Read Karbi 2 PHURKIMO 34 Bible Online

2 PHURKIMO 34 - Karbi bible

2 PHURKIMO 34

¹Judah arecho kecho ahut Josiah arta ningkan 8 vet-lang, lapen la Jerusalem along ningkan 31 pangrilo.

²HEMPHU aphan aning kepadok akam si la klemlo; la aphusar David Recho a-arjan endunsi Arnam aron an kemon-e pen kroipamelo.

³Josiah recho ningkan 8 ahut la bihek-lang, la aphusar David Recho a-Arnam aphansi archolo. Ningkan 4 aphi, la karklitap akarcho adim-heihei arnampi Asherah lapen kaprek kesoi akumlin-heihei pavirlo.

⁴La kepinkhat atengsi la amonit atum Baal aphan karcho adovan lapen halatum adung mephik kethor adovan-heihei ta phri-et-lo. Asherah kechor akumlin lapen akaprek kesoi akumlin-heihei pangje-isi aduk pacheplang-lo, lapen laphan karkli arat atum atipit along aduk hijik damlo.

⁵Karklitap akurusar atum areppi halatum karcho adovan-heihei along phrinlo. La kedo-an keklem pen ajok, la Judah lapen Jerusalem aron ateng pen pangthirtang-lo.

⁶Rongsopi-heihei alongta lasonthot klemlo, lapen Manasseh, Ephraim lapen Simeon arongman angkang ajo pen ha nirep anat Naphtali anta klemlo.

⁷Nirep adet alongri adang an la dovan-heihei lapen Asherah kesoi akumlin an longle athak patep-i si longle aduk paplang-lo, lapen mephik kethor adovan-heihei kedo-an pangje-ilo. Ansi la Jerusalem chevoilo.

⁸La recho kecho ningkan 18 ahut, karklitap karcho kepajut pen ajok la det lapen Kardomhemthepi pangthirlo, Josiah Recho, HEMPHU Arnam a-Kardomhemthepi kepaselamjisi bangkethom amonit toilo: Azaliah asopo Shaphan, Jerusalem a-Govornor, Maaseiah, lapen Joahaz asopo Joah, inut abankethe.

⁹Levi atonbang atum Kardomhemthepi along kerung atangka Hilkiah kurusarkethe aphan hodaidet-lo. (La Ephraim lapen Manasseh arat pen si kerung-lo, lapen ahin Nirep Adet pen lapen Judah arat pen Benjamin lapen Jerusalem.)

¹⁰Laso atangka bangkethom amonit kardomhem keselam ahemphu arideng hodaidet-lo,

¹¹lapen halatum thengpi akumbeleng aphan lapen kekim atum arlong pen thengpi kenamji, hem-heihei keselamji aphan Judah arecho atum kepathutoi apot.

¹²Kam keklem abang athikpet, latum aphan kepalangdun bang phli a-Levi dolo: Gahath, lapen Obadiah, latum Merari aro pen, lapen Jekaariah lapen Meshullam, atum Kohath aro pen. (Levi atum kethekser aduhuidi atumlo.)

¹³Akaprek a-Levi ke hormu kepon kevan lapen ason ason akam kelang dun, lapen akaprek atum ketok kerim mate ketondun akam chepahemphulo.

¹⁴Mar puru pen tangka kepon ahut Hilkiah Moses aphan Arnam kepi Aron HEMPHU Aron aloh long-lok-lo.

¹⁵La Shaphan aphan pulo, “Ladak Kardomhemthepi along ne Aron aloh long-lo.” Loh la Shaphan aphan pilo,

¹⁶lapen Shaphan la ha recho along pondet-lo. La thanlo, “Nangli hukum kepi ateng nelitum klem patang-et-lo.

¹⁷Kardomhemthepi along kebi atangka nelitum ponlo, lapen la kam klembang lapen halatum aphan kelang atum arideng pidet-lo.”

¹⁸La ningjebomlang, “Hilkiah neliphan kepi aloh ladak do.” lapen recho aphan alangli asekethe pen porhe parjulo.

¹⁹La keporhe recho arjulongsi alangli mong-loisi ape-ari chingsek-lo,

²⁰lapen Hilkiah aphan lapen Shaphan asopo Ahikam aphan lapen Mikaiah asopo Abdon aphan kangsaihem achunbang lapen Asaiah, recho along honbang aphan lahei ahukum pilo:

²¹“Damra nepharman lapen Israel, Judah along kedo arat aphan HEMPHU aphan arjudamtha. Laso aloh akethan alam-heihei arjunon, HEMPHU ephan aning thi-o tahaipo, pima ephusar atum HEMPHU alam krokrelo lapen laso aloh along kepu ateng keklem nangvek ason klemkledet-lo.”

²²Recho ahukum pen Hilkiah lapen akaprek atum Huldah pu a-arloso, inut amontripi Jerusalem kemi alongsi kedo along damlo. (Bangpi apenan Shallum, Tikvah asopo lapen Harhas asu Kardomhem ape achoi ahemphu.) kopi plang-loma, latum bangpi aphan than-et-lo,

²³lapen latum recho along pachedamthusi laso abirta recho aphan bangpi paputoilo:

²⁴“Ne Jerusalem lapen la kedo-an arat aphan, recho aphan keporhepi loh ketoktang ahirjuno ateng adukpipo.

²⁵Latum Nephan ne-obup-lo, lapen akaprek arnam-heihei aphan athok-heihei pilo, lapen halatum keklem an aphan akam pen ajok Nening papung-lo.

²⁶Recho amethang aphan ke Ne Israel a-Arnam, HEMPHU-si pulo: Loh along ketok ateng nang arjulo,

²⁷lapen nangning chiruilo, lapen Ne ingno chepabihek-lo, nang pe-ri chingsek-lo, lapen Ne kosonsi Jerusalem lapen la arat aphan aduk kepiji pu kether nang arjulong-lo,

²⁸lapen Jerusalem aputhak aduk kepiji ke nang thithetik pavangvelo. Nangphan ke Ne ningkangsam pen nangmek pachilongji.” Laso abirta pen monit atum Josiah Recho along chevoilo.

²⁹Judah lapen Jerusalem ajalin atum an aphan Josiah Recho hangpet-lo,

³⁰lapen halatum penpen la Kardomhemthepi damrappet-lo, halaso along kurusar atum lapen Levi atum lapen ahem kedo-an arat atum, keduk, lapen keplang anta dolo. La kadokave angno, asekethe pen recho Kardomhem, thepi arlo kelong kechejok aloh kangthim porhe pilo.

³¹La recho archok alongsi arjap-lo; lapen HEMPHU aphan kroipo pu isi Kechejok aloh chepathik-lo, la aron-heihei lapen ahukum an ning aklong pen lapen karjong ajakong kedo-an pen loh along ketok kechejok along akehang an cheseke po pu chechak-lo.

³²Kechejok alam kechechakthekji aphan la Benjamin arat lapen abangphutin Jerusalem along pavangtoilo. Lasi Jerusalem arat atum kechejok aloh halatum aphusar atum a-Arnam pen chepathik akehang an kroilo.

³³Israel arat alongri angbong kedo-an kehijimmeme akumlin-heihei Josiah Recho pavir-et-lo, la rengtik an rat aphan halatum aphusar a-Arnam HEMPHU aphan kepangdukji aphan hang-lo.