Read Karbi 2 PHURKIMO 5 Bible Online

2 PHURKIMO 5 - Karbi bible

2 PHURKIMO 5

¹Kardomhemthepi aphan kadokave akam Solomon Recho keklem pajutsi, la apo David HEMPHU aphan kehodai arup, aser, lapen kaprek amar an Kardomhem amarpuru angdeng-heihei arlosi bilo.

²Khei lapen Israel aro ajalin kedo-an Jerusalem along Solomon Recho HEMPHU a-Kechejok Asinduk Zaion David Arongsopi pen ha Kardomhemthepi along kevanji aphan hangsi pachingrumlo.

³Chepachong arong-aje ahut latum kedo-an ta chingrumpet-lo.

⁴Kedo-an ajalin atum chetong-et aphi Levi atum Kechejok Asinduk rungsi

⁵la parphang-lo lapen Kardomhemthepi anat pondet-lo. Kurusar atum lapen Levi atum ta HEMPHU kedo a-Pehem lapen la ajohton an Kardomhemthepi anat pon-et-lo.

⁶Solomon Recho lapen Israel arat atum kedo-an Kechejok Asinduk angno chingrumlo, lapen ongdung abiresak lapen achainong aso lakha un-epin an athok pilo.

⁷Ansi kurusar atum Kardomhemthepi arlo HEMPHU a-Kechejok Asinduk ponsi Kangthirnei Adim arvengkedo api arum bilo.

⁸Latum kejarham a-arveng-heihei Sinduk lapen kecharchong athengpi anta dip-lo.

⁹Kecharchong athengpi Kangthirnei Adim angno karjapther abangsi thek-longchotji, bonta akaprek ahin pen ke thek-longledetji. (Aphrang athengpi nonputa hadak dolang.)

¹⁰Latum Ijip adet pen kevang ahut Israel arat pen HEMPHU angbong Kechejok aloh kepathik ahut Sinai Anglong along Moses kethap a-arlong plangni pen apar Kechejok Asinduk arlo thangnatta ave.

¹¹Kurusar kedo-an chetongpet-lo, jat asong le latum do seta, latum kedo-an chepangthirlo. Lapen kedo-an Levi aduhuidi lunsepo, Asaph, Heman lapen Jeduthun, lapen halatum aro abangphu atum pe-kanglitsi chingthang-lo.

¹²Prakso lapen kumbelelng-heihei pen nihang anat kedo adovan adungsi Levi atum arjap-lo, lapen halatum along bang 120 kurusar atum pong-ut but-lo.

¹³Lunse atum along pong-ut-heihei, prakso-heihei lapen akaprek ajohton pen angdi angdi HEMPHU aphan rosi lunlo: HEMPHU aphan rolo, pima la mesen, lapen Alangli akanghon kaike dover.

¹⁴Kurusar atum Kardomhemthepi ke-o pen menmen HEMPHU kedolor angthek keturbong anghun ethan lapen atur pen plengset-lo, lapen latum karcho amei klembom un-edet-lo.