMPHU pajok-lo. Alanglirat atum aphan ingsamjin pen akaprek adung-arei adet-heihei pen seta padolong-lo.

²³Ongdung amonit atum Jerusalem vangsi HEMPHU athok-heihei vanlo, lapen Hezekiah aphan dan-heihei vanlo, halaso pen kadokave adet atum Hezekiah aphan aman pilo.

²⁴Laso apor ahut Hezekiah sodet-lo, lapen thiji dok-dok-lo. alangli ardomlo, lapen alangliphan HEMPHU kemeji isi angthek paklang-lo.

²⁵Bonta laphan HEMPHU keklempitang aputhak aning arlo chepaklangji aphan Hezekiah ane chepatherong-lo, la apot Judah lapen Jerusalem sungnang-lo.

²⁶Padu Hezekiah lapen arat aso atum chepabihek-hak-lo, Hezekiah thithetik an HEMPHU rat aphan aduk pipedet-lo.

²⁷Hezekiah Recho plangpik-lo, lapen abangphutin ta alangliphan aman pilo. Alangli aser, arup, adorkeso a-arlong-heihei, mosala-heihei, achong-heihei, lapen akaprek adorkeso amar-heihei aphan alangli puru-heihei kimlo.

²⁸La aparta, la asok, adrakha ahorlang, lapen jit ajangthu-heihei aphan puru ahem-heihei kimlo, la achainong aphan aroi-heihei, lapen abiresak kebeng aroi-heihei kimlo.

²⁹Alangli kedo-an apar ta alangliphan Arnam abiresak lapen achainong pisi la lapu-an akaprek akhi dolo, la ongdung arongsopi kim-ilo.

³⁰La Hezekiah-si Gihon alang amek tengsi kurdang pen lang palisi Jerusalem apaisong arlo la palidamlo. Hezekiah keklem akam asontin ta chunlo,

³¹lapen Bebilon apherangke atum det angbong keklemtang angthek arjulo, seta, Hezekiah a-ot asat ke-enji si Arnam la atovar aning hang aling paklemtoilo.

³²Hezekiah Recho Keklem asontin akam lapen la HEMPHU aphan kekroi alam an Judah lapen Israel Arecho atum Aphurkimo along tok-et-lo.

³³Hezekiah thi si laphan recho atum athiri-heihei alongsi pip-lo. La kethi ahut Judah lapen Jerusalem arat atum alangliphan aman pilo. Alanglilar asopo Manasseh si recho cholo.