Read Karbi 2 PHURKIMO 6 Bible Online

2 PHURKIMO 6 - Karbi bible

2 PHURKIMO 6

¹Anke Solomon Recho ardomlo, “HEMPHU, Nang inghun lapen kangting ajo kedoji chongvailo,

²Non Neli Nangphan ehum langmesen kardomhem nangkimpilo, Nangli kaike kedover adim aphanlo.”

³Kadokave Israel arat atum hadak arjapding-lo. Recho abang halatum anat pangnosi halatum aphuthak Arnam ahirjume hangpilo.

⁴La pulo, “Israel a-Arnam HEMPHU aphan ronon! Alangli nelipo David aphan kechak alam klemlo, halaso ahut Alangli pulo,

⁵‘Ne rat aso aphan Ijip adet pen Ne kevan ahut pen nonpu-an, Ne rongsopi erongbak Nephan karcho adim kepakimji ingvaive-pinlang, lapen Ne rat kepajaji aphan badu aphanta ingvaivepinlang.

⁶Bonta non Ne Jerusalem isi Nephan karcho adim ingvailo, lapen nang, David si Nerat pangripo.’ ”

⁷Solomon ningje bomlang, “Nelipo David, Israel a-Arnam HEMPHU karcho aphan ehum a-Kardomhemthepi kekimji mang-lo,

⁸bonta HEMPHU alang-liphan pulo, ‘Nang Nephan Kardomji hem ehum kekimji lake mesen alamlo,

⁹bonta nang la kimlongle. La nangsopo nangmethang asosi Ne Kardomhem kimji.’ ”

¹⁰Non HEMPHU amethang kechechak alam klem papleng-lo, lapen Israel a-Arnam HEMPHU karchoji aphan Kardomhem ehum ne kimlo.

¹¹HEMPHU lapen Israel arat angbong kechejok aloh lapen arlong plangni kedo Kechejok Asinduk Kardomhemthepi arlo bilo.

¹²Anke rat angno Solomon damsi dovan athengno arjapdam-therlo, lapen ari chirungsi ardomlo.

¹³(Solomon isi tam ahongplang keselamtang do lapen la tikup angbong chitimchit bilo. La arpan arjon keding ingrup pho lapen kangtui ingrup kethom. Laso ahongplang athak arludamsi akengphu patongruisi hadak bang pathek-long phrong-lo, lapen ari sining anat rung-lo.)

¹⁴La ardomlo, “Israel a-Arnam HEMPHU, sining kedo-an lapen pirthe adang Nangsonthot Arnam nahokta avelo. Nangrat atum pen Nang Kechejok alam chebiver lapen latum aning aklong pen Nangphan kroilote Nang kanghon halatum aphan paklang.

¹⁵Nepo David aphan Nang kechak alam Nang papleng-lo; pini athetin ta nang papleng-et-lo.

¹⁶Non, Israel a-Arnam HEMPHU Nang nepo aphan kepu la aso-asu pen inut kaiketa recho chosi Israel aphuthak pangrilong-verpo pu akaprek kechak alamta paplengnon, nepo ason halatum kechere pen Nang aron kroiver lote.

¹⁷Lasi non Israel a-Arnam HEMPHU, Nangban David aphan kechak alam an ahok paplangnang.”

¹⁸Bonta Nang unjima, O Arnam, pirthe athak pinso-arlo angbong kedodunji? Sining adang thepi anta Nangphan nangbi adim ave, tangte la ne kekim a-Kardomhemthepi le kopusonsi Nangphan Nang padodorpoma?

¹⁹Ne Arnam HEMPHU, ne Nangbanlo. Ne kardom arjutha lapen ne Nangphan kechoningri ason nepitha.

²⁰Laso a-Kardomhemthepi aputhak ajo-nerlo seta langtha. Nang chechak-lo, ladaksi Nangphan archo nangpo, lasi ne laso a-Kardomhemthepi anat kepangno pen kardom ahut nethaktha.

²¹Ne lapen Nangrat aso Israel atum laso adim anat pangnora ardomlote, netum akardom thaktha. Nanghem sining angsong pen netum aphan nethaktha lapen ne diyatha.

²²Inut amonit bang aphan keklem kechokche apot bok-lote, lapen la ado avelo pu seme kepatang jisi laso a-Kardomhemthepi adovan along van lote,

²³O HEMPHU, sining angsong pen arjura nangban aphan ingsainon. Ado kedo aphan la kelangji a-ot ateng aduk pira adaikave abangphan pajoknon.

²⁴Nanglirat aso Israel atum, halatum Nangphan langplotsi pap keklem apot halatum hotur arideng remdet-lo lapen latum laso a-Kardomhemthepi anat vangsi chepabihek pen Nangphan ardomsi diya chohang-lote,

²⁵latum aphan sining pen arjutha. Nangrat aso apap diya ra halatum aphan lapen halatum aphusar aphan Nang kepi alongle along vanthunon.

²⁶Nangrat atum Nangphan langplot pen pap keklem apot Nang arve khang-lo lapen halatum aning chiruisi laso a-Kardomhemthepi anat pangnora, Nangnat chepabihek pen ardomlote,

²⁷O HEMPHU, sining angsong pen halatum aphan arjura Nangban atum, Israel apap diya non, lapen kopima akeme akam thanra paklemnon. Anke O HEMPHU, Nang rat aphan isi kaike kepacherai longver kepi alongle aputhak arve toinon.

²⁸Det jongsi mavur mate longle kekreng dolote mate prisam mate longvur, mate ingki klang-lote, mate Nangrat aso aphan hotur tengkheng-lote, mate halatum angbong akeso dolote,

²⁹halatum a-Kardom-heihei arjuduntha. Jongsi Nangrat aso Israel angbong aning aduk pen dora halatum ari chirungsi laso a-Kardomhemthepi anat ardom lote,

³⁰halatum aphan sining angsong Nanghem pen arjudunra halatum apap diyatha. Nanglisi monit aning kematha alam chinichot. Halatum a-ot ateng pen abangphutin aphan langnon,

³¹anke Nangrat aso atum Nangphan nanpithekpo, lapen neliphusar atum aphan Nang kepi alongle along dotik an kaike seta Nangphan kroithekpo.

³²Bang-adet aso mane jongsi heloving adet do setame Nang ko-an kethe lapen Nang jakong alam lapen Nang kaiketa keklemji chesik-lo pu arjulong pen alangli laso a-Kardomhemthepi anat vangsi ardomlote,

³³alangli akardom arjutha. Hadak Nang kedo sining lapen Nangphan kopima kechoningri ason klempinon, anlote pirthe adang arat atum Nangphan chinipo lapen Israel Nangrat aso keklem asonthot Nangphan kroithekpo. Anke neli kekim laso a-Kardomhemthepi along helo Nangphan karcho adimlo pu halatum chinipo.

³⁴Nanglirat aso atum hotur atum pen ron kechedanji aphan kedam ahut Nangphan ardom lote, halatum nahok-le dosetame laso arongsopi Nang kangvaitang lapen neli Nangphan kekim pi a-Kardomhemthepi anat pangno pen ardom lote,

³⁵halatum a-Kardom arjutha. Halatum aphan sining pen arjudunra halatum aphan pahailongtha.

³⁶Nanglirat atum Nangphan langplot pen pap klemlote, lapen pap keklemkle abang ave pinlo lapen Nangning thisi hotur latum aphuthak pahaidet-lo, lapen latum aphan banpon-etsi akaprek adet pon-et-lo, halaso adet heloving seta,

³⁷Nangrat aso akardom arjuduntha. Halaso adet along halatum aningchiruira Nangphan ardom lote, halatum ko-an apap klemloma chekobirlote, halatum akardom arjutha, O HEMPHU.

³⁸Halaso adet halatum ahokpet lapen aning kecherui binong-lo, lapen Nang neliphusar atum aphan kepi alongle, laso Nang kangvaitang arongsopi lapen neli Nangphan kekimpi a-Kardomhemthepi anat pangnora Nangphan ardomlote,

³⁹halatum akardom-heihei Nang arjutha. Nanglihem sining pen halatum aphan arjutha lapen halatum aphan jinsora Nangrat aso apap kedo-an diyanon.

⁴⁰Non, O ne Arnam, nelitum aphan nelangra laso adim kepi a-Kardom arjutha.

⁴¹Thurnon, Arnam HEMPHU, lapen Kechejok Asinduk penpen, la Nang jakong angthek-lo, Kardomhem arlo lut-ra ladak kaike dovernon. Nangli kurusar atum keklem akam an pahirjumenon, lapen Nangrat aso kedo-an aning parongnon, pima halatum aphan Nang mesenlo.

⁴²Arnam HEMPHU, nang kangvaitang arecho aphan dengmori. Nangliban David aphan Nang kanghon alam chematha damtha.”