Read Karbi 2 PHURKIMO 7 Bible Online

2 PHURKIMO 7 - Karbi bible

2 PHURKIMO 7

¹Solomon Recho kardom pajut si, sining angsong pen me vang-lo lapen athok kepajir an cholap-lo, lapen HEMPHU kedo adak-atur pen Kardomhemthepi plengset-lo.

²Pima Kardomhemthepi atur pen plengset-lo, kurusar atum la arlo lut un-edet-lo.

³Israel arat atum sining pen me keklo lapen atur Kardomhemthepi keplengset thek-longsi halatum amahang patong-kisi Arnam aphan archolo, lapen la kemesen lapen la akejutjepin akanghon apot alangliphan rohurlo.

⁴Anke Solomon lapen kedo-an arat atum HEMPHU aphan athok pajirlo.

⁵La jon suri 22 achainong aphu lapen jon suri 120 abiresak isi akejelang athok-heihei pilo. Lasonsi la lapen rat kedo-an kardomhemthepi hodailo.

⁶Kurusar atum adeng kepi adimsi chedorep-lo, lapen latum aphan pangno-phrongsi Levi atum arjap-lo, David Recho kepi kelun-i kethip-ketheng ajohton pen lapen kepalun alun pen HEMPHU aphan rolo. “Alangli akanghon kaiketa jutje!” Latum aphan David Recho ketoitang ateng lunlo. Rat atum karjap-phrong ahut Kurusar atum ta pong-ut but-lo.

⁷Tikup angbong chitimchit adim Solomon pangthirlo, la Kardom-hemthepi athengnolo, lapen hadak arpum athok-heihei phrinlo, sok-sang adan-heihei lapen kejelang athok pen athu phrinlo. Alangli lahei klemlo, pima la keselam tam angchin adovan lahei athok aphan bi-ong-lo.

⁸Solomon lapen Israel arat kedo-an chepachong arong-aje ni throksi an talonlo. Hadak rat atum ongpik-lo pima akehelo Hamath Atovar nirep anat lapen Ijip ahoi nitur anat penta monit vang-olo.

⁹Dovan kehodaiji aphan halatum ni throksi dolo, lapen ni throksi arong-aje aphan dolo. Kejutsi arni halatum kepajut atalon dolo.

¹⁰Lapen aphi arni la 23 arni throksi achiklo, Solomon rat aphan hem pachevoilo. Latum HEMPHU amethang Israel arat aphan, David aphan, Solomon aphan ahirjume kepi apot aning arongpik-lo.

¹¹Solomon Recho Kardomhemthepi lapen rechohem la kemang kekim patangpamesi,

¹²HEMPHU laphan ajo cheklang-lo. Laphan arjulo, “Nang kardom Ne arjulong-lo, lapen Nephan athok-heihei kepi Adim laso a-Kardomhemthepi Ne deng-lo.

¹³Ne arve kekhang ahut mate ketiki asai aputhak longvur nangketoi ahut mate Nerat aputhak kethi avur nangketoi ahut,

¹⁴jongsi halatum Nephan ardomra chepabihek-lote, anke Ne sining pen halatum aphan arjupo, lapen apap-heihei diyapo, lapen halatum adet pachingthur-thupo.

¹⁵Ne labangso a-Kardomhemthepi langpo, lapen ladak kardom ason an thakpo,

¹⁶pima la Ne ingvaitang-lo lapen Nephan kaike karchover adim pangthirtang-lo. Kaiketa Ne la aphan langpo lapen raiverpo.

¹⁷Jongsi nangpo David keklem ason kroithip pen Nephan ingduk lote, aron-heihei kroipamelote, lapen Ne nangphan hukum kepi aron an klemlote,

¹⁸Ne nangpo David aphan kechak ateng Ne klempo, halaso ahut Ne laphan pulo, Israel adet la aso-asusi pangribompo.

¹⁹Bonta jongsi nang lapen nangrat atum Ne nangkepitang aron lapen hukum-heihei kroikrelote lapen akaprek arnam-heihei aphansi archo pulote,

²⁰Ne nangkepitang alongle pen nangphan nang pasuntukpo lapen Nephan keparchoji kepangthirtang adim laso a-Kardomhemthepi ta obuppo. Lahin lahin arat atum laphan ingnekchoipo lapen langrempo.”

²¹Non Kardomhemthepi aphan man pathe-olo bonta baduta kedam kevurput abang manghuhaksi arjupo, “Laso adim lapen Kardomhemthepi aphan HEMPHU kopisi la keklemloma?”

²²Rat atum thakpo, “Lake pima Ijip pen aphusar atum aphan kevan a-Arnam HEMPHU aphan latum ke-o apot-lo. Latum akaprek a-arnam-heihei aphan hungsi halahei aphan archorong-lo. La apotsi HEMPHU latum aphuthak laso akevir vanlo.”