Read Karbi 2 PHURKIMO 36 Bible Online

2 PHURKIMO 36 - Karbi bible

2 PHURKIMO 36

¹Josiah asopo Joahaz aphansi Judah arat atum ingvailo, lapen Jerusalem arecho lo pusi jangthu patip-lo.

²Joahaz, Judah arecho kecho ahut arta ningkan 23 vet-lang, lapen alangli Jerusalem along chiklo jonthom pangrilo.

³Ijip Arecho Neko laphan bengpondetsi, Judah atum lin 3,400 arup, lapen lin 34 aser amidu patulo.

⁴Joahaz a-ik Eliakim aphansi Judah arecho Neko bat tekang-lo, lapen amen larsi Jehoiakim irlo. Joahaz aphan ke Neko Ijip adet pondet-lo.

⁵Jehoiakim, Judah arecho-kecho ahut arta ningkan 25 anlo, lapen Jerusalem along ningkan 11 pangrilo. La a-Arnam HEMPHU aphan langplotsi pap klemlo.

⁶Bebilon arecho Nebukadnezzar, Judah tengkheng-lo, Jehoiakim aphan nepchek-lo, lapen ingchin arri pen ingnang si laphan Bebilon pondet-lo.

⁷Nebukadnezzar, Kardomhemthepi ajehak akhi pongdetsi Bebilon arechohem arlo chebilo.

⁸Jehoiakim keklem asontin akam, la kehijimmeme akeseke lapen kehingno akam keklem-heihei, Israel lapen Judah arecho atum Aphurkimo along tok-et-lo. La alar asopo Jehoiachin si recho cholo.

⁹Judah arecho-kecho ahut Jehoia-chin arta ningkan 18 vet-lang, lapen la Jerusalem along chiklo jonthom ra nikep pangrilo. La jokta HEMPHU aphan langplotsi pap klemlo.

¹⁰Chung-phang-ok ahut Jehoiachin aphan Nebukadnezzar Bebilon pondet-lo, lapen Kardomhemthepi akhi-heihei pon-et-lo. Ansi Jehoiachin apunu Zedekiah aphan Judah lapen Jerusalem arecho pu Nebukadnezzar bat-lo.

¹¹Judah arecho kecho ahut Zedekiah arta ningkan 21 vet-lang, lapen alangli Jerusalem along ningkan 11 pangrilo.

¹²La ta HEMPHU aphan langplotsi pap klemlo, lapen HEMPHU alam keningje abang Jeremiah montri angno chepahok-he detsi arjudun long-lo.

¹³Recho Nebukadnezzar abe Zedekiah thurlo, lapen laphan HEMPHU amen pen kroipamepo pu seme patang bor-idet-lo. alangli aning kecheruiji aphan molo, lapen Israel a-Arnam HEMPHU anat chiruire det-lo.

¹⁴La aparta, Judah ajalin atum, akurusar atum, lapen rat atum, latum adung-arei adet-heihei arjansi endunlo, lapen kumlin-heihei archolo, lasi HEMPHU amethang kepangthirtang a-Kardomhemthepi latum pasa-urlo.

¹⁵Latum aphusar a-Arnam HEMPHU, arat aso aphan pacherejisi montri atum nangtoibomlo, pima La halatum aphan lapen Kardomhemthepi aphan pajok ingtung.

¹⁶Bonta latum Arnam apherangke atum aphan pinremlo, Alangli alam arjujesi Alangli amontri atum aphan ingnekchoilo, padu ke arat aphuthak HEMPHU aning thipiksi latum jok-un-edet-lo.

¹⁷Lasi latum aphan kepateng-khengjisi HEMPHU, Bebilon arecho vanlo. Recho Judah ariso atum aphan, ha Kardomhemthepi arlo jokta pathilo. Akebi mate akesar setame, pinso mate arloso setame, keso mate ingtangrak setame badu aphanta alangli kangjinso avedet-lo. La aridengsi kedo-an aphan Arnam hodaidet-lo.

¹⁸Bebilon arecho Kardomhemthepi, kardomhem khi-puru, recho lapen la aban atum akhi pon-et-lo.

¹⁹La Kardomhemthepi keidut-lo, lapen rongsopi ta, la arechohem lapen la akhita me pacho-et-lo, lapen rongsopi apaisong phri-et-lo.

²⁰Kerenglang atum an aphan alangli Bebilon pon-et-lo, hadak latum Parsi Adetpi nang-klangkletik alangliphan lapen alangli aso-asu atum aphan ban ingduknang-lo.

²¹Lasi Jeremiah pen ajok HEMPHU keputang alam chekok-lo: “Det ningkan 70 parongman po, kesang arni kai seta talon longledet-po.”

²²Sairas, Parsi Arechokethe keplangcheng aningkan, Jeremiah montri kepu alam HEMPHU pachekok-lo. Alangli Sairas aphan aning parungsi lahei ahukum pachonlo, lapen alangli ketoktang ason la adet-thepi adang an alongtin ta asekethe pen paporhetoilo:

²³La Sairas, Parsi Arechokethe ahukumlo. Sining a-Arnam HEMPHU si nephan pirthe adang pangritoilo, lapen Alangliphan ehum Kardomhem, Judah adet; Jerusalem along, kekimpi arpu nepilo. Non, nangtum Arnam arat atum an, hadak chedamnon, lapen nangtum a-Arnam HEMPHU nangtum along nang padodun nang.