Read Karbi 2 PHURKIMO 35 Bible Online

2 PHURKIMO 35 - Karbi bible

2 PHURKIMO 35

¹Josiah Recho, HEMPHU aphan man kepijisi Jerusalem along Kejok Amei talonlo; kecheng achiklo, 14 arni latum rong-aje aphan pi that-o-lo.

²Kardomhemthepi along kurusar atum keklem nangji adeng la pilo, lapen kemesen pen keklem ponthekji aphan la aning parung-lo.

³Levi atum Israel athanbang, HEMPHU aphan kechehodai atum aphan alangli laso alam pinkhat-lo; “David asopo Solomon Recho kekim a-Kardomhemthepi arlo Kechejok Asinduk kangthir binon. Nangtum la adim adim rungponvoi nangnelo, bonta nangtum nang Arnam HEMPHU lapen Alanglirat Israel aphan ingduk nangji.

⁴David Recho lapen la asopo Solomon Recho nangkepitang akam arpu-heihei ateng, Kardomhemthepi along aron atengle nangdim-heihei chedonon,

⁵lapen nangtum methang Israel arat ahemtuntin aphan nangtum ajehak kerap thekverjile chesengnon.

⁶Nangtumsi kejok abiresak-heihei lapen bi-heihei thu nangpo. Non nangtum methang aron pen chepangthir non lapen Moses pen ajok HEMPHU akepinkhat ason nangkorte Israel arat atum anta nang charlidun thekji aphan athok-heihei siknon.”

⁷Kechejok amei along rat kepa-enji aphan, Josiah Recho amethang kechopangreng api suri 30 abiresak, biresak aloso lapen bi aso lapen jon suri kethom achainong alo danpilo.

⁸La aban atumta rat aphan, kurusar atum aphan, lapen Levi ke-enji aphan danpilo. Kardomhemthepi chepahemphu atum, Hilkiah, kurusarkethe Jekaariah, lapen Jehiel, kurusar atum aphan jon 2,600 abiresak aso lapen bi aso lapen rong-aje ahut kethatji achainong jon 300 pilo.

⁹Levi ajalin atum Konaniah, Shemaiah, lapen la akorte Nathanel, Hashbiah, Jeiel lapen Jozabad atum jon suri pho abiresak aso lapen abi aso, lapen jon 500 achainong alo Levi atum athok-heihei kepapiji aphan dan pilo.

¹⁰Kejok Amei aphan asontin siktang-et si, kurusar atum lapen Levi atum recho ahukum ateng halatum amethang adim-heihei chedorep-lo.

¹¹Biresak aso lapen bi thudet aphi Levi atum lahei areng lumlo.

¹²Anke latum rat angbong ahemtun asontin chethak-lo, kephrin athok aphan pi-heihei chethaksi latum Moses Aron aloh kepinkhat ateng pajirthekpo.

¹³Me along Kejok Amei athok-heihei Levi atum me phrinlo, la aron ateng-lo, lapen prapjin pen rat aphan ok ronlo.

¹⁴La klemdet aphi, Levi atum amethang aphan ok cheronlo lapen Aaron aro pen kevang akurusar atum an aphanta bak-lo, athema kurusar atum aningve anta klemnangvoi, pi kephi, lapen arpum pen kephi lapen athok-heihei athu kephrin nang akam do-o.

¹⁵Asaph aro pen Levi atum Lunse David Recho halatum aphan kepinkhat adim-heihei chedorep-lo: Asaph, Heman, lapen Jeduthun, pima akaprek a-Levi atum halatum aphan Kejok Amei sikpilo.

¹⁶Lasi Josiah Recho hukum kepi ateng HEMPHU aphan karcho akam halabangso arni klem patangdet-lo, Kejok Amei Arong-aje talonlo, lapen kephrin athok-heihei dovan athak pilong-lo.

¹⁷Ni throksi kedo-an Israel arat atum Kejok Amei lapen thapkave a-Him Arong-aje talonlo.

¹⁸Samuel arni ahut pen lason Kejok Amei talonle-pinlang. Josiah Recho ason Kejok Amei ketalon aphrang badu arecho atum ta talonle-pinlang. Kurusar atum, Levi atum lapen Judah, Israel lapen Jerusalem arat atum nangdunlo.

¹⁹Laso a-Kechejok Amei Josiah Recho kecho 18 aningkansi dolo.

²⁰Kardomhemthepi aphan Josiah Recho lahei klemtang-et aphi, Ijip arecho Neko, Euphratis Aroi, Karkemish adim ron kechedanjisi aron-armu nangjalo. Laphan Josiah kekhangji bor-ilo,

²¹bonta Josiah aphan Neko bangso abirta lolo: “Laso aron ne kechedan nangphan thang akam ave, Judah arecho. Ne nangpenle kechedanji kali, lapen nephan paprapnon pu Arnamsi nephan nekepulo. Arnam ke nenatsi do, lasi nephan khangri, kalite nangphan pavirdetpo.”

²²Bonta Josiah ke kechedanjisi chesikding-lo. Neko Recho pen ajok Arnam keningje alam la arjumolo, lasi Megiddo aklam along la arje chepatusi ron damlo.

²³Ron kechedan bom un ahut, Josiah Recho aphan Ijip aso, athai aso apchok-lo. La aban atum aphan pulo, “Nephan ingtan nangpondet-non; nereng sodak-lo!”

²⁴La aronhemkonglong pen laphan rungtang-lo, lapen akaprek aronhemkonglong alongsi bilo lapen laphan Jerusalem pondet-lo. Hadak la thilot-lo, lapen recho athiri-heihei alongsi pip-lo. La kethi apot Judah lapen Jerusalem arat atum ningduk-lo.

²⁵Jeremiah montri Josiah Recho aphuthak ningduk alun tok-lo. Laphan aningduk lote Israel apinso-arlo atum alunse atum laso alun lunsi isi aron cheplang-lo. Laso alun ke ningduk-heihei alun kepangrum aloh alongsi longji.

²⁶Josiah keklem akam an la HEMPHU aphan kekroi, la Aron aphan akekroi,

²⁷lapen la kecheng pen kejut aphurkimo, Israel lapen Judah Arecho atum aphurkimo along tok-et-lo.